Nghena endzeni

Hundzela eka leswi nga endzeni

Timbhoni Ta Yehovha

Hlawula ririmi Xitsonga

Jarimani: Va ri karhi va chumayela etindhawini ta mani na mani hi ku tirhisa xigolonyana xa minkandziyiso emahlweni ka kampa ya vanhu lava humaka ematikweni man’wana

 SWIENDLAKALONKULU SWA LEMBE LERI NGA HUNDZA

Swiviko Leswi Humaka eMatikweni Man’wana

Swiviko Leswi Humaka eMatikweni Man’wana

Ku Chumayela Vanhu Va Le Matikweni Man’wana

Nsimu ya ririmirimbe leyi nga eJarimani yi kurile hikwalaho ka nhlayo leyikulu ya vanhu lava humaka ematikweni man’wana lava teke etikweni rero. Eka tin’hweti ta sweswinyana ta kaye, ku sunguriwe mintlawa ya 229 ya ririmirimbe. Vahuweleri va kwalomu ka 800 va le ka tikhoso ta kwalomu ka tindzimi ta 30 leti fambisiwaka hi tindzimi ta 13.

Vamakwerhu va chumayela vanhu lava humaka ematikweni man’wana etindhawini leti vaendzi va fikelaka eka tona. Leswi vamakwerhu va tirhisaka swigolonyana swo chumayela ha swona etindhawini leti tlulaka 200, va fambise minkandziyiso ya kwalomu ka 640 000.

 Huvo leyi Fumaka yi pfumele leswaku ku va ni tsima ro hlawuleka ro chumayela ku sukela hi May ku ya eka July 2016. Vahuweleri va kwalomu ka 700 lava vulavulaka Xiarabu lava humaka ematikweni ya nkombo va ye etindhawini ta khume ta le Austria ni le Jarimani leswaku va ya chumayela mintlawa leyikulu ya vanhu lava vulavulaka Xiarabu lava a va tshama kwalaho.

Va Rholela Timali Ta Nsimbi eGondzweni

Vahuweleri va 50 lava nga eVandlheni ra Xikriol leri nga eFaber’s Road eBelize hakanyingi va famba hi milenge loko va ya ensin’wini. Vamakwerhu vo tala a va na mali, kambe va lava tindlela ta leswaku va kombisa malwandla. Eka malembe lama nga hundza, vamakwerhu va sungule ku rhwalela timali ta nsimbi leti a va ti kuma emagondzweni loko va ri karhi va chumayela hi yindlu ni yindlu. Eku heleni ka lembe rin’wana ni rin’wana, a va hlangana leswaku va hlantswa, va hlawula ni ku tlhela va hlaya mali leyi va yi hlengeleteke.

Hambileswi to tala ta timali toleto ta nsimbi a ti ri ni ntikelo wa le hansi (lowu ringanaka ni hafu ya sente ya le Amerika), lembe ni lembe a va hlengeleta mali leyi endlaka 3 000. Vamakwerhu a va tirhisa hafu ya mali yoleyo leswaku va pfuneta ku hakelela swikoxo swa Holo ya Mfumo kutani hafu leyin’wana va yi rhumela leswaku yi seketela ntirho wa misava hinkwayo.

Nongonoko Lowu Yingiseriweke Hi Vanhu Va Mune Wa Timiliyoni!

Xin’wana xa swiendlakalo leswi xiyekaka swinene ematin’wini ya le tikweni ra Burundi xi endleke hi March 5, 2016 loko erhavini ku endze Anthony Griffin muyimeri wa Ntsindza wa Timbhoni ta Yehovha. Nongonoko wo hlawuleka wa mavandlha wu haxiwe etikweni hinkwaro eka xitichi xa xiyanimoya xa le tikweni rero. Ku ringanyetiwa leswaku vanhu lava yingiseleke nongonoko wolowo a va ri kwalomu ka mune wa timiliyoni!

