Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

Australia: Vhidiyo ya tipopayi leyi nge Munghana Wa Xiviri U Njhani?

 KU CHUMAYELA NI KU DYONDZISA VANHU EMISAVENI HINKWAYO

Oceania

Oceania
  • MATIKO 29

  • VAAKATIKO 40 642 855

  • VAHUWELERI 98 353

  • TIDYONDZO TA BIBELE 66 022

Xivindzi Xo Chumayela eXikolweni

Emily, i xinhwanyetana lexi nga ni malembe ya 12 lexi tshamaka eAustralia. Siku rin’wana mudyondzisi wa xona u vulavule ni swichudeni swakwe hi nkoka wo hlawula vanghana lavanene. Leswi swi susumetele Emily leswaku a komba mudyondzisi wakwe vhidiyo ya tipopayi leyi nge Munghana Wa Xiviri U Njhani? Loko mudyondzisi a komba tlilasi vhidiyo leyi, swichudeni swi rhiye ndleve. Endzhaku ka sweswo, va hete awara va burisana  hi yona. Mudyondzisi u tlhele a komba vhidiyo leyi eka titlilasi tin’wana. Kutani Emily u kombe mudyondzisi wakwe ni vadyondzikulorhi website ya jw.org. Emily u ri: “Yehovha u ndzi nyike xivindzi xo komba vadyondzikulorhi va madzana website leyi. Hakunene u ndzi katekisile.”

Nkombiso Wo Navetisa Tibuku eNdhawini Ya Le Kule

Vahuweleri va ntlhanu va fambe tiawara ta kaye hi le ntshaveni leyi tlhumeke leswaku va ya lunghiselela tafula ro veka minkandziyiso eka nkombiso wo navetisa tibuku eSuai, le Timor-Leste. Vaendzi lava yeke eka tafula va hlamarisiwe hi ku vona minkandziyiso leyi sekeriweke eBibeleni hi tindzimi ta 12 ta ndhawu yoleyo, tanihi leswi yo tala ya minkandziyiso yoleyo a yi nga ri kona hi tindzimi teto. Wansati un’wana u vone xihloko xa broxara yin’wana kutani a ku, “Yi tsariwe hi ririmi ra mina!” A ku ri ro sungula a hlaya nkandziyiso hi ririmi ra manana, ku nga Xibunak. Hi masiku ya mune ntsena, vahuweleri va fambise minkandziyiso yo ringana 4 571 naswona va kume swikombelo swo tala swa vanhu lava lavaka ku endzeriwa emakaya ya vona. Vo tala va vanhu lava a va tsakela a va nga si tshama va twa hi Timbhoni ta Yehovha. Vana va hete tiawara to hlayanyana va ri karhi va hlalela tivhidiyo ta ntlhandlamano lowu nga ni nhlokomhaka leyi nge Vana Munghana Wa Yehovha hi ririmi ra Xitetun Dili. Vana van’wana va nhlokohate hambi ku ri marito ya tinsimu leti nga eka ntlhandlamano lowu kutani va ti yimbelela hi ntsako.

Timor-Leste: Vana va ri karhi va tiphina hi ku hlalela tivhidiyo leti nga eka ntlhandlamano lowu nge Vana Munghana Wa Yehovha

 “Leswi Hi Swona Leswi Swichudeni A Swi Swi Lava”

Brian na Roxanne, lava ku nga varhumiwa, va kombele mpfumelelo wo veka xigolonyana xo fambisa minkandziyiso ekholichi leyi nga exihlaleni xa Palau. Va hlangane ni mulanguteri wa kholichi naswona va n’wi kombe vhidiyo leyi nga eka jw.org leyi vulavulaka hi ku chumayela etindhawini ta mani na mani. Va tlhele va siya minkandziyiso leyi a va kunguhate ku yi veka eka xigolonyana. Mulanguteri u byele Brian na Roxanne leswaku a va fanele va tihlanganisa  ni mukongomisi wa timhaka leti khumbaka swichudeni. Endzhaku ka nhlangano wolowo, va byeriwe leswaku va va ni nhlangano wun’wana ni murhangeri wa kholichi.

Brian u ri: “Hi ve ni bulo ro tsakisa ni murhangeri kambe u tlhele a hi tlherisela eka hofisi ya mulanguteri, laha hi byeriweke leswaku hi fanele hi tsala papila ro kombela mpfumelelo wo veka xigolonyana xo fambisa minkandziyiso. A swi hi heta matimba hikuva a swi vonaka onge a va nga swi lavi ku hi yisa eka munhu loyi a faneleke.”

Palau: Roxanne na Brian va ve ni mabulo lama tsakisaka ni swichudeni loko va veka xigolonyana xo fambisa minkandziyiso ekusuhi na kholichi

Leswaku va ya vutisa malunghana ni papila leri va ri tsaleke, Brian na Roxanne va tlhele va ya eka mulanguteri, va ri ni ntshembo wa leswaku u ta ala xikombelo xa vona. Brian u ri: “Swi hi hlamarisile swinene loko a hi byela leswaku u hlaye tibuku  leti hi ti siyeke kutani a vula leswaku ti kahle swinene. U vule leswaku leswi hi swona leswi swichudeni a swi swi lava.” Va hi nyike mpfumelelo!

