Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

Rhaxiya: Va ri karhi va chumayela mahungu lamanene eMoscow

 SWIENDLAKALONKULU SWA LEMBE LERI NGA HUNDZA

Xiviko Xa Timhaka Ta Nawu

Xiviko Xa Timhaka Ta Nawu

Ku Tsarisiwa Hi Nawu

A swi bohi leswaku Timbhoni ta Yehovha ti tsarisiwa hi nawu leswaku ti endla ntirho wa tona. Hambiswiritano, ku tsarisiwa hi nawu swi endla leswaku hi va ni ndhawu ya minhlangano ni ku tlhela hi kota ku rhumela minkandziyiso ya hina.

  • Hi 2004, tihuvo ta le Rhaxiya ti pfale vandla ra le nawini leri a ri tirhisiwa hi Timbhoni ta Yehovha eMoscow. Hikwalaho ka sweswo, vamakwerhu eMoscow va langutane ni rivengo lerikulu. Maphorisa a ma va xanisa, vanhu a va hlasela van’wana va vamakwerhu ensin’wini naswona vini va tindhawu leti a va hlanganyela eka tona va herise mintwanano leyi va veke na yona yo hirha ndhawu, leswi endleke leswaku va sala va ri hava ndhawu yo gandzela eka yona. Hi 2010, Huvo ya Matiko ya Yuropa ya Timfanelo ta Vanhu (European Court of Human Rights [ECHR]) yi teke xiboho xa leswaku tiko ra Rhaxiya a ri ti xiximanga timfanelo ta Timbhoni ta Yehovha  eMoscow naswona yi lerise leswaku ku vuyiseriwa vandla ra le nawini. Hi tsakela ku mi tivisa leswaku hi May 27, 2015, Ndzawulo ya Vululami ya le Rhaxiya yi tsarise Nhlangano wa Kwalaho lowuntshwa wa Vukhongeri wa Timbhoni ta Yehovha eMoscow..

Xibalo

Hakanyingi, mavandla lama tirhisiwaka hi Timbhoni ta Yehovha emisaveni hinkwayo a ma hakeli xibalo, hilaha swi nga hakona eka vukhongeri byo tala ni minhlangano leyi pfunaka vanhu lava pfumalaka. Hambiswiritano, minkarhi yin’wana, tihulumendhe ti lava leswaku hi hakela xibalo.

  • Le Sweden, valawuri va vula leswaku Bethele i bindzu leri “tholaka” vanhu va le Bethele ku nga ri nhlangano wa vukhongeri wa vatirheli lava nga entirhweni wa nkarhi hinkwawo. Hulumendhe yi kume ti-euro ta magidi eka muthori ni le ka lava thoriweke leti a ku ri xibalo lexi yi hakeriseke Bethele ni vatirhi va kwalaho. Leswaku ku lulamisiwa mhaka leyi, Timbhoni eSweden ti yise swikombelo swa tsevu eka ECHR.

Ku Nga Hlanganyeli Eka Tipolitiki Ni Ku Ala Ntirho Wa Vusocha

Malandza ya Yehovha ma xi tekela enhlokweni xileriso xa le Bibeleni xa ku ‘fula mabanga ya vona ma va swikomu ni ku nga dyondzi nyimpi.’ (Esa. 2:4) A ma yi enyimpini hambileswi tihulumendhe tin’wana ti alaka ku ma nyika ntirho lowu nga fambisaniki ni vusocha.

  • Sweswinyana, nawu wa le Korea Dzonga a wu yi tekeli enhlokweni mfanelo ya vanhu lava alaka ku ya enyimpini hileswi ripfalo ra vona ri nga va pfumeleriki. Eka malembe ya 60 lama nga hundza, Timbhoni to tlula 18 000 ta vavanuna ti khotsiwile hikwalaho ka leswi ti aleke ku ya evusocheni. Kwalomu ka Mbhoni yin’wana ni yin’wana etikweni yi langutane ni ku khotsiwa ka munghana kumbe xirho xa ndyangu wa yona. Hi 2004 na 2011, Huvo yo Endla Milawu ya le Korea Dzonga yi vule leswaku ku khotsiwa loku ku le nawini. Hambiswiritano, hi July 2015, Huvo yi tlhele yi kambisisa mhaka leyi hi vuenti. Timbhoni ta Yehovha emisaveni hinkwayo ti khongelela leswaku mhaka leyi, leyi ku nga khale yi ri kona yi tlhantlhiwa  leswaku vamakwerhu va le Korea Dzonga va nga ha khotsiwi hikwalaho ka ripfumelo ra vona.