 Xiyanimoya lexi a xi haxa nongonoko wolowo xi nyikele vumbhoni lebyikulu naswona ku vuriwe swilo swo tala leswinene. Un’wana wa lava tirhaka ku lunghisa eka xiyanimoya loyi a pfuneteke eka ku haxiwa ka nongonoko lowu u te: “Mi fanele mi humesa yo tala ya minongonoko leyi!” Mulawuri wa le ka xiyanimoya u tsale a ku: “Ndzi mi khutaza leswaku mi ya emahlweni mi [humesa minongonoko leyi fanaka], leyi handle ko kanakana yi ponisaka vutomi bya vanhu vo tala.” Tibazi ni mathekisi yo tala a swi tlanga nongonoko lowu eka xiyanimoya.

Maphorisa Ma Tima Vuyimbeleri

Loko ku sele siku leswaku ku va ni Xitsundzuxo xa 2016, vamakwerhu lava nga eka ntlawa lowu nga endhawini ya le kule eNepal a va ri ni gome loko va twa leswaku ku ta va ni khonsati ya vuyimbeleri exikolweni lexi nga ekusuhi ni holo leyi va yi hirheke.

Tikhonsati to tano ti ni pongo swinene. Loko vamakwerhu va ri karhi va basisa holo hi mixo wa siku ra Xitsundzuxo, muhleri wa khonsati yoleyo u va byele a ku: “A mi nge twi nchumu handle ka vuyimbeleri bya hina.”

Khonsati yi sungule ninhlikanhi naswona a ku ri ni pongo swinene hilaha swi tolovelekeke ha kona. Hambileswi vamakwerhu a va hirhe xipikara lexi nga ni pongo swinene ku tlula lexi a va hlele ku tirhisa xona, a va nga twi nchumu hambi loko va ri karhi va ringeta xikurisamarito. Vamakwerhu a va hele matimba kambe va khongele hi mbilu hinkwayo hi mhaka leyi. Kutani endzhaku ka timinete ta 30 Xitsundzuxo xi nga si sungula, loko vamakwerhu vo tala va ri karhi va fika, hi xitshuketa vuyimbeleri byi miyerile. A ku sungule nyimpi ya vanhu van’wana lava a va ri ekhonsatini lava a va ri karhi va nwa, kutani maphorisa ma yimisa khonsati. Vamakwerhu va kote ku khoma Xitsundzuxo endhawini leyi nga riki na pongo, leyi rhuleke ni leyi xiximekaka.

 Va Bumabumela jw.org

Giuseppe i phayona ra nkarhi hinkwawo eItaly. U tirhela khampani leyi tirhanaka ni swa Internet a ri ekaya. Hi May u ye eka nhlangano ni vanhu lava a tirhaka na vona va kwalomu ka 70 leswaku va ta bula hi tindlela tin’wana letintshwa leti khamphani yi lavaka ku ti sungula. Mulawurinkulu wa khamphani u sungule hi ku vula leswaku khamphani ya vona yi nga dyondza eka ti-website tin’wana malunghana ni leswi yi hleleke ku swi endla. Kutani u va kombe xikombiso xin’wana eka xikirini. Giuseppe u hlamarisiwe hi ku vona tlukankulu ra jw.org eka xikirini. Mulawurinkulu u te: “Leyi i website ya xiyimo xa le henhla emisaveni!” Kutani u sungule ku kambisisa swiyenge swa jw.org. U vulavule hi ndlela leyi swi olovaka ha yona ku kuma leswi u swi lavaka ni swifaniso swo tsakisa leswi nga eka yona.