Brian u tlhele a ku: “Mukongomisi wa timhaka leti khumbaka swichudeni u hi tivise leswaku swichudeni leswi a swi tshama endhawini leyi nga ekusuhi ni kholichi a swi ta yisiwa ekerekeni leyi swi lavaka ku ya eka yona hi Sonto. U te, ‘Loko va lava ku ya ekerekeni ya n’wina, hi nga va yisa kona.’ Mina na Roxanne a hi nga swi langutelanga. Ematshan’weni yo ala xikombelo xa hina, kholichi a yi tiyimisele ku heleketa swichudeni eHolweni ya Mfumo!”

Hi siku ro sungula Brian na Roxanne va veke xigolonyana xo fambisa minkandziyiso, va fambise tibuku ta 65, timagazini ta nhungu ni tibroxara ta 11. Va tlhele va va ni mabulo yo tsakisa ni swichudeni. Murhangeri ni mukongomisi wa timhaka leti khumbaka swichudeni va va kombele leswaku va vuya.

Vaxavi Va Vona Tivhidiyo Ta Hina

Lipson, xirho xa ndyangu wa Bethele, a tlhelela erhavini ra le Swihlaleni swa Solomon endzhaku ko chumayela nimixo. Loko a ri karhi a famba, u twe risimu ra Mfumo leri a ri tlangiwa exitolo. Leswi a a lava ku tiva, u endle xiboho xo nghena endzeni. Lexi n’wi hlamariseke, u vone ntshungu wa vana swin’we ni vanhu lavakulu wu ri karhi wu hlalela thelevhixini leyi a yi ri karhi yi tlanga risimu 55, leri nga ni nhlokomhaka leyi nge “Vutomi Lebyi Nga Heriki!,” eka ntlhandlamano lowu nga ni nhlokomhaka leyi nge Vana Munghana Wa Yehovha. Loko risimu ri hela, n’wini wa xitolo u te, “Ku na vhidiyo yin’wana leyi ndzi lavaka leswaku mi yi hlalela.” U va tlangele vhidiyo ya tipopayi leyi nge Ku Yiva Swi Bihile. Endzhaku ka loko vhidiyo yi herile, u khutaze hinkwavo leswaku va nga yivi exitolo xakwe.

Hikwalaho ka leswi vo tala va teke exitolo loko vhidiyo yi ri karhi yi tlanga, n’wini wa xitolo u va byele leswi, “Ndzi lava  leswaku hinkwenu mi yingisela risimu leri ndzi ri rhandzaka.” U tlhele a tlanga risimu 55. Endzhaku ka sweswo, u va kombe tivhidiyo leti nge Ha Yini U Fanele U Dyondza Bibele? ni leyi nge Leswi Endlekaka Eka Dyondzo Ya Bibele hi ririmi ra Xiphijini xa le Swihlaleni swa Solomon.

Swihlala swa Solomon: N’wini wa xitolo a ri karhi a tiphina hi ku komba vaxavi tivhidiyo leti nga eka jw.org

A hi vanhu vo tala lava tshamaka eSwihlaleni swa Solomon lava kotaka ku nghena eka Internet hikwalaho ka leswi yi durhaka ni leswi yi nga kumekiki hi ku olova. Hambiswiritano, n’wini wa xitolo lexi, loyi a nga riki Mbhoni ya Yehovha, u le ku pfuneni ku byala mbewu ya ntiyiso hi ku komba vanhu lava taka exitolo xakwe tivhidiyo.

U Kume Vito Ra Xikwembu eBukwini

Musumbhunuku wun’wana ni wun’wana, mpatswa lowa ha riki vantshwa wu tiphina hi ku tirhisa xigolonyana xo fambisa minkandziyiso endhawini ya le Nouméa, ku nga ntsindza wa New Caledonia. Siku rin’wana, wansati un’wana u ye eka xigolonyana xa minkandziyiso handle ko vula nchumu  a teka buku leyi nge Xana Bibele Yi Dyondzisa Yini Hakunene? Endzhaku ka hafu ya awara, u vuye na yona. U te eka mpatswa wolowo, “Mi swi vonile leswi?” U pfule buku kutani a kombetela vito ra Yehovha. U te: “Leri i vito ra Xikwembu. A ndzi endla ndzavisiso mavhiki ma nga ri mangani ndzi lava ku tiva ntiyiso malunghana ni Xikwembu. Kambe ndzi teke buku ya n’wina kutani ndzi nghena emovheni. Loko ndzi yi pfula, xilo xo sungula lexi ndzi xi voneke a ku ri vito ra Xikwembu, ku nga Yehovha. Ndzi vone swi fanerile ku vuya eka n’wina leswaku ndzi ta mi nkhensa.” Mpatswa wolowo wu ve ni bulo ro tsakisa ni wansati loyi naswona va n’wi kombe xihloko lexi nge “Ndlela Leyi Vito Ra Xikwembu Ri Tirhisiwaka Ha Yona Ni Nhlamuselo Ya Rona” eka xiengetelo xa buku leyi nge Leswi Bibele Yi Swi Dyondzisaka. Wansati loyi u vule leswaku u lava ku rhanga a endla ndzavisiso, kambe sweswi wa swi tiva leswaku xigolonyana a nga xi kuma kwihi Musumbhunuku wun’wana ni wun’wana!