Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

Nghilandhi: Vamakwerhu va ri karhi va amukela vapfhumba eka nhlengeletano ya matiko yo hambanahambana

 KU CHUMAYELA NI KU DYONDZISA VANHU EMISAVENI HINKWAYO

Yuropa

Yuropa
  • MATIKO 47

  • VAAKATIKO 743 421 05

  • VAHUWELERI

  • TIDYONDZO TA BIBELE 842 091

Munhu Loyi A Nga Riki Yena A Dyondza Bibele

Nhlengeletano ya matiko yo hambanahambana leyi a yi khomeriwe eLondon, le Nghilandhi, a ku ri xiendlakalo xo tsakisa eka vapfhumba lava ku katsa ni Timbhoni ta kwalaho. Andrew na Elizabeth va endzele hotela ya le London hi xikongomelo xa leswaku va ta xeweta vapfhumba van’wana lava humaka ematikweni yo hambanahambana. Loko a vona wansati loyi a ambaleke kahle endhawini yo amukela vaendzi  a a anakanya leswaku i mupfhumba, kutani Elizabeth u n’wi xewete hi ku n’wi angarha. Wansati yoloye swi n’wi hlamarisile, kutani Elizabeth u kombele ku rivaleriwa. U te: “Ndzi khomele. A ndzi ehleketa leswaku u mupfhumba!”

Wansati yoloye u n’wi vutise a ku: “Mupfhumba wa yini?”

Elizabeth u kombetele mfungho lowu nga eka desika lowu amukelaka Timbhoni ta Yehovha naswona u hlamarisiwe swinene hi nhlamulo ya wansati yoloye. U te: “Hakunene swa tsakisa! Xana ndzi vonaka ndzi ri Mbhoni ya Yehovha?”

Eka bulo leri landzeleke, Elizabeth u kume leswaku vito ra wansati yoloye i Vivien, nileswaku a huma eNigeria naswona tindhawu leti a va tshama eka tona a ti siyana hi timinete ti nga ri tingani. Vivien u amukele dyondzo ya Bibele naswona a a lava leswaku ni vana vakwe va dyondzeriwa. Andrew na Elizabeth va ye ekaya ra Vivien naswona sweswi a ku fanele ku angarhiwa vona. Swi le rivaleni leswaku ku ya ka vona eLondon swi ve ni vuyelo lebyinene eka Vivien. Loko Andrew na Elizabeth va komba Vivien buku leyi nge Leswi Bibele Yi Swi Dyondzisaka, u va hlamarisile hi ku vula leswaku se u na yona naswona u le ku yi hlayeni ni vana vakwe. Endzhaku ka loko a byeriwe leswaku buku leyi yi tirhiseriwa ku fambisa dyondzo ya mahala ya le kaya ya Bibele, Vivien u angule a tsakile a ku, “A hi sunguleni sweswi!”

Papila Leri Humaka Eka Makwerhu Wa Murhoma

Hi November 2014 ku simekiwe vandlha ra Xirhoma eSlovakia. Eka nhlengeletano ya muganga leya ha ku vaka kona, ku khuvuriwe vahuweleri va 21 lava vulavulaka Xirhoma. Hinkwavo a va huma endhawini yin’we. EXitsundzuxweni a ku ri ni vanhu va 495 evandlheni ra Xirhoma. Makwerhu un’wana loyi a ha ku khuvuriwa u tsale marito lama landzelaka:

Slovakia: Vahuweleri vambirhi va Mfumo va ri karhi va chumayela mahungu lamanene hi ntsako eka wansati wa Murhoma

“Ndzi Murhoma loyi a humaka eŽehra, le Slovakia. Laha  ndzi tshamaka kona, vanhu vo basa va hi teka tanihi Vatsendzeleki naswona va vona hi ri vanhu lava nga ni thyaka ni ku tlhela hi ri lava hembaka hambi ku ri ku yiva. Loko ndzi lava ku ya ekerekeni, wanuna un’wana u ndzi byele leswaku a ndzi wa laha naswona ndzi fanele ku famba. Endzhaku ko langutana ni mhaka yoleyo, anakanya ndlela leyi ndzi va langutaka ha yona vanhu vo basa. Kutani Timbhoni ta Yehovha ti ndzi rhambe eHolweni ya Mfumo. Loko ndzi ya a ndzi ri karhi ndzi kanakana swinene, ndzi langutele leswaku ndzi ta tlhela ndzi khomisiwa tingana. Swi ndzi hlamarisile lerova hambi loko ndzi nga si nghena eHolweni ya Mfumo, makwerhu wo basa u ndzi qhavurile kutani a ndzi amukela hi mandla mambirhi. Hi nkarhi wa nkulumo ya le rivaleni, a ndzi swi kotanga ku rhiya ndleve. A ndzi tivutisa leswaku, ‘Swi kotekisa ku yini leswaku un’wana ni un’wana a ndzi khoma hi ndlela leyi?’