 Giuseppe u ri: “Lava ndzi tirhaka na vona swi va hlamarisile ku tiva nhlayo ya tindzimi leti nga eka website. Loko a gimeta leswi a hi komba swona, mininjhere wa mina u byele vanhu ni mulawurinkulu a ku: ‘Giuseppe i Mbhoni ya Yehovha.’ Hi nkarhi wolowo, mulawurinkulu u ndzi byele a ku: ‘Nhlengeletano ya n’wina yi fanele yi bumabumeriwa. Mi endle Website leyi khamphani, feme kumbe nhlangano wun’wana ni wun’wana emisaveni swi yi navelaka. Ndza tivutisa leswaku hi wahi matshalatshala lawa mi ma endlaka leswaku yi tshama yi ri enkarhini ni ku tlhela swi olova ku yi tirhisa ni nkarhi lowu mi wu tirhiseke leswaku yi va ni rungula leri tsakisaka.’ Swi ndzi khomise tingana hikwalaho ka leswi ndzi bumabumeriweke swinene hi nchumu lowu ndzi nga wu endlangiki. Kambe swi ndzi tsakisile swinene hikwalaho ka leswi ku nyikeriweke vumbhoni eka vanhu vo tala lava a va nga tivi nchumu hi Timbhoni ta Yehovha. Sweswi ndzi bula nkarhi ni nkarhi ni van’wana va lava ndzi tirhaka na vona naswona ndzi sungule dyondzo ya Bibele ni vanharhu va vona.” Khamphani leyi Giuseppe a tirhaka eka yona yi ya emahlweni yi “kambisisa” website ya jw.org, loko hi hala tlhelo yena a ya emahlweni a bula ni lava a tirhaka na vona hi Bibele.

A Nga Pfumelanga Ku Ya eTikweni Rin’wana Leswaku A Ya Tlanga Bolo

Argentina: Jorge a ri karhi a tlanga bolo ni vamakwerhu

Jorge i muntshwa loyi a tshamaka eArgentina. Eku sunguleni ka 2010, Jorge u chumayeriwe mahungu lamanene hi mudyondzikulorhi. Hi ku hatlisa, u sungule ku dyondza Bibele hi ku tirhisa buku leyi nge Xana Bibele Yi Dyondzisa Yini Hakunene? Hi nkarhi wolowo, a a tlanga bolo. Leswi a swi n’wi fambela kahle eka swa mintlango u fanelekele ku ya tlangela xipano lexi a xi ri eka ntlawa lowu nga ehansi. Hi April 2014, u kume xirhambo lexi ringaka xa leswaku a ya tlangela xipano xa le Jarimani. A a tsakele leswaku u ta va mutlangi wo duma wa bolo naswona u xi amukerile xirhambo xexo. Loko ka ha sale  masikunyana leswaku a ya eYuropa, muleteri wakwe u n’wi byele a ku: “U Mbhoni ya Yehovha, a hi swona ke? U nga tlangi hi vutomi bya wena hi ku ya etikweni rin’wana. Loko ndza ha ri ntsongo, a ndzi ri Mbhoni. Ndzi rhambiwe ku ya eka xipano lexi nga etikweni ra le Asia. Va ndzi tshembise swilo swo tala naswona hinkwaswo swi ndzi tsakisile. Ndzi ye kwalaho ni ndyangu wa ka hina kambe loko hi vuya a hi hele matimba swinene.” Jorge u ri: “Leswi a swi vuleke swi ndzi susumetele ku endla xiboho xa leswaku ndzi nga yi eYuropa. Hi 2015, ndzi ve muhuweleri wa mahungu lamanene naswona ndzi khuvuriwile.”

Nyiko Leyi Ndzi Yi Kumeke Mahala

Hi September 2015, ku ve ni Nhlengeletano ya Xifundzha leyi nge “Tekelela Yesu!” eKampala, le Uganda. Vanhu lava a va ri kona a va tsakile loko Mark Sanderson xirho xa Huvo leyi Fumaka a humesa Vuhundzuluxeri Bya Misava Leyintshwa Bya Matsalwa Yo Kwetsima hi Xiluganda.

