Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

Tanzania: Vahundzi va ndlela va ri karhi va kombisa ku tsakela minkandziyiso leyi nga eka swigolonyana eDar es Salaam

 SWIENDLAKALONKULU SWA LEMBE LERI NGA HUNDZA

Ku Fikelela Vanhu Lava Nga Kumekiki eKaya

Ku Fikelela Vanhu Lava Nga Kumekiki eKaya

LESWI ntirho wo chumayela hi yindlu ni yindlu wu hambetaka wu va ndlela ya nkoka leyi Timbhoni ta Yehovha ti yi tirhisaka leswaku ti dyondzisa ntiyiso wa Bibele, ku tirhisiwa ka matafula ni swigolonyana swa minkandziyiso swi tikomba ku ri ndlela yin’wana leyi humelelaka yo chumayela mahungu lamanene ya Mfumo wa Xikwembu. (Mat. 24:14) Vachumayeri va Mfumo va tirhise switende, matafula ni swiyindlwana ku fikelela vanhu etindhawini ta mani na mani. Ku engetela kwalaho, mavandlha emisaveni hinkwayo ma rhumeriwe swigolonyana swa kwalomu ka 250 000. Xana vanhu va angule hi ndlela yihi?

EDar es Salaam, le Tanzania, vanhu va kwalomu ka 700 va kombele ku dyondzeriwa Bibele ku sukela loko ku sungule tsima ro hlawuleka ro chumayela etindhawini ta mani na  mani emadorobeni lamakulu hi 2014. Vanhu vo tala lava tsakelaka va va kona eminhlanganweni naswona va hambeta va va ni vuxaka ni Xikwembu. Hi lembe rin’we ntsena, vanhu lava humaka eAfrika ni le matikweni ya le handle, va teke minkandziyiso yo tlula 250 000 eka swigolonyana swa minkandziyiso.

ESwihlaleni swa Solomon, ku ni vahuweleri lava nga ehansi ka 2 000 lava chumayelaka eka nsimu leyikulu leyi nga ni swihlala swo tlula 300, tsima ro hlawuleka ro chumayela emadorobeni lamakulu ri ve ndlela ya nkoka yo chumayela. Entsindza wa le dorobeni ra Honiara, vamakwerhu va fambise timagazini to tlula 104 000 swin’we ni tibroxara to tlula 23 600 eka vanhu lava humaka eswihlaleni ni le swimitanini leswi nga riki ni Timbhoni. Hi ndzhenga wun’we ntsena, va fambise tikopi ta 400 ta buku leyi nge Xana Bibele Yi Dyondzisa Yini Hakunene? naswona vanhu va 60 va kombele ku dyondzeriwa Bibele.

Siku rin’wana nimixo, Michael na Linda ku nga maphayona ya nkarhi hinkwawo a va ri karhi va lunghiselela ku veka xigolonyana xa minkandziyiso ekusuhi ni ribuwa eXihlaleni xa Margarita, eVenezuela. Wanuna loyi vito rakwe ku nga Aníbal u ye eka xigolonyana kutani a teka buku leyi nge Leswi Bibele Yi Swi Dyondzisaka. U va byele leswaku tata wakwe u fele eka ribuwa rero eka malembe ya nkombo lama nga hundza naswona ku sukela kwalaho mana wakwe u ve ni ntshikilelo wa mianakanyo. Eka vhiki leri landzelaka, Aníbal u vuyile kutani a byela Michael na Linda leswaku leri a ku ri siku leri tata wakwe a nga fa ha rona. U fonele mana wakwe kutani a kombela Michael leswaku a n’wi chavelela naswona Michael u endle tano. Ku sukela kwalaho, a a tshamela ku fonela Michael na Linda naswona a va burisana na yena hi matsalwa  lama chavelelaka. Eka rungula rin’wana leri a ri tsaleke, mana wa Aníbal u te: “Namuntlha ndzi titwa ndzi antswa swinene hikuva mi ndzi chavelerile ni ku ndzi pfuna leswaku ndzi tiyisa ripfumelo ra mina.”