“Vusiku byebyo a ndzi etlelanga, hikuva a ndzi hambeta ndzi anakanya hileswi endlekeke eHolweni ya Mfumo. Kutani ndzi endle xiboho xo tlhela ndzi ya ku ya vona loko musa lowu ndzi kombiweke wona wu ri wa xiviri. Hi siku rero, vanhu va kona a va ri ni xinghana swinene ku tlula enkarhini lowu nga hundza naswona va ndzi khome tanihi munghana wa vona wa khale. A ndzi kalanga ndzi tshika ku ya eminhlanganweni naswona eku heteleleni ndzi khuvuriwile. Endzhaku ka loko ndzi khuvuriwile, musa lowu vamakwerhu a va ri na wona a wu cincanga naswona va hambete va swi kombisa leswaku ndzi wa nkoka. Minkarhi yin’wana, a va ndzi nyika swakudya swa kahle ku tlula leswi vona va swi dyaka! Minkarhi hinkwayo a ndzi lava ku va xiphemu xa nhlengeletano leyi naswona Yehovha i Xikwembu lexi ndzi lavaka ku xi tirhela hilaha ku nga heriki.”

Xikhongelo Xo Lava Ku Chumayela Mahungu Lamanene Xi Hlamuriwa

Makwerhu wa xisati loyi a vuriwaka Aysel a a famba hi bazi a suka edorobeni ra Ganja a ya eBaku le Azerbaijan. U  khongele eka Yehovha, a phofula ku navela kakwe ku va a vulavula ni munhu malunghana ni Bibele loko a ri karhi a famba. Hambileswi Aysel se a byeriwe xitulu lexi a fanele a tshama eka xona, wansati un’wana u sindzise leswaku a tshama etlhelo kakwe. Aysel u sungule ku bula ni wansati yoloye naswona eku heteleleni u kote ku cinca mabulo a ma kongomisa eBibeleni. Wansati yoloye u hlamusele leswaku wa n’wi rhandza Yesu naswona u lava ku tiva swo tala hi yena. Aysel ni wansati yoloye va nyikane tinomboro ta tinqingho kutani va twanana leswaku va ta tlhela va hlangana. Wansati yoloye u kombele Aysel leswaku a n’wi tela na Bibele loko swi koteka.

Endzhakunyana ka loko Aysel a tlhelele eGanja, u endzele endhawini leyi wansati yoloye loyi a tsakelaka a tirhelaka eka yona. Wansati yoloye u vule leswaku u ni “buku ya xikhongelo” leyi a yi hlayaka siku ni siku. Makwerhu wa xisati swi n’wi hlamarisile ku kuma leswaku entiyisweni buku leyi vuriwaka ya xikhongelo a ku ri xibukwana lexi nge Ku Kambisisa Matsalwa Siku Ni Siku xa 2013! Ku sunguriwe dyondzo ya Bibele naswona Aysel a tsakile hileswi Yehovha a n’wi nyikeke xivindzi xo chumayela hi xitshuketa.

Papila Ro Nkhensa Leri Humaka Eka Mubohiwa

Papila leri landzelaka ri huma eSpain:

“Xo sungula, ndzi rhandza ku nkhensa matshalatshala lawa mi ma endlaka leswaku mi fikelela vanhu va mixaka hinkwayo hi rungula ra Bibele.

