Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

 SWIENDLAKALONKULU SWA LEMBE LERI NGA HUNDZA

“Ha Yi Rhandza Swinene JW Broadcasting!”

“Ha Yi Rhandza Swinene JW Broadcasting!”

HI October 6, 2014, ku hleriwe xitichi xa ririmi ra Xinghezi xa le ka Internet lexi vuriwaka JW Broadcasting. * Ku sukela hi August 2015, minongonoko ya yona yi hundzuluxeriwe hi tindzimi to tlula 70 leswaku vamakwerhu vo tala va ta tiphina hi minongonoko leyi khutazaka hi tlhelo ra moya. Vahlaleri vo tala va le misaveni hinkwayo va kombise ku tlangela ka vona lunghiselelo leri, lerintshwa ro tsakisa. Kambe xana a ku katseka yini leswaku ku lunghiseleriwa JW Broadcasting?

A ku fanele ku kumiwa ndhawu leyi eneleke. Entsindza wa misava hinkwayo wa Timbhoni ta Yehovha le  Brooklyn, New York, ku kumiwe ndhawu ya kahle leyi nga emuakweni lowu nga eka 30 Columbia Heights. Hi vhiki ntsena, ndhawu yoleyo yi basisiwile naswona Ndzawulo yo Lunghisa yi sungule ku lunghiselela ndhawu yo veka ti thelevhixini loko hi hala tlhelo ntlawa wo mpfampfarhuta wu ri karhi wu aka ndhawu yo xiximeka ya manguva lawa. Vamakwerhu vo tala lava humaka eUnited States va tirhe masiku lama engetelekeke va ri karhi va mpfampfarhuta ndhawu yo haxela eka yona ni ku vona ndlela leyi va nga yi akaka ha yona hi ku hatlisa. Ndzavisiso lowu hakanyingi wu tekaka tin’hweti wu endliwe hi masiku naswona hi ku hatlisa Ndzawulo yo Xava Nhundzu yi xave swilo swa madzana.

Ku nghenisiwe tintambu to tala ta gezi naswona ntlawa wolowo a wu fanele wu tiyiseka leswaku swilo hinkwaswo swi tirha kahle. Hi hala tlhelo, ntlawa wa hina wa vuyimbeleri a wu rhekhoda vuyimbeleri lebyi tlangaka loko nongonoko wu sungula etindhawini ta hina to rhekhodela eka tona ePatterson hi ku pfuniwa hi vamakwerhu lava humaka ematikweni yo hambanahambana lava telaka ku rhekhoda swilo leswi rhekhodiwaka nkarhi na nkarhi. A ku tsariwa swikripi, rungula leri munhu a vulavulaka a ri yexe naswona mintlawa leyi tirhaka eka ndzawulo yo rhekhoda eBrooklyn, Patterson, Wallkill ni le matikweni man’wana emisaveni hinkwayo yi tirhe hi matimba leswaku ku humesiwa vhidiyo. Loko ndhawu yo haxela eka yona yi herile, ku nghenisiwe switirhisiwa naswona ku sunguriwe malunghiselelo yo endla rungula leri a ri ta haxiwa eka tin’hweti to sungula.

Ndhawu leyi JW Broadcasting yi rhekhoderiwaka eka yona eBrooklyn, le New York

Loko hi vutisa munhu loyi a tivaka ntirho lowu  leswaku a swi ta teka nkarhi wo tanihi kwihi leswaku hi heta ndhawu yo fana ni leyi yo haxela eka yona, u vule leswaku a swi ta teka lembe ni hafu. Vamakwerhu lava tirhaka hi matimba va wu hete hi tin’hweti timbirhi!

Vuyelo bya kona byi ve lebyi khutazaka! Nongonoko wa n’hweti yin’wana ni yin’wana lowu haxiwaka hi Musumbhunuku wo sungula wa n’hweti, wu hlaleriwa minkarhi leyi tlulaka timiliyoni timbirhi hi n’hweti yoleyo. Ku katsa ni tivhidiyo hinkwato, nongonoko lowu wu hlaleriwa minkarhi yo tlula timiliyoni ta khume hi n’hweti.

