Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2017

 GEORGIA

Ndzi Swi Vone Hi Ya Mina Leswi Bibele Yi Swi Dyondzisaka!

Pepo Devidze

Ndzi Swi Vone Hi Ya Mina Leswi Bibele Yi Swi Dyondzisaka!
  • U VELEKIWE HI 1976

  • U KHUVURIWE HI 1993

  • MATIMU YAKWE HI KU KOMISA U kule a nghena Kereke ya Orthodox ya le Georgia naswona a yi landzela swinene milawu ya yona. Endzhaku ka loko a dyondze ntiyiso wa Bibele, u tirhe eBethele ni nuna wakwe. Sweswi i maphayona yo hlawuleka.

RO SUNGULA loko ndzi tiva Timbhoni a ndzi ri xichudeni ekholichi ya le dorobeni ra Kutaisi. Muakelani wa mina a ndzi byele leswaku Timbhoni a ti tirhisi swifaniso loko ti gandzela naswona a ti pfumeli leswaku Yesu i Xikwembu xa Matimba Hinkwawo. Leswi swi lwisane ni leswi a ndzi pfumela eka swona tanihi xirho xa Kereke ya Orthodox.

Loko ndzi tlhelela ekaya eTsageri, hi ximumu xa 1992 ndzi kume leswaku Timbhoni ti kona emugangeni wa ka hina. Manana a tiva swilo swo tala leswinene hi tona. Hikwalaho ka leswi a ndzi ri ni langutelo ro biha hi tona, u ndzi byele a ku: “Famba u ya ti vonela hi wexe leswi ti swi dyondzisaka.”

Vamakwerhu vambirhi lava a va ri maphayona Pavle na Paata, nkarhi ni nkarhi a va endzela ndyangu wun’wana lowu a wu tshama emugangeni wa hina. Vanhu vo tala a va va kona leswaku va va  yingisela ni ku va vutisa swivutiso. Kutani ndzi endle xiboho xo va kona eka mabulo wolawo. Nkarhi na nkarhi loko ndzi vutisa, vamakwerhu lava a va pfula Bibele ivi va ndzi byela leswaku ndzi yi hlaya. Leswi swi ndzi khumbile swinene—ndzi swi vone hi ya mina leswi Bibele yi swi dyondzisaka!

Hi ku hatlisa ndzi joyine ntlawa lowu vamakwerhu lava a va hlaya na wona Bibele. Hi ximumu lexi landzeleke, ndzi ve un’wana wa vanhu va khume lava khuvuriweke. Endzhakunyana, manana na yena u ve Mbhoni ya Yehovha.

Loko ndzi languta endzhaku, ndza swi nkhensa swinene leswi vamakwerhu va hlamuleke swivutiso swa mina hinkwaswo hi ku va ndzi ti hlayele tinhlamulo eBibeleni. Leswi swi ndzi pfune leswaku ndzi lwisana ni ku kanakana ka mina ni tidyondzo leti a ndzi pfumela eka tona. Ku va ndzi ti pfulele Bibele swi ndzi pfunile swinene kutani na mina ndzi tirhisa endlelo leri ku pfuna van’wana leswaku va rhandza ntiyiso.