Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2017

Ku lahlekeriwa hi nhundzu a swi va tshikisanga vamakwerhu ku tirhela Yehovha

 GEORGIA | 1998 KU YA EKA 2006

Minxungeto A Yi Va Tshikisanga Ku Tirhela Yehovha

Minxungeto A Yi Va Tshikisanga Ku Tirhela Yehovha

Vamakwerhu a va chavisiwanga hi malebvu ya nghala naswona va ye emahlweni va hlengeletana swin’we. Vakulu va teke magoza ya vutlhari leswaku va sirhelela vahuweleri. Makwerhu André Carbonneau, ku nga gqweta ra le Canada loyi a sirheleleke vamakwerhu emalembeni wolawo, u ri: “Hakanyingi makwerhu a a ta tshama ekusuhi ni laha ku khomeriwaka kona minhlangano a khome selfoni. Loko a vona ntshungu wa vapfukeri wu ri karhi wu ta, a ta hatla a tivisa vakulu hi nhlaselo wolowo.”

Vanhu va hise muti wa ka Shamoyan (eximatsini) ni ndhawu leyi minkandziyiso yi fikelaka kona (exineneni)

Endzhaku ka nhlaselo wun’wana ni wun’wana, vayimeri vambirhi lava humaka erhavini a va endzela vamakwerhu leswaku va ta va tiyisa. André u ri: “A swi hlamarisa hikuva vayimeri va rhavi va kume leswaku ndhawu leyi ku khomeriwaka eka yona minhlangano a ku ri ni vamakwerhu lava tsakeke va tlhela va n’wayitela.”

Vamakwerhu a va kanetiwa ehubyeni va tlhela va xanisiwa ehandle ka yona

Lava a va nga hlaseriwanga, ku katsa ni swichudeni swa  Bibele, va kombise ku tiyimisela loku fanaka. André u tsundzuka loko a ri karhi a vulavula ni wansati loyi a a lava ku va muhuweleri loyi a nga khuvuriwangiki. Wansati yoloye u n’wi byele a ku: “Loko ndzi vone minhlaselo yoleyo eka thelevhixini, ndzi vone ku hambana exikarhi ka Vakreste va ntiyiso ni va mavunwa naswona ndzi lava ku Mukreste wa ntiyiso.”

Ku Sirhelela Vakrestekulobye Hi Xivindzi

Emalembeni wolawo yo tika, vahuweleri va kombise leswaku va ni ripfumelo lerikulu ni xivindzi hi ku tshama va khomekile entirhweni wo chumayela. Lava a va katseka eku  sirheleleni ka Vakrestekulobye ehubyeni va kombise leswaku va ni ripfumelo leri fanaka.

Hakanyingi Timbhoni a ti hemberiwa eka swiviko swa mahungu tanihi vanhu lava vangaka ku avana emindyangwini, lava alaka vutshunguri ni lava pfukelaka Tiko. Magqweta lawa a ma ti sirhelela a ma veka ndhuma ni ntirho wa wona ekhombyeni.

Vamakwerhu lava nga ni xivindzi eka Ndzawulo ya swa le Nawini eUnited States va sirhelele Vakrestekulobye ehubyeni

John Burns, gqweta ra le rhavini ra Canada loyi a a pfuna vamakwerhu va le Georgia emalembeni wolawo u ri: “Vamakwerhu va kwalaho lava a va ri magqweta va tinyikerile. Ku nga khathariseki vuyelo lebyi a byi ta va kona eka mintirho  ya vona, a va nga chavi ku ya ehubyeni kutani va vula leswaku hi vona Timbhoni ta Yehovha.” Timbhoni toleto leti nga ni xivindzi ti hoxe xandla eku “lweleni ni le ku simekeni ka mahungu lamanene hi nawu.”—Filp. 1:7.

Vanhu Va Le Georgia Va Vula Xivilelo Xa Vona Hikwalaho Ka Madzolonga

Hi nkarhi wolowo, Timbhoni ti ye emahlweni ti khomiwa hi ndlela ya madzolonga. Hikokwalaho, eku sunguleni ka January 8, 2001, Timbhoni ti yise xivilelo leswaku ti sirheleriwa eka minhlaselo ya ntshungu wa vapfukeri ni le ka vanhu lava hlaselaka vaakatiko lava nga ni ku rhula.

Makwerhu Burns u hlamusela xikongomelo xa xivilelo xexo, u ri: “Xikongomelo xa hina a ku ri ku kombisa leswaku vanhu vo tala va le Georgia a va yimi na wona madzolonga yo tano lawa Timbhoni ta Yehovha ti kombisiwaka wona  ni leswaku ntlawa wutsongo wa vanhu va vukhongeri lava hisekelaka etlhelo hi wona wu nga ni vutihlamuleri emhakeni leyi.”