“Nongonoko lowu wu endle leswaku ndzi va ekusuhi ni nhlengeletano ya Yehovha swin’we ni Huvo leyi Fumaka. Ndza swi tiva leswaku ndzi xiphemu xa ndyangu lowu kombisanaka rirhandzu swinene.”—Kenya

Xana vanhu va Yehovha va titwa njhani hi lunghiselelo leri, lerintshwa ra moya? Hi lawa marito ma nga ri mangani ntsena eka yo tala yo kombisa ku tlangela:

  • “Lawa hi man’wana ya madyambu yo tsakisa evuton’wini bya mina! Madyambu lawa, mina ni nsati wa mina hi hlalele nongonoko wa May 2015 naswona a ndzi swi koti ku hlamusela ndlela leyi a ndzi tsake ha yona. Nongonoko lowu hi wun’wana wa tinyiko ta nkoka swinene leti ndzi nga si tshamaka ndzi ti kuma eka Yehovha. Hi nkhensa Huvo leyi Fumaka swin’we ni vamakwerhu hinkwavo lava tirheke hi matimba eka lunghiselelo leri ro tsakisa ra moya.”—Indonesia.

  • “Ku fikela sweswi, vamakwerhu vo tala a va nga si tshama va twa xirho xa Huvo leyi Fumaka xi nyikela nkulumo. Sweswi, a va va twi va vulavula ntsena kambe  va tlhela va va vona. A hi nga si tshama hi titwa hi ri ekusuhi ni Huvo leyi Fumaka swin’we ni vamakwerhu emisaveni hinkwayo hi ndlela leyi”—Kenya.

  • “Hikwalaho ka leswi nuna wa mina a nga riki Mbhoni, swa ndzi tikela ku khoma vugandzeri bya ndyangu ni vana va mina vambirhi lava ha riki vantshwa. Kutani, minongonoko leyi yi ndzi pfunile swinene. Yi endla ndzi titwa ndzi ri xiphemu xa nhlengeletano naswona yi endla leswaku mina ni vana va mina hi khutazeka. Hakunene lowu i nkateko lowu humaka eka Yehovha.”—Britain.

  • “Ha yi rhandza swinene JW Broadcasting! Nakambe swikhongelo swa hina swi hlamuriwile loko nongonoko lowu se wu kumeka hi tindzimi tin’wana. Ha khutazeka vamakwerhu loko hi vona ntsako wa n’wina swin’we ni musa lowu mi wu kombisaka eka vugandzeri bya Yehovha. Ku sukela loko ku sungule nongonoko wa hina wa le ka TV, hi titwa hi ri swirho swa nhlengeletano ya Yehovha yo tsakisa ni ku hlamarisa leyi nga si tshamaka yi va kona.”—Czech Republic.

  • “Ku yingisela swirho swa Huvo leyi Fumaka hi ririmi ra manana swi tiyise vuxaka bya mina na Yehovha.”—Brazil.

  • “Ndzi ni malembe ya 16 ndzi ri karhi ndzi tirhela Yehovha, kambe ntsako lowu ndzi nga na wona namuntlha ndzi nga wu fanisa ni lowu ndzi veke na wona loko ndzi khuvuriwa. Ndza nkhensa, vamakwerhu lava rhandzekaka, ku hi endlela JW Broadcasting”—Brazil.

Hi ku pfuniwa hi Yehovha, hi tshemba leswaku JW Broadcasting yi ta hambeta yi pfuna vamakwerhu emisaveni hinkwayo hi tlhelo ra moya naswona yi ta yisa ku dzuneka ni ku tlhela yi kwetsimisa Yehovha.

^ ndzim. 3 U nga hlalela JW Broadcasting loko u nghena eka tv.jw.org.