Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2017

Va ri karhi va chumayela exitichini xa timovha leti fambisiwaka hi tintambu ta gezi eKhulo

 GEORGIA

“Leyi I Ndzhaka Ya Malandza Ya Yehovha.”—Esa. 54:17.

“Leyi I Ndzhaka Ya Malandza Ya Yehovha.”—Esa. 54:17.

MALANDZA ya Yehovha ya le Georgia ma chumayela mahungu lamanene hi ku hiseka naswona Yehovha u wu katekisile ntirho wa wona. Hikwalaho ka sweswo, vanhu hinkwavo etikweni va chumayeriwe mahungu lamanene.

Vahuweleri va ri karhi va lunghiselela ku ya chumayela eUshguli ku nga ndhawu leyi tlakukeke 2 200 wa timitara ehenhla ka vuandlalo bya lwandle

Emalembeni ya sweswinyana, vahuweleri lava hisekaka va dzike swinene eka swilaveko swa vanhu lava tshamaka etindhawini leti eka tona ku nga chumayeriwiki nkarhi na nkarhi. Etindhawini leti ku nga ni tintshava, swimitana swin’wana leswi nga ekule a swi fikeleriwa ntsena hi ku tirhisa  movha lowu kokaka hi mavhilwa ya mune kumbe lowu fambisiwaka hi tintambu ta gezi.

Vahuweleri exifundzheni xa Svaneti

Lembe ni lembe ku sukela hi 2009, rhavi ra le Georgia ri nyike mavandlha hinkwawo nxaxamelo wa tindhawu ta nsimu leyi nga aviwangiki ni ku rhamba vahuweleri leswaku va seketela ntirho wo chumayela etindhawini toleto. Vo tala a va fanele va titsona swo tala swinene leswaku va kota ku ya chumayela kwale.

Ana na Temuri Bliadze

Temuri na Ana Bliadze a va ha ku tekana loko va twa leswaku ku ni xilaveko lexikulu xa vahuweleri endhawini ya tintshava exifundzheni xa Ajaria. A va ha ku xava ndhawu leyi a va lava ku aka yindlu. Kambe sweswi se a va kume lunghelo ro ndlandlamuxa ntirho wa vona wa nsimu.

Va rhange va tshama vhiki rin’we exifundzheni xa Ajaria. Loko Temuri a hlamusela leswi swi n’wi tsakiseke u ri: “Vahuweleri va kwalaho a va famba mimpfhuka yo leha leswaku va ya chumayela eswimitanini leswitsongo. Leswi a hi ri ni movha lowu kokaka hi mavhilwa ya mune, ndzi nambe ndzi tibyela leswaku hi ta tirhisa wona kwale.”

Ana u ri: “A swi nga olovi ku rhurha hikuva a hi ri rhandza swinene vandlha swin’we ni ndyangu wa ka hina. Kambe hi yi vonile mikateko ya Yehovha.” Se swi endla malembe manharhu Temuri na Ana va ri karhi va seketela ntlawa wa le Keda lowu nga edorobeni leri nga exifundzheni xa Ajaria.

Ku Fika Ka Maphayona Yo Hlawuleka

Mpfuno wa maphayona yo hlawuleka ya nkarhinyana wu ve wa nkoka eku seketeleni ka ntirho wo chumayela etindhawini leti nga ekule. Loko xiavelo xa wona xi hela, maphayona yo tala ma endle xiboho xo tshama etindhawini leti a ma averiwe eka tona leswaku ma ta khathalela lava a ma sungule ku dyondza na vona Bibele.

Maphayona mambirhi ya xisati, lawa mavito ya wona ku  nga Khatuna, ma averiwe ku ya edorobeni ro saseka ra Manglisi. A ku nga ri na Timbhoni kambe vamakwerhu lava va tirhe nsimu leyi tswalaka mihandzu. Hi nh’weti yo sungula va fambise tidyondzo ta Bibele ta 9, leyi landzeleke ta 12 leyi landzeleke ta 15 ivi leyi landzeleke va fambisa ta 18. Leswaku va khathalela swichudeni swa vona swa Bibele, va teke xiboho xo tshama eManglisi.

