Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2017

 GEORGIA

Va Tsundzuke Mutumbuluxi Wa Vona Lonkulu

Va Tsundzuke Mutumbuluxi Wa Vona Lonkulu

Vanhu vo tala lava hi hlayeke hi vona eka matluka lama nga hundza i vantshwa lava ‘tsundzukeke Mutumbuluxi wa vona Lonkulu emasikwini ya vuntshwa bya vona.’ (Ekl. 12:1) Entiyisweni, munhu un’we eka vanhu vanharhu eka maphayona ya 3 197 eGeorgia u ni malembe ya 25 kumbe ehansi ka wona. Ha yini vantshwa lava vo tala va hisekela ntiyiso?

Swi vonaka onge ku ni swilo swo hlayanyana leswi endleke leswaku va hiseka. Hakanyingi mindyangu ya le Georgia yi ni vuxaka lebyikulu. Konstantine, loyi vana vakwe va ntlhanu va nga Timbhoni u ri: “Lexi endleke leswaku ndzi rhandza ntiyiso hi leswi Yehovha a nga Tatana la nga ni rirhandzu. Loko se ndzi va tatana, pakani ya mina a ku ri ku pfuna vana va mina leswaku va va ni vuxaka lebyikulu na mina.”

Malkhazi ni nsati wakwe, lava nga ni vana vanharhu, va tirhe hi matimba leswaku va va ni vuxaka lebyikulu endyangwini.  U ri: “Nkarhi ni nkarhi, a hi vutisa vana va hina hi leswi va tsakisaka hi hina ni hi vamakwenu va vona. Kutani a hi va kombela leswaku va vula mavonelo ya vona eka vugandzeri bya hina bya ndyangu. Hikwalaho ka sweswo, va dyondze ku vona swilo leswinene eka van’wana va tlhela va va xixima.”

“Sweswi Ndzi Hanya Vutomi Lebyi Enerisaka!”

Hi ku seketela ndzetelo wa vatswari, vakulu va ringeta ku katsa vantshwa eka mintirho ya vandlha to ho suka. Nestori, loyi a khuvuriweke loko a ri ni malembe ya 11 u ri: “Loko ndza ha ri ntsongo, vakulu a va ndzi nyika swiavelo swo hambanahambana swo olova. Leswi swi endle ndzi titwa leswaku hakunene ndzi xirho xa vandlha.”

Vanhu lava nga swikombiso leswinene ni nseketelo wa vakulu na swona i swa nkoka. Koba, un’wana wa vabuti va Nestori, u ri: “Ku hambana ni vamakwenu va mina, malembe ya vuntshwa bya mina a ma tika swinene. Nkulu un’wana loyi a a hari muntshwa loyi a ndzi vekela xikombiso  lexinene, minkarhi hinkwayo a ndzi twisisa naswona a nga ndzi xopaxopi. U ndzi pfunile swinene leswaku ndzi tlhelela eka Yehovha.”

Namuntlha Nestori na Koba swin’we ni sesi wa vona Mari, va tirha swin’we ensin’wini leyi nga ekule. Koba u ri: “Sweswi ndzi hanya vutomi lebyi enerisaka!”

“Vana Va Mina Va Tama Va Famba eNtiyisweni”

Rhavi ri tikarhatela ku seketela matshalatshala ya vatswari yo letela vana va vona, hi ku va ri katsa vantshwa lava nga Vakreste eka matsima ya nhlengeletano. Xirho xin’wana xa Komiti ya Rhavi xi te: “Ha va rhandza vantshwa, kutani hi ringeta ku va seketela loko va tikarhatela ku fikelela tipakani ta vona to tirhela Xikwembu.”

Timbhoni ta le Georgia leti tirheke ni malandza ya le matikweni yo hambanahambana ku aka Holo ya Tinhlengeletano eTbilisi

Ku tirha ni ku tihlanganisa ni vamakwerhu lava wupfeke swi endla leswaku vantshwa va tshamela ku anakanya ha swona. Mamuka, loyi a tirheke ni malandza ya le matikweni yo hambanahambana ku aka Holo ya Tinhlengeletano eTbilisi, u ri: “Matsima wolawo ya le matikweni yo hambanahambana ma ndzi nyike nkarhi wa leswaku ndzi dyondza eka van’wana. Ematshan’weni ya leswaku ndzi va ni vutshila byo karhi, ndzi dyondze swo tala hi Xikwembu.”

Vuxaka lebyikulu bya ndyangu, xikhutazo lexi humaka eka vakulu ni vanhu van’wana lava nga swikombiso leswinene swi ve ni nkucetelo lowunene eka vantshwa va le Georgia. Vatswari va vona va titwa hi ndlela leyi muapostola Yohane a titweke ha yona loko a tsala a ku: “Ndzi hava xivangelo lexikulu xa ku nkhensa ku tlula swilo leswi, ku twa leswaku vana va mina va tama va famba entiyisweni.”—3 Yoh. 4.