  • Le Eritrea, Timbhoni tinharhu ta Yehovha ti sungule lembe ra tona ra vu-22 ti khotsiwile hikwalaho ka leswi ti aleke ku ya evusocheni. Paulos Eyassu, Negede Teklemariam na Isaac Mogos a va gweviwanga kumbe ku nyikiwa lunghelo ro tivulavulela eka huvo ya nawu. Vona swin’we ni vamakwerhu van’wana vo tlula 50, va hambeta va tshembekile ku nga khathariseki ku khomiwa hi ndlela yo vava ni swiyimo swo tika swa le khotsweni. Ha tiyiseka leswaku Yehovha u twa “nhlomulo” wa lava khotsiweke hikwalaho ka ripfumelo ra vona naswona u ta va ponisa.Ps. 79:11.

  • Le Ukraine, hi August 2014, Vitaliy Shalaiko u vitiwe leswaku a ta endla ntirho wa vusocha hi nkarhi wa ku hlengeletiwa ka mavuthu. Leswi ripfalo rakwe a ri nga n’wi pfumeleli, u wu arile kambe a kombisa ku navela kakwe leswaku u tiyimiserile ku endla ntirho lowu nga fambisaniki ni vusocha. Muchuchisi u hehle Makwerhu Shalaiko leswaku u baleke ku ya evusocheni kambe tihuvo a ti n’wi vonanga nandzu. Huvo ya swivilelo yi vule leswaku ku karhateka ka Hulumendhe ya vusirheleri a hi xivangelo xo va yi veka swipimelo eka timfanelo ta vanhu naswona “mfanelo eka vanhu lava nga hlanganyeliki enyimpini hileswi ripfalo ra vona ri nga va pfumeleriki a  yi nge siveriwi hikwalaho ka vusirheleri bya tiko.” Muchuchisi u tlhele a yisa xivilelo. Hi June 23, 2015, Huvo yo Hlawuleka leyi Tlakukeke ya le Ukraine ya Milandzu ya tiko ni ya Vugevenga yi seketele swiboho swa tihuvo letitsongo. Xisweswo yi tiyisekise leswaku mfanelo ya lava ripfalo ra vona ri nga va pfumeleriki leswaku va ya enyimpini ni ntirho lowu nga katsiki vusocha ya tirha ni le ka swiyimo swa xihatla swa tiko.

Ukraine: Vitaliy Shalaiko a ri karhi a tiphina hi ntirho wa nsimu

Ku nga khathariseki vuyelo byo tsakisa bya nandzu lowu, Makwerhu Shalaiko u ri: “Ndzi tiyise hi marito lama nga eka Yeremiya 1:19. A ndzi tiyimisele ku kuma vuyelo byin’wana ni byin’wana kambe xa nkoka swinene hileswaku a ndzi lava ku tshama ndzi tshembekile eka Yehovha. Ndza tiyiseka leswaku a nge pfuki a ndzi fularherile kambe u ta ndzi nyika matimba yo tshama ndzi tshembekile. Hambiswiritano, vuyelo lebyi a ndzi nga byi langutelanga. Tihuvo hinkwato tinharhu a ti ndzi vonanga nandzu. Eka milandzu leyi hinkwayo, vamakwerhu a va ri karhi va ndzi seketela. A ndzi nga si tshama ndzi titwa ndzi fularheriwile.”

Ku Nga Hlanganyeli Eka Tipolitiki Ni Minkhuvo Yo Seketela Tiko

Minkhuvo yo seketela tiko i xihinga xin’wana lexi karhataka Vakreste lava nga hlanganyeliki eka swa tipolitiki. Vantshwa va nga sindzisiwa leswaku va nga tshembeki eka Yehovha, tanihi leswi valawuri va swikolo va nga ringetaka ku sindzisa swichudeni ku yimbelela risimu ra rixaka kumbe ku losa mujeko.

  • EKarongi, le Xifundzheni xa Rwanda, valawuri va xikolo va hehle swichudeni swo hlaya leswi nga Timbhoni hi ku vula leswaku a swi xiximi risimu ra rixaka hikwalaho ka leswi swi aleke ku ri yimbelela. Swichudeni swoleswo swi hlongoriwile exikolweni hambi ku ri ku khotsiwa. Hi November 28, 2014, Huvo Leyitsongo ya le Karongi yi yime ni swichudeni kutani yi vula leswaku ku ala ka swona ku yimbelela risimu ra rixaka a swi nga vuli swona leswaku a swi xiximi. Ematikweni man’wana ya le Afrika, yo fana na Cameroon, Democratic Republic of Congo, Equatorial Guinea na Malawi, vantshwa lava nga Timbhoni va langutane ni mhaka leyi fanaka naswona eswiyin’weni  swin’wana, va hlongoriwile exikolweni. Vamakwerhu ematikweni lawa va endla matshalatshala yo tivisa valawuri va hulumendhe ni valawuri va swikolo malunghana ni ku va Timbhoni ta Yehovha ti nga hlanganyeli eka swa tipolitiki.