Leswaku va ti khathalela, vamakwerhu lava a swi lava leswaku va nga tshami hi mavoko. Vanhu vo tala lava endzelaka eManglisi va tsakisiwa hi nchumu wun’wana wa kwalaho—ku nga swichocho swa muphayini leswi a swi tirhiseriwa ku endla mirhi ya swa rihanyo. Eku sunguleni, vamakwerhu lava va xisati a va hlengeleta swichocho swa rihlaza leswaku va endla mirhi ivi va yi xavisa eswitolo swa kwalaho. Kambe va nga swi langutelanga, va kume ndlela yin’wana leyi a va ta endla mali ha yona.

Siku rin’wana xichudeni xa Bibele xi va nyike swiciwana  swo hlayanyana. Xi va byele leswaku yin’wana ya timbhaha leti a xi ri na tona a yi tshikele mandza endhawini leyi tumbeleke kutani yi tlhotlhorhe swiciwana swo hlaya. Wansati loyi a a lava ku nyika vadyondzisi vakwe va Bibele swiciwana leswi a swi andzile ehokweni yakwe. Un’wana wa vamakwerhu lava va xisati a ri ni ntokoto wo fuwa tihuku kutani va endle xiboho xo va va tikhathalela hi ku va ni ndhawu yo fuwela tihuku.

Un’wana wa vamakwerhu lava va xisati u ri: “Hikwalaho ko pfuniwa hi Yehovha, hi vamakwerhu swin’we ni hi swichudeni swa hina swa Bibele hi tshame eManglisi ku ringana malembe ya ntlhanu.” Sweswi kwalaho ku ni ntlawa lowu hisekaka wa vamakwerhu.

Khatuna Kharebashvili na Khatuna Tsulaia in Manglisi

Ku Phayona Hi Ririmi Rimbe

Emalembeni ya sweswinyana, tiko ra Georgia ri ni vanhu vo tala lava humaka ematikweni mambe. Maphayona yo tala ma swi xiyile leswaku a ma fanele ma chumayela vanhu va tindzimi to hambanahambana. Kutani ma sungule ku dyondza tindzimi to tanihi Xiarabu, Xiazerbaijani, Xichayina, Xinghezi, Xiperesiya na Xiturkey.

Loko maphayona yo tala ma joyine mintlawa swin’we ni mavandlha ya tindzimi timbe, man’wana ma rhurhele etindhawini tin’wana laha ku nga ni xilaveko lexikulu. Giorgi na Gela a va ri emalembeni ya va-20 loko va rhurhela etikweni ra le kusuhi. Giorgi u ri: “A hi lava ku endlela Yehovha leswi nga ematimbeni ya hina naswona ku rhurhela etikweni rero a ku ri ndlela leyinene yo endla tano.”

Loko a hlamusela ndlela leyi a tiphineke ha yona kwalaho, Gela u ri: “Ku va nkulu endhawini yoleyo swi ndzi dyondzise swo tala. Swa tsakisa loko Yehovha a ku tirhisa leswaku u pfuna ‘tinyimpfu takwe letitsongo.’”—Yoh. 21:17.

Giorgi u ri: “A ku va ni swihinga kambe a hi dzike eka  ntirho wa hina naswona a hi nga tisoli. Hi ti vone hi endla leswi a hi fanele hi swi endla.”

Makwerhu un’wana wa xinuna loyi na yena vito ra yena ku nga Gela u tirhe eTurkey ku ringana malembe yo hlaya. U ri: “Eku sunguleni a swi ndzi tikela ku dyondza ririmi ra kwalaho kutani sweswo a swi endla ndzi nga vi ni ntsako. Hambiswiritano, loko se ndzi swi kota ku vulavula ni vamakwerhu swin’we ni vanhu va le nsin’wini, a swi ndzi tsakisa swinene.”

Nino loyi a a phayona eIstanbul le Turkey ku tlula malembe ya khume u hlamusela ndlela leyi a titwaka ha yona loko a ku: “Ndzi sungule ku vona nseketelo wa Yehovha ku sukela siku leri ndzi nga rhurha ha rona. Ku phayona ensin’wini yimbe swi endla leswaku siku ni siku u va ni mintokoto yo fana ni leyi kumekaka eka Buku Ya Lembe.”