Matshalatshala Yo Hundzuluxela

Hi 2013, Huvo leyi Fumaka yi kombele marhavi hinkwawo leswaku ma kambisisa loko ku ri ni xilaveko xa minkandziyiso  hi tindzimi leti engetelekeke leti vulavuriwaka ensin’wini leyi languteriwaka hi rhavi ra yona. Xikongomelo xa kona a ku ri ku chumayela vanhu vo tala mahungu lamanene.

Xisweswo, rhavi ra le Georgia ri endle xiboho xo hundzuluxela minkandziyiso yo karhi hi Xisvan ni Ximingrelia, ku nga tindzimi timbirhi leti yelanaka swinene ni Xigeorgia.

Maphayona lama hisekaka lama humaka exifundzheni xa Svaneti, ma tsale ma ku: “Vanhu lava vulavulaka Xisvan va xi rhandza swinene Xikwembu naswona va yi xixima Bibele. Hambi ku ri lava eku sunguleni a va kanakana ku teka minkandziyiso ya hina va susumeteleke ku teka leyi a yi hundzuluxeriwe hi ririmi ra manana.”

Vahuweleri hinkwavo lava vulavulaka Ximingrelia a va tsake swinene loko va sungula ku va ni minhlangano hi ririmi ra manana. Giga, phayona leri nga muntshwa u ri:  “Sweswi ndza swi kota ku hlamula hi marito ya mina eminhlanganweni. A swi kali swi lava ndzi dya marhambu ya nhloko loko ndzi fanele ndzi hlamula.”

Zuri, nkulu evandlheni ra Ximingrelia eTkaia, u phofula ndlela leyi a titwaka ha yona, u ri: “Ndzi humeleriwe hi swilo swo tala evuton’wini bya mina, swo tsakisa ni swo biha, kambe a swi nga si tshama swi ndzi endla ndzi rila. Kambe loko ku yimbeleriwa tinsimu ta Mfumo hi Ximingrelia eminhlanganweni ro sungula, vayingiseri hinkwavo va tsandzeke ku tikhoma kutani va rila, ku katsa na mina.”

Xiendlakalo Lexi Nga Rivalekiki Xa Sweswinyana

Xiendlakalo lexi nga rivalekiki ematin’wini ya Timbhoni ta le Georgia xi humelele hi Mugqivela, April 6, 2013, loko David Splane loyi a nga xirho xa Huvo leyi Fumaka a nyikela  nkulumo yo nyiketela muako wa rhavi lowu kurisiweke ni ku pfuxetiwa, Holo ya Tinhlengeletano swin’we ni muako wa xikolo xa Bibele. Hi ku swi rhandza, Timbhoni to tala ta kwalaho ti amukele vapfhumba va 338 emakaya ya tona lava a va huma ematikweni ya 24.

Hi siku leri landzeleke, Makwerhu Splane u nyikele nkulumo yo hlawuleka eka vanhu va 15 200 kasi van’wana a va yi hlalela hi fambiselo ra Internet emavandlheni etikweni hinkwaro. Lexi a ku ri xiendlakalo lexikulu xa nhlengeletano ematikweni yo hambanahambana lexi tshameke xi va kona eGeorgia. Ku khutazana swin’we ni ntsako lowu vamakwerhu va veke na swona hakunene a swi tsakisa. Makwerhu un’wana loyi a ha riki muntshwa u te: “Sweswi ndza swi tiva leswaku misava leyintshwa yi ta va yi ri njhani.”

Ku nyiketeriwa ka rhavi eTbilisi, hi 2013

Xikolo Xa Bibele Xa Mimpatswa Leyi Nga Vakreste, lexi sweswi xi vitaniwaka Xikolo Xa Vachumayeri Va Mfumo, xi tikombe xi ri nkateko wa xiviri eka vanhu va Yehovha eGeorgia. Ku sukela hi 2013, ku thwase swichudeni swo tlula 200. Hikwalaho ko tlangela dyondzo leyi ma yi kumeke, mathwasana a ma tiyimisele ku ya tirha hi ku hiseka kun’wana ni kun’wana laha ku nga ni xilaveko.

“Ku Nava Ndzi Ya eMahlweni Eka Swilo Swa Le Mahlweni”

Hi nkhensa matshalatshala ya vachumayeri vo sungula va Mfumo lava nga ni xivindzi, hikuva vanhu hinkwavo va le Georgia va twe mahungu lamanene. Rirhandzu ra vona ro pfumala vutianakanyi eka Xikwembu ni vanhu, ripfumelo ra vona, xivindzi ni goza leri va ri tekeke, Yehovha u swi katekisile swinene.

Vamakwerhu vo tlula 18 000 eGeorgia va tsaka ku ya emahlweni ni ntirho lowu sunguriweke hi vamakwerhu va nkarhi lowu nga hundza ni ku tlhela va pfuna vanhu leswaku va vona matimba ya Rito ra Xikwembu.—Filp. 3:13; 4:13.

Swirho swa Komiti ya Rhavi ya le Georgia: Wayne Tomchuk, Levani Kopaliani, Joni Shalamberidze na Michael E. Jones