Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

Papila Leri Humaka Eka Huvo Leyi Fumaka

Papila Leri Humaka Eka Huvo Leyi Fumaka

Eka Vamakwerhu:

Hi ku titsongahata muprofeta Esaya u swi xiyile leswaku ku humelela kun’wana ni kun’wana swin’we ni rifuwo leri Mfumo wa Yuda a wu tiphina hi rona a ku ri hikwalaho ka nkateko wa Yehovha. Esaya 26:12 yi ri: “Oho Yehovha, . . . u hi endlele mintirho hinkwayo ya hina.” Loko hi anakanyisisa hi swilo hinkwaswo leswi hetisisiweke eka lembe ra ntirho leri nga hundza swi hi endla hi vula marito lama fanaka. Hakunene Yehovha u le ku endleni ka ‘swilo swo hlamarisa leswi nga si tshamaka swi endliwa’! (Eks. 34:10) Anakanyisisa hi yin’wana ya mikateko leyi a hi nyikeke yona.

Website ya hina ya le nawini ya jw.org, yi tirhisiwe hi ndlela yo tsakisa. Sweswi se yi kumeka hi tindzimi to tlula 600 naswona ku nga hlayiwa minkandziyiso kumbe yi kopiwa hi tindzimi to tlula 750. Xana website leyi yi va pfuna njhani vanhu va timbilu letinene leswaku va tiva ntiyiso? Hi xikombiso: Mpatswa wun’wana a wu hele matimba hikwalaho ka vukanganyisi lebyi wu byi voneke evukhongerini. Loko wu ri karhi wu lava nkongomiso wa matsalwa, wu nghene eka website ya hina. Nkarhi na nkarhi a wu nghena eka yona wu hlaya swihloko swa minkandziyiso ya hina ni ku tlhela wu hlalela tivhidiyo. Wu tlhele wu kopa xibukwana lexi nge Ku Kambisisa Matsalwa Siku Ni Siku kutani wu sungula ku xi hlaya siku ni siku swin’we ni vana va wona vambirhi lava ha riki vantshwa. Entiyisweni, a va ri karhi va xi hlaya hi mixo lowu Timbhoni ta Yehovha ti fikeke ekaya  ra vona. Timbhoni ti kume leswaku ndyangu wolowo wu endle ku cinca lokukulu hikwalaho ka leswi wu ngheneke eka website. A va suse swilo leswi a va ti tsale swona emirini ni ku tlhela va tiboxa miri, va cukumeta swifaniso swa vukhongeri bya vona, va tshika ku tlangela tiholideyi ta misava ni ku tshika ku hlalela tifilimi leti thyakeke—swilo leswi hinkwaswo va swi tshike emahlweni ko va va hlangana ni Timbhoni! Loko ku ri karhi ku tsariwa rungula leri, vatswari havambirhi swin’we ni n’wana un’wana wa vona a va ri vahuweleri naswona vatswari va hlele ku khuvuriwa ku nga ri khale.

Hi amukele mapapila yo tala yo kombisa ku tlangela lunghiselelo rin’wana ro tsakisa: JW Broadcasting. Sweswi nongonoko wa n’hweti ni n’hweti se wu kumeka hi tindzimi to tlula 70, to tala ta ha ri endleleni. Mindyangu yo tala yi hlalela nongonoko lowu eka Vugandzeri bya Ndyangu bya nimadyambu. Makwerhu un’wana u te: “Nhlengeletano ya Yehovha a yi si tshama yi tala hi ndlela leyi, kambe a hi si tshama hi titwa hi ri ekusuhi ni ntsindza wa Timbhoni ta Yehovha ku fana ni ndlela leyi hi titwaka ha yona!”

