Nghena endzeni

Hundzela eka leswi nga endzeni

Timbhoni Ta Yehovha

Hlawula ririmi Xitsonga

 NDZIMA 12

Yesu U Hi Dyondzisa Ku Khongela

Yesu U Hi Dyondzisa Ku Khongela

XANA wa vulavula na Yehovha Xikwembu?— Phela, u lava leswaku u vulavula na yena. Loko munhu a vulavula ni Xikwembu, sweswo swi vuriwa ku khongela. Yesu a a tshama a ri karhi a vulavula ni Tata wakwe la nge matilweni. Minkarhi yin’wana a a lava ku va swakwe loko a vulavula ni Xikwembu. Bibele yi ri, siku rin’wana “A tlhandlukela entshaveni a ri yexe a ya khongela. Hambileswi nkarhi a wu fambile, a a ri swakwe endhawini yoleyo.”—Matewu 14:23.

Hi kwihi laha u nga yaka kona u ya khongela Yehovha u ri wexe?— Kumbexana u nga vulavula na Yehovha u ri wexe loko u nga si etlela. Yesu u te: “Loko wena u khongela, nghena ekamareni ra wena, loko u pfale nyangwa ya wena, khongela eka Tata wa wena.” (Matewu 6:6) Xana wa khongela eka Yehovha madyambu man’wana ni man’wana u nga si etlela?— U fanele u endla tano.

Yesu a a khongela loko a ri yexe . . . ni loko a ri ni vanhu van’wana

Nakambe Yesu a a khongela loko a ri ni vanhu van’wana. Loko munghana wakwe Lazaro a file, Yesu u  khongerile a ri ni vanhu van’wana lava a va ri endhawini leyi Lazaro a a lahliwe eka yona. (Yohane 11:41, 42) Yesu a a khongela ni loko a ri eminhlanganweni ni vadyondzisiwa va yena. Xana wa ya eminhlanganweni laha ku khongeriwaka kona?— Hakanyingi munhu lonkulu hi yena a khongelaka kwalaho. U fanele u yingiserisisa kahle hikuva u va a khongelela wena eka Xikwembu. Hi kona u nga ta vula u ku, “Amen” loko a heta ku khongela. Xana wa swi tiva leswaku swi vula yini ku “Amen” loko munhu a heta ku khongela?— Rito leri ri vula leswaku wena wa xi amukela xikhongelo xexo. Swi vula leswaku na wena u pfumelelana na xona.

Hikwalaho ka yini u fanele u yingiserisisa loko ku khongeriwa eminhlanganweni?

Yesu a a tlhela a khongela hi nkarhi wa swakudya. A a khensa swakudya eka Yehovha. Xana wa khongela minkarhi hinkwayo loko u nga si dya swakudya?— Hi fanele hi khensa swakudya eka Yehovha hi nga si sungula ku dya. Loko mi dya mi tele ku nga ha khongela un’wana exikarhi ka n’wina. Kambe xana u ta endla njhani loko u dya u ri wexe? Kumbe u ta endla yini loko u dya ni vanhu lava nga n’wi nkhensiki Yehovha?— Kutani u fanele u tikhongelela hi wexe.

Xana minkarhi hinkwayo u fanele u khongela swi twala? Kumbe xana Yehovha a nga ku twa loko u khongela hi mbilu?— Nhlamulo ya kona hi nga yi kuma loko hi tsundzuka leswi humeleleke Nehemiya. A a ri mugandzeri wa Yehovha loyi a a tirha endlwini ya Hosi Atazekiseki wa le Peresiya. Siku rin’wana Nehemiya a swi n’wi khomanga kahle loko a twa  leswaku rirhangu ra muti wa Yerusalema, ku nga ntsindza wa vanhu va ka vona, ri hirimuxiwile.

Hi swihi swiyimo leswi nga lavaka leswaku hi khongela hi mbilu, ku fana na Nehemiya?

Loko hosi yi vutisa Nehemiya leswaku ha yini a tsanile, Nehemiya u rhange hi ku khongela hi mbilu a nga si yi hlamula. Kutani Nehemiya u byele hosi leswaku ha yini a tsanile kutani a kombela leswaku yi n’wi pfumelela a ya eYerusalema a ya pfuxeta marhangu. Xana ku humelele yini?—

Ina, Xikwembu xi xi hlamurile xikhongelo xa Nehemiya. Hosi yi n’wi pfumelerile leswaku a famba! Hosi yi tlhele yi nyika Nehemiya timhandzi to tala to aka marhangu ha tona. Leswi swi kombisa kahle leswaku Xikwembu xi nga swi hlamula swikhongelo swa hina, hambiloko hi khongela hi mbilu.—Nehemiya 1:2, 3; 2:4-8.