Tsima ro hlawuleka ro chumayela etindhawini ta mani na mani emadorobeni lamakulu a ri hleriwe etindhawini ta 127 emadorobeni ya 14 eUnited States. Eka tin’hweti to sungula ta nkombo eka lembe ra ntirho ra 2015, ku sunguriwe tidyondzo ta Bibele ta 8 445! Nakambe ndlela leyi yo chumayela yi ve leyinene eku pfuneni ka vanhu vo tala lava a va hlanganyela leswaku va tlhelela eka vugandzeri bya ntiyiso. Hi xikombiso, wanuna loyi vito rakwe ku nga Terry a a ri karhi a languta man’wana ya matafula ya hina ya minkandziyiso eLos Angeles, le California, kutani mpatswa lowu nga Timbhoni lowu a wu ri etafuleni rero wu n’wi vutisile loko a tshame a hlaya minkandziyiso ya hina. U vule leswaku i Mbhoni ya Yehovha naswona u ni malembe ya mune a horile. Mpatswa wolowo wu n’wi hlayele Ezekiyele 34:11 wu tlhela wu bula na yena hi yona, laha Yehovha a vulaka a ku: “Ndzi ta lavisisa tinyimpfu ta mina, ndzi ti langutela.” Wu n’wi byele hi website ya hina swin’we na hi JW Broadcasting. Eka mixo lowu landzelaka, Terry u rhumele makwerhu e-mail, a hlamusela leswaku emahlweni ko va a vona tafula ro veka minkandziyiso a a ri karhi a kombela Xikwembu leswaku xi n’wi rivalela hileswi a honisaka ku ya eminhlanganweni ya vandlha. Nakambe u kombele leswaku a n’wi pfuna a va ni vuxaka na Yehovha. Terry u te: “Kutani u ndzi xewete hi ndlela ya rirhandzu. U ndzi hlayele tsalwa leri ndzi chaveleleke naswona u ndzi nyike rungula leri a ndzi ri lava leswaku ndzi tlhelela enhlengeletanweni ya Yehovha. Yoleyo a ku ri nhlamulo ya xikhongelo xa mina.”

Ku ni tindhawu ta mune ta matsima yo hlawuleka yo chumayela etindhawini ta mani na mani emadorobeni eAddis Ababa, le Ethiopia. Hi tin’hweti tinharhu, vamakwerhu va fambise minkandziyiso ya 37 275 naswona vanhu va 629 va kombele Timbhoni leswaku ti va endzela. Exikarhi ka vanhu vo  tala lava tekeke buku leyi nge Leswi Bibele Yi Swi Dyondzisaka, i wanuna un’wana loyi a dyuhaleke loyi hi ku hatlisa a sunguleke ku yi hlaya. Enkarhini lowu nga hundza a ye exikolweni xa vufundhisi naswona a ri ni swivutiso malunghana na Yesu ni hi Mfumo wa Xikwembu. Kutani hi siku leri landzelaka, u tlhelele etafuleni ra minkandziyiso leswaku a ta kuma  tinhlamulo ta swivutiso swakwe. U pfumele ku dyondzeriwa Bibele naswona loko vhiki ri hela u ye eminhlanganweni ro sungula. Sweswi u ya eminhlanganweni ya hina nkarhi na nkarhi naswona u le ku endleni ka nhluvuko lowunene.

Ethiopia: Minkandziyiso ya Xiamharic leyi nga exigolonyanini eAddis Ababa

Wanuna wa Muyuda u ye exigolonyanini xa minkandziyiso eMexico kutani a vutisa vamakwerhu vambirhi loko va ri ni nkandziyiso lowu vulavulaka hi rifu. Va n’wi byele leswaku va heleriwe hi minkandziyiso leyi vulavulaka hi rifu, kambe va n’wi nyike lowu vulavulaka hi vumundzuku. Wanuna yoloye u khome voko ra makwerhu kutani a ku: “A ndzi na mhaka hi vumundzuku. Lexi ndzi xi lavaka i ku tidlaya.” Kutani a sungula ku rila. Vamakwerhu va n’wi vutisile leswaku ha yini a titwa hi ndlela yoleyo. U mpfikurile a ku: “Ndzi feriwe hi n’wana wa mina wa jaha.” Kutani va n’wi kombe ndzima 7 ya buku leyi nge Leswi Bibele Yi Swi Dyondzisaka. Va n’wi hlayele tindzimana timbirhi to sungula leti nga ehansi ka xihlokwana lexi nge “Loko U Feriwa Hi Loyi U N’wi Rhandzaka” swin’we ni le makumu ka ndzima, laha ntshembo hi vafi wu hlamuseriwaka. Leswi a tsakile, u tlhele a khoma voko ra makwerhu kutani a vutisa a ku: “Xana hakunene sweswo i ntiyiso?” Vamakwerhu va n’wi tiyisekisile leswaku Yehovha u ta xi hetisisa xitshembiso xexo. U vutise a ku: “Ndzi fanele ndzi endla yini leswaku ndzi ta tlhela ndzi vona n’wana wa mina?” Kutani va hlele ku endzela wanuna yoloye ekaya rakwe. Loko va fika ekaya rakwe, a swi langutele hi mahlongati ku sungula ku dyondza Bibele.

Mulanguteri un’wana wa muganga loyi a pfuneteke ku hlela tsima ro hlawuleka ro chumayela etindhawini ta mani na mani eNew York u te: “Hakunene Yehovha u ri katekisile tsima leri! Ku nga ri ntsena hileswi ri tikombiseke ri ri ndlela leyi humelelaka yo fikelela vanhu va makume ya magidi, kambe ri tlheleke ri endla leswaku hi hlangana ni vanhu vo tala lava holeke kumbe lava susiweke—‘tinyimpfu leti lahlekeke’—leti sweswi ti pfuniweke leswaku ti tlhelela entlhambini.”Ezekiyele 34:15, 16.