Minkarhi hinkwayo tinhlengeletano i nchumu wo tsakisa eka vanhu va Yehovha naswona ntlhandlamano lowu veke kona hi lembe ra ntirho ra 2015 i xikombiso xa sweswo. Nongonoko wa nhlengeletano a wu ri ni tivhidiyo ta 42 swin’we ni swifaniso leswi mpfampfarhutiweke, ku katsa ni tinsimu ta tsevu to tsakisa leti rhangelaka nongonoko, laha ha rin’we a ri tlanga eka xiyimiso ha xin’we. Malunghana ni nongonoko lowu, makwerhu un’wana la nga ni ntokoto u te: “Swi vonaka onge un’wana ni un’wana loyi a a ri kona a a nga swi lavi ku suka laha a tshameke kona hi nkarhi wa nongonoko, hikuva a va nga lavi ku hundziwa hi nchumu.” Murhumiwa un’wana u vule leswi malunghana ni nhlengeletano  ya lembe leri nga hundza: “Tivhidiyo ti endle leswaku ntiyiso swin’we ni Mfumo wu va wa xiviri eka mina.”

Nakambe Yehovha u hi katekise hi tinsimu letintshwa ta Mfumo to hlayanyana eka lembe leri nga hundza. Mpatswa wun’wana wu tsale wu ku: “Tinsimu letintshwa ti fana ni ku vukarhiwa hi Yehovha. Ti hi khutazile swinene hi minkarhi yo tika.” Tinhlengeletano ta hina ti hi tsundzuxe hi ntirho wa rirhandzu lowu hi endleriwaka wona hi khwayere ya Watchtower, xikongomelo xa wona hinkwawo i ku dzunisa Yehovha!

Ha mi khutaza hinkwenu leswaku mi tekelela Yehovha hi ku va amukela hi mandla mambirhi lava vuyelaka eka Yena

Xana vandlha ra n’wina ri hlanganyela hi ku hiseka eka lunghiselelo ra ku chumayela etindhawini ta mani na mani hi ku tirhisa swigolonyana swo veka minkandziyiso? Hakunene lunghiselelo leri ro chumayela ri ve ni vuyelo lebyinene! Vanhu van’wana lava tshamaka etindhawini leti ku lavaka mpfumelelo ku nghena eka tona va twe ntiyiso ro sungula naswona van’wana vo tala ku katsa ni Timbhoni leti holeke, va le ku pfuniweni hikwalaho ka endlelo leri ro chumayela. Hi January 2015, wanuna un’wana wa le South Korea u ye laha ku nga ni xigolonyana lexi nga ni minkandziyiso. U vule leswaku se u sungule ku tsakela swilo swa moya. U sungule ku dyondza Bibele. Hi February, u ye ro sungula eminhlanganweni ya vandlha; hi March u tshike ku dzaha fole. Hi April, u endzele rhavi ra le South Korea naswona u hambeta a endla nhluvuko lowukulu hi tlhelo ra moya. Lowu ko va ntokoto wun’we ntsena eka yo tala leyi hi yi kumeke laha ntsindza wa hina.

Hi khongelela leswaku onge rungula leri hi ri kumeke enhlengeletanweni ri nga khutaza vo tala lava tshameke va tirhela Yehovha hi ku hiseka leswaku va vuyela eka yena nkarhi wa ha ri kona! Ha mi khutaza hinkwenu leswaku mi tekelela Yehovha hi ku va amukela hi mandla mambirhi lava vuyelaka eka Yena.—Ezek. 34:16.

 Hakunene Yehovha u katekise vanhu vakwe eka lembe ra ntirho leri nga hundza. Hi swihi swilo swin’wana leswi hi nga swi langutelaka? Hi ta swi vona hi ku famba ka nkarhi. Enkarhini wa sweswi, swi tiveni leswaku Huvo leyi Fumaka ya mi rhandza swinene hinkwenu ka n’wina naswona nkarhi na nkarhi ha mi khongelela.

Hi mi navelela leswinene,

Vamakwenu,

Huvo leyi Fumaka ya Timbhoni ta Yehovha