Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

Canada: Ximutana lexi ku vulavuriwaka Xiinuit eKangirsuk, le n’walungu wa Quebec

 SWIENDLAKALONKULU SWA LEMBE LERI NGA HUNDZA

Swiviko—Leswi Humaka eMatikweni Man’wana

Swiviko—Leswi Humaka eMatikweni Man’wana

Ku Fikelela Vanhu Hinkwavo eCanada

Vhidiyo leyi nge Ha Yini U Fanele U Dyondza Bibele? yi hundzuluxeriwe hi tindzimi ta nhungu leti vulavuriwaka eCanada leswaku ku ta fikeleriwa swilaveko swa nsimu ya rhavi rolero. Eka tsima ra masiku ya khume ro chumayela eNunavik Arctic leri veke kona hi October 2014, vhidiyo leyi yi kombisiwe hi Xiinuktitut eka n’wini un’wana ni un’wana wa muti etindhawini ta 14, leti hi ku angarhela ku tshamaka vanhu vo tlula 12 000.

Mininjhere A A Tsakile

Hi September 2014, nhlengeletano ya matiko yo hambanahambana ya le Seoul a yi khomeriwe eXitediyamu xa  Khapu ya Misava xa Sangam, le Korea Dzonga. Vanhu vo tlula 56 000 lava a va ri kona va tiphinile hi nongonoko wolowo. Mininjhere wa xitediyamu u kombise ku tlangela kakwe mahanyelo lamanene ni ntirhisano lowu Timbhoni ti veke na wona hi nkarhi wa xiendlakalo. U te: “Hinkwato a ti ri ni mahanyelo lamanene. Swi ndzi hlamarisile ku tivona ti ri karhi ti basisa xitediyamu ku tlula vanhu lava nga ni ntokoto lava hi va hirheke ku hi basisela. Ndzi navela onge vatirhi va hina va nga va ni moya lowu fanaka loko va ri karhi va endla ntirho. Leswaku vukhongeri bya hina byi va lebyinene, hi fanele hi ringeta ku fana ni Timbhoni ta Yehovha.”

Korea Dzonga: Nhlengeletano ya matiko yo hambanahambana ya 2014 eSeoul

Yehovha U Hi Nyike Ndzetelo Lowu Lavekaka

Hi May 2012, hulumendhe ya le Sweden yi ale xikombelo xa Timbhoni ta Yehovha xo kuma vukorhokeri lebyi a byi  nyikiwa minhlangano yin’wana ya vukhongeri. Huvo leyi Fumaka yi nyike mpfumelelo wo yisa xivilelo eka Huvo leyi Tlakukeke ya Vulawuri.

Huvo yi teke xiboho xo kambisisa mhaka leyi yi nga si endla xiboho. Vamakwerhu vo hlayanyana vo huma ematikweni yo hambanahambana va hlanganile ku vona leswaku va nga swi hlamula njhani swivutiso leswi nga ta vutisiwa ehubyeni. Leswi a va ta swi endla eHolweni ya Mfumo eStockholm.

Hi nkarhi lowu a va kambisisa swivutiso, ku gongondziwe eholweni. Makwerhu u pfule rivanti kutani ku humelela swinhwanyetana swimbirhi, leswi nga ni malembe ya 13 na 14, kutani swi titivisa. Swi vule leswaku swi lava ku vutisa swivutiso malunghana ni Timbhoni ta Yehovha. Makwerhu u ri: “A ndzi lava ku swi byela leswaku swi vuya siku rin’wana tanihi leswi a hi khomekile naswona a hi nga lavi ku kavanyetiwa.”

Nilokoswiritano, makwerhu u endle xiboho xo vulavula na swona. Swinhwanyetana sweswo a swi ri ni swivutiso swo tala, leswi swin’wana swa swona a swi ri malunghana ni timhaka leti khumbaka vanhu ni ku vhota. Endzhaku, makwerhu u vuyele eka vamakwerhu hinkwavo kutani a va byela swivutiso leswi swinhwanyetana sweswo a swi n’wi vutisa swona ni ndlela leyi a swi hlamuleke ha yona.