Kutani tivutise. Xana swa boha ku korhamisa nhloko loko u khongela? Xana u fanele ku nkhinsama hi matsolo loko u khongela? Xana u swi vonisa ku  yini?— Minkarhi yin’wana Yesu a a nkhinsama hi matsolo loko a khongela. Minkarhi yin’wana a a khongela a yimile. Naswona minkarhi yin’wana a a languta ematilweni loko a khongela, hilaha a endleke hakona loko a khongelela Lazaro.

Kutani ke, xana leswi swi kombisa yini?— Ina, swi kombisa leswaku ndlela leyi u yimeke ha yona loko u khongela a hi ya nkoka ngopfu. Minkarhi yin’wana i swinene ku korhamisa nhloko ni ku pfala mahlo. Minkarhi yin’wana u nga ha nkhinsama hi matsolo hilaha Yesu a endleke hakona. Kambe, tsundzuka leswaku hi nga khongela eka Xikwembu nkarhi wun’wana ni wun’wana wa siku, naswona xi ta hi twa. Nchumu wa nkoka loko hi khongela, i ku tshemba leswaku Yehovha wa hi twa. Xana wa tshemba leswaku Yehovha wa swi twa swikhongelo swa wena?—

Hi swihi swilo leswi u nga swi byelaka Xikwembu loko u khongela?

Xana hi swihi swilo leswi hi faneleke hi swi vula loko hi khongela eka Yehovha?— Wa nga ndzi byela: Loko u khongela, u xi byela yini Xikwembu?— Yehovha u hi nyika swilo swo tala leswinene naswona swa fanela leswaku hi n’wi nkhensa hikwalaho ka swona, a swi tano ke?— Hi nga n’wi nkhensa hikwalaho ka swakudya leswi hi swi dyaka. Kambe, xana u tshame u n’wi nkhensa hikwalaho ka xibakabaka xa wasi, mirhi ya rihlaza ni hikwalaho ka swiluva swo xonga?— Phela hi yena a nga swi endla.

Vadyondzisiwa va Yesu va tshame va n’wi kombela leswaku a va dyondzisa ku khongela. Hiloko Mudyondzisi Lonkulu a va dyondzisa, a tlhela a va byela leswaku hi swihi swilo swa nkoka swinene swo swi khongelela. Xana wa swi tiva swilo swa kona?— Teka Bibele ya wena kutani u pfula Matewu ndzima 6. Eka tindzimana 9 ku fika eka 13, hi kuma xikhongelo lexi vanhu  vo tala va xi vitanaka Tata wa Hina kumbe Xikhongelo xa Hosi. A hi hlaye swin’we.

Laha hi dyondza leswaku Yesu u hi lerise leswaku hi khongelela vito ra Xikwembu. U hi byele leswaku hi khongelela vito ra Xikwembu leswaku ri kwetsimisiwa. Hi rihi vito ra Xikwembu?— I Yehovha, naswona hi fanele hi ri rhandza vito rero.

Xa vumbirhi, Yesu u hi dyondzise leswaku hi khongelela Mfumo wa Xikwembu leswaku wu ta. Mfumo lowu i wa nkoka hikuva wu ta tisa ku rhula laha misaveni naswona wu ta yi endla yi va paradeyisi.

Xa vunharhu, Mudyondzisi Lonkulu u vule leswaku hi khongelela ku rhandza ka Xikwembu leswaku ku endleka emisaveni tanihi leswi ku endlekaka etilweni. Loko hi ri karhi hi khongelela swilo leswi, hi fanele hi endla leswi Xikwembu xi languteleke leswaku hi swi endla.

Nakambe Yesu u hi dyondzise ku khongelela swakudya swa hina swa siku ni siku. U tlhele a vula leswaku hi fanele hi kombela ku rivaleriwa eka Xikwembu loko hi endle swilo leswi hoxeke. Naswona hi fanele hi kombela Xikwembu leswaku xi hi rivalela. Kambe loko xi nga si hi rivalela, hi fanele hi rhanga hi rivalela vanhu van’wana loko va hi dyoherile. Xana sweswo swa ku olovela ku swi endla?—

Xo hetelela, Yesu u te, hi fanele hi khongelela leswaku Yehovha Xikwembu a hi sirhelela eka lowo biha, ku nga Sathana Diyavulosi. Ina, swilo leswi hinkwaswo i swinene leswaku hi swi vula loko hi khongela eka Xikwembu.

Hi fanele hi tshemba leswaku Yehovha wa swi twa swikhongelo swa hina. A hi fanelanga hi kombela leswaku a hi pfuna ntsena, kambe hi fanele hi tlhela hi n’wi nkhensa minkarhi hinkwayo. Wa tsaka loko hi tshembeka eka leswi hi swi vulaka eswikhongelweni swa hina ni loko hi n’wi kombela swilo leswinene. Naswona u ta hi nyika swona swilo leswi. Xana wa swi tshemba sweswo?—

Ndzayo yin’wana leyinene malunghana ni xikhongelo yi kumeka eka Varhoma 12:12; 1 Petro 3:12; na 1 Yohane 5:14.