Hi mavhiki mambirhi ntsena, vanhu lavakulu va 133 375 lava humaka eswifundzheni swa Georgia—lava vo tala va vona a ku ri Maorthodox—va sayine xikombelo xexo. Hambileswi xikombelo xexo xi yisiweke eka Presidente Shevardnadze, madzolonga a ma helanga. Vanhu va vukhongeri lava hisekelaka etlhelo va ye emahlweni va hlasela Timbhoni.

Madzana ya vanhu va le Georgia va sayine xikombelo lexi solaka ku hlaseriwa ka Timbhoni

Hi nkarhi wolowo, Yehovha u ye emahlweni a katekisa vanhu vakwe. Hambi leswi vanhu va vukhongeri lava hisekelaka etlhelo a va karhata vanhu va Xikwembu, Yehovha Xikwembu a a ri karhi a humesa vanhu vo tala eka vukhongeri bya mavunwa.

Ku Huma Eka Vukhongeri Bya Mavunwa

Ku ringana vutomi byakwe hinkwabyo, Babilina Kharatishvili a a ri xirho xa Kereke ya Orthodox lexi tinyiketeleke. Loko a ri emalembeni ya va-30, a a famba hi doroba hi doroba ni hi swimitana ni swimitana, a dyondzisa vanhu malunghana ni ndlela leyi vakwetsimi va hanyaka ha yona.

Kambe Babilina a a lava ku tiva swo tala hi Xikwembu. Kutani u endle xiboho xo ya eka xikolo xo dyondzela vufundhisi eka Orthodox ya le Georgia. Siku rin’wana, mufundhisi u kombe vayingiseri vakwe buku leyi nge Ntiyiso Lowu Yisaka eVuton’wini Lebyi Nga Heriki kutani a va khutaza leswaku va ti kumela kopi eka Timbhoni ta Yehovha. U va byele a ku: “Buku leyi yi ta mi dyondzisa swo tala hi Bibele.”

Babilina swi n’wi hlamarisile. Minkarhi hinkwayo a a papalata Timbhoni kambe sweswi mufundhisi a a tsakisiwa hi tibuku ta tona! U tivutise a ku: ‘Loko ndzi fanele ndzi dyondza hi Xikwembu eka Timbhoni ta Yehovha, xana ndzi  endla yini laha?’ U hatle a tihlanganisa ni Timbhoni edorobeni ra Poti kutani a sungula ku dyondza Bibele.

Loko Babilina a dyondze swo tala eBibeleni, u endle ku cinca lokukulu evuton’wini byakwe. U kale a vula a ku: “Loko ndzi swi vone hi lawa ya ka mina leswi Bibele yi swi vulaka leswaku swi hoxile ku gandzela swifaniso, ndzi balekele mixaka hinkwayo ya vugandzeri bya swikwembu swa hava. A ndzi tiyiseka leswaku i nchumu wa nkoka lowu a ndzi wu endla.” Emalembeni yakwe ya va-70, u endle xiboho xo va Mbhoni ya Yehovha.

Babilina u dyondzele ntukulu wakwe wa nhwana ntiyiso, ku nga Izabela

Khombo ra kona, hi 2001, Babilina u vabyile kutani a fa a nga si khuvuriwa. Kambe ntukulu wakwe wa nhwana, Izabela, endzhakunyana u khuvuriwile naswona sweswi u tirhela Yehovha hi ku tshembeka.

A A Lava Ku Va Nani

Eliso Dzidzishvili a a ri ni malembe ya 28 loko a endla xiboho xo va nani. Leswi a ku ri hava yindlu ya tinani leyi a yi ri ekusuhi ni tiko ra rikwavo, eTkibuli, hi 2001 u rhurhele  eTbilisi. Loko a ri karhi a lavana ni yindlu ya tinani, a a tirha ntirho wa nkarhinyana, tanihi mudyondzisi. Un’wana wa vadyondzi vakwe ku kumeke leswaku a ku ri n’wana wa nhwanyana wa makwerhu wa xisati loyi a vuriwaka Nunu.

Eliso u ri: “Hakanyingi a hi vulavula hi Bibele. Ndzi yimelele vukhongeri bya Orthodox, loko Nunu a ri karhi a ndzi komba ndzimana hi ndzimana. Siku rin’wana u ndzi kombele leswaku hi hlaya broxara leyi nge I Yini Leswi Xikwembu Xi Swi Languteleke Eka Hina? Loko hi ri karhi hi hlaya tindzimana ni ku tlhela hi hlaya tindzimana ta le Bibeleni, ndzi xiye leswaku ku gandzela swifaniso swi lwisana ni xileriso xa Xikwembu.”

Endzhakunyana, Eliso u ye ekerekeni kutani a vutisa muprista swivutiso. Tinhlamulo takwe ti swi veke erivaleni leswaku tidyondzo ta kereke yakwe a ti nga sekeriwanga eBibeleni. (Mar. 7:7, 8) Leswi a a tiyiseka leswaku u kume ntiyiso, u hatlise a sungula ku dyondza Bibele ni Timbhoni ta Yehovha kutani a khuvuriwa.