Eka siku leri landzelaka, vamakwerhu va hlamarile loko Huvo yi va vutisa swivutiso swo fana ni leswi swinhwanyetana sweswo a swi va vutise swona. Makwerhu loyi a yimelaka nhlengeletano u ri: “A ndzi nga chuhanga hambileswi a ndzi ta va ndzi chuhile hikwalaho ka leswi a ndzi yime emahlweni ka magqweta ya xiyimo xa le henhla ya le tikweni. Kambe ndzi swi vonile leswaku Yehovha u na hina hi ku hi nyika ndzetelo ka ha sale siku leswaku hi ya tenga.”

Huvo yi yime na hina naswona nandzu wu tlheriseriwe eka hulumendhe leswaku yi ya teka xiboho lexintshwa.

 Rhayisi Leyi Ken A Nyikeleke Ha Yona

Ken, loyi a nga ni malembe ya tsevu, u tshama eHaiti. A a tsakile loko a twa leswaku vandlha ra ka vona a ri ta akeriwa Holo ya Mfumo. U endle xiboho xo endla bokisi ra minyikelo exihundleni kutani a ri tumbeta ekamareni rakwe. Ematshan’weni yo dya mali leyi vatswari vakwe a va n’wi nyika yona leswaku a dya exikolweni, a a yi hoxa ebokisini rakwe. U endle leswi hi ku tshembeka kukondza ntlawa wo aka wu fika leswaku wu ta sungula ntirho. Kutani u va nyike bokisi rakwe, leri a ri ri ni mali leyi eneleke yo xava bege leyikulu ya rhayisi. Ku ringana masiku yo tala, rhayisi leyi Ken a nyikeleke ha yona a yi phameriwa vanhu lava a va tirha kwalaho eka swakudya swa ninhlikanhi.

Swileriso Leswi Humaka Eka Ndhuna

Eka lembe leri nga hundza, a swi ri swa nkoka ku kuma mpfumelelo wo nghena emigangeni ya le Sierra Leone leyi a yi pfariwile hikwalaho ka vuvabyi bya Ebola. Hi xikombiso, valanguteri va miganga a va fanele va kuma tibeji ni maphepha yo pfumelela timovha leswaku ti nghena emigangeni yoleyo, swin’we ni ya lava rhumelaka minkandziyiso ni mapapila. Swirho swa Komiti ya Mphalalo a swi fanele swi tisa michini yo pima ku hisa, murhi wo tengisa mati ni swakudya. Lexi hlamarisaka, maphepha lawa a ma laveka a ma kumeka nkarhi ni nkarhi.

Ku ni ntokoto wun’wana lowu a wu tiyisa ripfumelo. Vamakwerhu va yise xikombelo xa tibeji ta 34 ni maphepha ya 11 yo pfumelela timovha leswaku ti nghena emigangeni yoleyo kambe a va fanele va hlangana ni ndhuna ya vuthu leswaku va nyikiwa mpfumelelo. Vamakwerhu vambirhi lava humaka erhavini va hlangane ni ndhuna hi siku leri a va lava ku teka tibeji ni maphepha ya mpfumelelo. Kambe xikombelo xa vona a xi kumekanga. Vamakwerhu va komberiwe ku xi lava hi voxe eka nhulu ya swikombelo leswi a swi ri kwalaho kambe a va xi kumanga. Hi nkarhi wolowo, ndhuna  yi byele matsalana wa yona leswaku se yi pfala hofisi ya yona nileswaku ku hava swikombelo leswi a swi ta kambisisiwa kukondza ku hundza mavhiki mambirhi. Vamakwerhu va khongelele embilwini hi timbilu ta vona hinkwato leswaku Yehovha a va pfuna emhakeni leyi. Kutani ndhuna yi langute vamakwerhu ivi yi va vutisa yi ku, “Xana mi lava tibeji ni maphepha mangani?” Loko va yi byela nhlayo, yi suke exitulwini kutani yi huwelela yi ku, “Swi tele swilo leswi mi swi kombelaka!”

Vamakwerhu va yi hlamusele nkoka wa ntirho wa vona ni ndlela leyi swilo swo phalala a swi va pfuna ha yona leswaku va langutana ni vuvabyi bya Ebola. Ndhuna yi yimenyana, ivi yi languta matsalana wa yona kutani yi ku: “Va nyike hinkwaswo leswi va swi lavaka.”

Guinea na Sierra Leone: Ku sunguriwe swiletelo swo hlamba mavoko eTiholweni ta Mfumo leswaku ku papalatiwa vuvabyi