  • Honduras: Mirna Paz na Bessy Serrano va hetelele va nyikiwa tidiploma

    Hi December 2013, xikolo xin’wana xa le Lepaera, le Honduras, xi ale ku nyika swichudeni swimbirhi leswi nga Timbhoni ta Yehovha tidiploma hileswi swi aleke ku yimbelela risimu ra rixaka ni ku xixima mujeko wa tiko. Leswaku ku lulamisiwa xiphiqo lexi, magqweta mambirhi lama nga Timbhoni ta Yehovha ma hlangane ni muyimeri wa Holobye ya swa Tidyondzo naswona ma n’wi kombe minkongomiso ya nawu ya le matikweni man’wana lama seketelaka xiboho xa swichudeni leswi nga Timbhoni. Mutirhela mfumo a a ri ni musa naswona u pfumelele swichudeni swin’we ni vatswari va swona leswaku va tsala mhaka ya kona kutani va yisa eka mukongomisi wa swa nawu eka Ndzawulo ya Dyondzo eHonduras. Endzhaku ko kambisisa xivilelo xa vona, u humese xitiviso hi July 29, 2014, lexi a xi vula leswaku dyondzo “yi fanele yi kumiwa hi vanhu hinkwavo handle ka xihlawuhlawu” kutani a lerisa leswaku tidiploma ti fanele ti nyikiwa swichudeni leswi nga Timbhoni.

Hulumendhe Leyi Nga Ni Xihlawuhlawu

Tanihi Timbhoni ta Yehovha ematikweni hinkwawo, hi yingisa xileriso xa Yesu xo chumayela mahungu lamanene ya Mfumo eka  vaakelani va hina, ku hlengeletana swin’we ni vapfumerikulorhi leswaku hi gandzela ni ku dyondza Rito ra Xikwembu nkarhi ni nkarhi. Nakambe hi xi tekelela enhlokweni xileriso xa le Bibeleni xo dyondzisa vana va hina milawu ya Yehovha ni ku “papalata . . . ngati.” (Mint. 15:20; Det. 6:5-7) Minkarhi yin’wana, ku yingisa ka hina milawu leyi swi endla leswaku hi lwisana ni valawuri va hulumendhe lava nga xi twisisiki xiyimo xa hina.

  • Exifundzheni xin’wana xa le Florida, le U.S.A., muavanyisi wa kwalaho u nyike manana loyi a nga riki Mbhoni mfanelo ya leswaku a kongomisa vana vakwe vanharhu eka timhaka ta vukhongeri. Tatana wa kona loyi a ri Mbhoni u nyikiwe xileriso xa leswaku a nga nyiki vuleteri bya vukhongeri lebyi a byi lwisana ni tidyondzo ta Khatoliki. U endle xivilelo eka xiboho lexi huvo yo tenga milandzu yi xi tekeke naswona hi August 18, 2014, huvo yo endla xivilelo a yi yimanga na swona swipimelo swa huvo yo tenga milandzu. Leswi a yi tiyiseka hi xiboho xa yona, huvo yi tsale yi ku: “Swipimelo malunghana ni mfanelo ya mutswari loyi a nga fanelangiki a tshama ni vana vakwe ku va a va dyondzisa tidyondzo ta vukhongeri byakwe swi hoxile loko ku nga ri na vumbhoni lebyi nga erivaleni bya leswaku tidyondzo ta vukhongeri bya kona ti nga va ni khombo eka vana.”

    Xiboho xexo xi nyika vana mfanelo ya leswaku va tirhisa swiletelo ni nkongomiso lowu vuyerisaka wa Yehovha Xikwembu handle ka swipimelo. Hinkwavo ka vona va endla nhluvuko hi tlhelo ra moya eka vandlha ra kwalaho leri va nga eka rona. Tatana wa kona u te: “Ku tiyisela xiyimo lexi swi ndzi pfunile. Endzhakunyana, ndzi langutane ni miringo, kambe Yehovha u ndzi pfunile leswaku ndzi yima ndzi tiyile! Ndza swi tiva leswaku loko hi hlawula ku tirhela Yehovha, hi va hi tiyimisele ku xanisiwa.”

  • Namibia: Efigenia Semente a ri ni vana vakwe vanharhu

    Makwerhu Efigenia Semente, manana wa vana vanharhu eNamibia, u langutane ni xiyimo lexi ringeke ku tshembeka kakwe. Loko a ri exibedlhele leswaku a ta kuma n’wana wa vunharhu, ku ve ni xiphiqo naswona vaongori van’wana ku katsa ni ndyangu wakwe lowu nga riki Timbhoni wu kume mpfumelelo eka huvo ku n’wi sindzisa leswaku a pomperiwa ngati. Makwerhu Semente u arile ku pomperiwa naswona u ye eka va nawu leswaku a ta sirhelela mfanelo yakwe yo hlawula vutshunguri lebyi a byi lavaka. Hi June 24,  2015, Huvo leyi Tlakukeke ya Vuavanyisi ya le Namibia yi yime ni timfanelo ta Makwerhu Semente, yi vula leswaku “mfanelo yo hlawula leswi faneleke kumbe leswi nga fanelangiki swi endliwa eka miri wa munhu, i xiboho xa munhu yoloye.” Makwerhu Semente u ri: “Yehovha u hi pfunile ku tlula rini na rini. Swa tsakisa ku va xiphemu xa nhlengeletano leyi ya vamakwerhu. Hakunene Yehovha wa hi khathalela.”