Eliso Dzidzishvili (eximatsini), loyi a a lava ku va nani na Nunu Kopaliani (exineneni)

 Ku Akiwa Ka Tiholo Ta Mfumo Ku Nga Khathariseki Nkaneto

Hi 2001, nhlayo leyi andzaka ya mavandlha a yi lava tindhawu leti fanelekaka to hlangana swin’we eka tona leswaku ku gandzeriwa. Hi ku ya hi xiringaniso xin’wana, a ku laveka kwalomu ka 70 wa Tiholo ta Mfumo. Xisweswo, ku simekiwe tsima ro aka Tiholo ta Mfumo, ku nga khathariseki nkaneto lowu a wu ri kona etikweni.—Ezra 3:3.

Hi ku hatlisa, ntlawa wo aka wu sungule ku pfuxeta muako lowu a wu tirhisiwa hi mavandlha yo hlayanyana eTbilisi. Hi ku hatlisa ku landzele matsima mambirhi—rin’wana eTbilisi kasi rin’wana eChiatura, evupeladyambu bya Georgia.

Holo ya Mfumo eTbilisi (eximatsini) yi siviwe hi leyintshwa (exineneni)

Makwerhu Tamazi Khutsishvili, loyi a a tirha eka tsima rero eChiatura u tsundzuka swin’wana, u ri: “Siku ni siku a hi tirha endhawini yoleyo yo aka hi ri 15. Hi ku hatlisa vanhu hinkwavo edorobeni se a va swi tiva leswaku hi le ku akeni ka holo. Minkarhi yin’wana a hi twa mavarivari ya leswaku valala va hina va le ku teni leswaku va ta mbundzumuxa Holo ya Mfumo.”

Malunghana ni nxaniso wolowo, xana tsima leri ro aka a ri  ta humelela njhani? Tamazi u ri: “Hi ye emahlweni ni ntirho wa hina naswona hi hete ku aka Holo ya Mfumo hi tin’hweti tinharhu. Ku nga khathariseki minxungeto, ku hava ni mukaneti ni un’we loyi a teke.” *

Mpfuno Lowu A Wu Languteriwe Hi Mahlongati

Swirho swa ntlawa wa Orthodox ni murhangeri wa swona, Vasili Mkalavishvili, swi pfaleriwa ekhotsweni

Hi 2003, ku sunguriwe tsima ro aka edorobeni ra Samtredia. Nakambe, vanhu va vukhongeri lava hisekelaka etlhelo va xungete vamakwerhu va kwalaho. Entiyisweni, makhumbi se a ma akiwile naswona sava a ra ha tsakama loko vakaneti va fika kutani va mbundzumuxa muako.

Hambiswiritano, hi November 2003, ku antswisiwa loku veke kona eGeorgia ku endle leswaku vamakwerhu va ku  hefu! Ku cinca ka hulumendhe ku endle leswaku vukhongeri byo tala byi pfumeleriwa. Hikwalaho ka sweswo, swirho swo hlayanyana swa ntlawa wa Orthodox lowu hisekelaka etlhelo leswi hlaseleke Timbhoni ta Yehovha swi khotsiwile.

Vanhu Va Xikwembu Va Kuma Mikateko Yo Tala

Endzhakunyana ka loko nxaniso wu herile, Timbhoni ta Yehovha eGeorgia ti kume mikateko yo tala. Eka nhlengeletano ya xifundzha ya 2004, ku humesiwe Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi ririmi ra Xigeorgia.

Xiendlakalo xin’wana lexi nga rivalekiki xi endleke hi 2006, eka Nhlengeletano ya Xifundzha leyi a yi ri ni nhlokomhaka  leyi nge, “Nkutsulo Wu Tshinele!” Vapfhumba a va tsake ngopfu loko va twa leswaku Geoffrey Jackson, xirho xa Huvo leyi Fumaka hi yena loyi a nga ta ta. Nakambe ku ve ntsako swinene loko Makwerhu Jackson a tivisa hi ta ku humesiwa ka Vuhundzuluxeri Bya Misava Leyintshwa Bya Matsalwa Yo Kwetsima hi Xigeorgia!

Ku humesiwa ka Vuhundzuluxeri Bya Misava Leyintshwa hi Xigeorgia hi 2006

Hikwalaho ko tlangela, vapfhumba vo tala va rile mihloti ya ntsako. Makwerhu wa xisati u te: “A yi kona ndlela leyi ndzi nga wu hlamuselaka ha yona ntsako lowu ndzi veke na wona loko hi kuma Bibele leyi heleleke. . . . Hakunene a ku ri xiendlakalo ematin’wini.” Vanhu vo tlula 17 000 va tiphinile hi nhlengeletano leyi, laha ku veke nhlohlorhi ematin’wini ya vanhu va Xikwembu eGeorgia.

^ ndzim. 29 Ku sukela hi 2001 ku ya eka 2003, ku akiwe Tiholo ta Mfumo ta nkombo etikweni hinkwaro.