“Ro sungula loko ndzi hlangana ni Timbhoni ta Yehovha a ndzi ri ni malembe ya 15 eTiranë, le Albania. Swi ndzi hlamarisile leswi Timbhoni ti veke ni xivindzi xo ta eka hina, hikuva a hi ri ntlawa wa vantshwa va khume lava nga swigevenga. Ku hava loyi a lava ku vulavula na hina, kambe makwerhu yoloye u endle tano ku nga khathariseki matlhari lawa a hi ri na wona. U vulavule na hina hi Bibele handle ko chava. Xivindzi lexi a ri na xona xi ndzi tsakisile swinene.

“Eka malembe ya mune lama hundzeke laha Spain, Mbhoni  yin’wana yi ndzi endzele ekhotsweni kutani yi kombela ku dyondza na mina Bibele. Ndzi pfumerile naswona ku sukela kwalaho ndzi cince hi ku helela. A ndza ha ri wanuna wa tihanyi. Se ndzi ni malembe yo tala ndzi nga si endla swo biha. Se ndzi tiva Yehovha naswona leswi swi endle leswaku vutomi bya mina byi va ni xikongomelo. Ndzi ringeta ku hanyisana hi ku rhula ni vanhu lava ndzi tshamaka na vona naswona se ndzi ni nkarhi wo tlula lembe ndzi ri muhuweleri loyi a nga khuvuriwangiki.

“Hambileswi sweswi ndzi nga ni malembe ya 12 ndzi ri ekhotsweni, eka malembe ya mune lama hundzeke, ndzi ve ni ntsako ni ku rhula loku ndzi nga si tshamaka ndzi va na kona. Hikwalaho ka sweswo, siku ni siku ndzi nkhensa Yehovha.

“Eka mavhiki lama hundzeke, ndzi hlalele tivhidiyo tin’wana eka jw.org. Hakunene swi ndzi khutazile ku vona vhidiyo ya makwerhu loyi a ri ekhotsweni eUnited States. A ndzi wanuna wo rila, kambe loko ndzi vona ku cinca loku a ku endleke evuton’wini byakwe, ndzi sungule ku rila.

 “Onge Yehovha a nga hambeta a katekisa matshalatshala ya n’wina yo fikelela vanhu va mixaka hinkwayo hi ku hundzuluxela mahungu lamanene hi tindzimi to tala ni ku tlhela mi endzela hina lava nga emakhotsweni.

“Ndza nkhensa swinene.”

“Eku Heteleleni Ndzi Ve Ni Ku Rhula”

Felicity loyi a nga ni malembe ya 68 loyi a tshamaka eSweden u ri: “Minkarhi hinkwayo a ndzi titwa ndzi ri xikangalafula ni ku tlhela vutomi bya mina byi nga ri na xikongomelo naswona ndzi hambete ndzi lava ku rhula loku a ndzi nga ri na kona.” Leswi a nga eneriseki hi tidyondzo takwe ta Khatoliki, u sungule ku kambisisa tidyondzo to hambanahambana ta vukhongeri kutani u hetelele a katseke eka vuloyi ni le ku hlahluveni.

Leswi a nga ri na xikongomelo xa xiviri evuton’wini, u titwe a nga pfuni nchumu lerova a kala a anakanya hi ku tidlaya. “Ndzi ri karhi ndzi rila, ndzi khongele eka Xikwembu hi rito leri tlakukeke, ndzi xi kombela xi ndzi byela leswi xi lavaka leswaku ndzi swi endla. Endzhakunyana ka mavhiki mambirhi, ndzi twe ku gongondziwa enyangweni wa mina. Jaha leri a ri ri karhi ri n’wayitela ri ndzi vutisile loko ndzi swi tsakela ku yingisela Rito ra Xikwembu. Ndzi tibyele leswi, ‘Xikwembu leswi a hi swona leswi a ndzi vula swona—ku nga ri Timbhoni ta Yehovha!’”

Hambileswi a tiyimisele ku pfala nyangwa, u endle xiboho xo yingisela naswona u pfumele ku dyondzeriwa Bibele hi ku tirhisa buku leyi nge Leswi Bibele Yi Swi Dyondzisaka. U ri: “Ndzi dyondzisiwe Bibele ndzi kala ndzi yi twisisa kahle.” Felicity u khuvuriwe enhlengeletanweni ya xifundzha eSweden hi 2014. Sweswi u ri: “Leswi hi swona leswi a ndzi lavana na swona vutomi bya mina hinkwabyo. Eku heteleleni ndzi ve ni ku rhula.”