  • Timbhoni eSwitzerland ti tsakela ku chumayela etindhawini ta mani na mani eswitarateni leswi nga emadorobeni lamakulu. Hambiswiritano, doroba ra Geneva ri nyikiwe mpfumelelo wo yirisa ku tirhisiwa ka “swigolonyana leswi hangalasaka rungula ra vukhongeri etindhawini ta mani na mani.” Timbhoni ti yise xivilelo eka huvo, ti vula leswaku ku yirisiwa ka ku hangalasa rungula ra vukhongeri hi ku tirhisa xigolonyana “swi lwisana ni ntshunxeko wa vukhongeri.” Huvo yi pfumerile naswona Timbhoni ti swi kotile ku tirhisana ni valawuri va kwalaho leswaku ku simekiwa ndhawu leyi faneleke ni nkarhi wo chumayela hi xigolonyana.

  • Valawuri va hulumendhe ya le Azerbaijan va endle matshalatshala lama engetelekeke ya ku herisa ntirho wa Timbhoni ta Yehovha. Nkarhi ni nkarhi Holobye wa Vusirheleri bya Tiko u vitana  Timbhoni leswaku ti ta konanisiwa. Nakambe holobye loyi u ya emakaya ya Timbhoni a ya secha minkandziyiso leyi Hulumendhe yi nga nyikangiki mpfumelelo wa leswaku yi rhumeriwa. Vanhu va le matikweni yo hambanahambana va hlamarile loko hi February 2015 tinhlori ta Holobye wa Vusirheleri bya Tiko ti khoma Timbhoni timbirhi, ku nga Irina Zakharchenko na Valida Jabrayilova, hikwalaho ko chumayela vaakelani va vona rungula ra le Bibeleni. Hambileswi ndlela leyi ti khomiweke ha yona yi hi tiseleke gome, ha tsaka leswaku vahuweleri va le Azerbaijan va hambete va hiseka naswona va kombisa xivindzi eku chumayeleni ka ‘mahungu lamanene ya Mfumo’ eka vaakelani va vona.Mat. 24:14.

  • Timbhoni ta Yehovha eRhaxiya ti langutana ni nxaniso lowukulu lowu humaka eka hulumendhe hikwalaho ka leswi yi nghenelelaka eka ntirho wa tona wa vukhongeri. Ku fikela ninamuntlha, Hulumendhe ya le Rhaxiya yi vule leswaku minkandziyiso ya 80 ya Timbhoni ta Yehovha yi ni khombo. Leswi swi vula leswaku ku fambisa kumbe ku va ni tikopi ta minkandziyiso yin’wana ni yin’wana leyi ku vuriwaka leswaku yi ni khombo, yo fana ni leyi nge Buku Yanga Ya Timhaka Ta Bibele a swi le nawini. Ku engetela kwalaho, hi December 2014, Huvo leyi Tlakukeke ya Vuavanyisi ya le Rhaxiya yi vule leswaku website ya hina ya jw.org, yi ni khombo. Tindhawu hinkwato leti nga na Internet eRhaxiya ti endle leswaku swi nga koteki ku nghena eka jw.org, ni ku vula leswaku website leyi a yi le nawini. Ku sukela hi March 2015, valawuri a va pfumelanga leswaku minkandziyiso ya Timbhoni yi nghena etikweni, hambi ku ri Tibibele ni minkandziyiso leyi eku sunguleni tihuvo ta le Rhaxiya ti yi kambisiseke kutani ti vula leswaku a yi na khombo.

Timhaka ta nawu ti ya emahlweni edorobeni ra Taganrog, laha valawuri va nga hehla vahuweleri va 16 hi vugevenga bya ku hlela ni ku hlanganyela eka minhlangano ya vukhongeri. Edorobeni ra Samara, valawuri va kume mpfumelelo eka huvo wo herisa vandla ra hina ra le nawini hileswi ku vuriwaka leswaku ri ni khombo. Ku nga khathariseki miringo yoleyo yo tala, vamakwerhu eRhaxiya a va tiyimisele ku tlherisela “swilo swa Xikwembu eka Xikwembu,” ku nga ri ku nghenelela eka mhaka yoleyo.Mat. 22:21