Xichudeni xin’wana xa Bibele xi te: “Leswi ndzi kumeke Bibele leyi yo saseka swa ndzi tsakisa swinene! Hi nkarhi wolowo, vanhu a va ri karhi va lunghiselela riendzo ra mupapa. Leswaku va kuma mali yo tala, a va xavisa tirhosari leti ‘katekisiweke’ ku nga vuhlalu lebyi nga ni xihambano hi mali leyi ringanaka 433 wa tirhandi. Vanhu a va yi lava mikateko, kambe vo tala a va nga ri na mali. Hi hala tlhelo, a ndzi kume nyiko ya mahala. Yehovha u yi nyike vanhu hinkwavo lava teke enhlengeletanweni naswona a swi siyeriwa munhu leswaku a nyikela hi munyikelo lowu humaka embilwini. Siku ni siku, loko ndzi hlaya Rito ra Yehovha hi ririmi ra mina ndzi n’wi tiva ku antswa naswona ndzi titwa ndzi katekisiwile. Ndzi nkhensa Yehovha hikwalaho ka leswi a ndzi nyikeke Bibele.”

Minkandziyiso Ya Tona Yi Kandziyisiwa eTilweni

Leswaku va onha website ya www.jw.org vito, varhangeri van’wana va vukhongeri va le xifundzheni xa Congo (Kinshasa)  va dyondzise valandzeri va vona leswaku minkandziyiso ya Timbhoni ta Yehovha yi kandziyisiwa etilweni. Leswaku va seketela xihehlo lexi, va kombetele eka maletere ya “www,” va vula leswaku ma yelana ni nomboro ya 666 leyi nga ebukwini ya Nhlavutelo. (Nhlav. 13:18) Hikwalaho ka sweswo, swichudeni swin’wana swa Bibele a swi nga ha pfumeli ku dyondza.

Endzhaku ka loko vatekani van’wana lava nga maphayona va khongele hi mhaka leyi, va rhambe swichudeni swa vona swa Bibele ni vanghana va swona va vukati ekaya ra vona. Vatekani vanharhu va pfumerile kutani endzhaku ka loko va dyile, vatekani lava nga Timbhoni va va kombe vhidiyo leyi nge Timbhoni Ta Yehovha Ti Chumayela eMisaveni Hinkwayo. Leswi vaendzi va vona va swi dyondzeke swi endle leswaku va cinca langutelo leri hoxeke leri a va na rona malunghana ni laha minkandziyiso ya hina yi humaka kona. Eka vhiki leri landzelaka, nuna wa xin’wana xa swichudeni, u sindzise vatekani lava nga Timbhoni leswaku va teka munyikelo lowu ringanaka 1 400 wa tirhandi leswaku va wu yisa eka ntirho wa misava hinkwayo, hambileswi yena a nga dyondzi.

Va Dyondza Tinsimu Letintshwa

Hambileswi vamakwerhu lava tshamaka endhawini ya le kule ya Papua New Guinea va nga riki na Internet, va tikarhatela ku dyondza tinsimu letintshwa ta Mfumo. Kutani Vandlha ra le Mundip ri rhuma makwerhu edorobeni ra le kusuhi, laha a faneleke a famba tiawara timbirhi hi milenge a tlhela a famba tin’wana timbirhi hi bazi. Loko a fika kwalaho, u nghena eka Internet, a tsala marito ya risimu lerintshwa ebukwini ya tinotsi kutani a tlhelela ekaya, laha a fikaka a tsala marito ya rona ebodweni ya le Holweni ya Mfumo leswaku un’wana ni un’wana a ma vona. Kutani vandlha hinkwaro ri kopa tinsimu letintshwa leswaku ri ta ti tirhisa eminhlanganweni. Hakunene va swi tlangela ku yimbelela swin’we ni mavandlha emisaveni hinkwayo tanihi xiphemu xa vona xo gandzela Yehovha.