Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

Israel: Va ri karhi va tirhisa tablet leswaku va chumayela hi Mfumo wa Xikwembu

 KU CHUMAYELA NI KU DYONDZISA VANHU EMISAVENI HINKWAYO

Asia Ni Le Middle East

Asia Ni Le Middle East
  • MATIKO 49

  • VAAKATIKO 4 409 131 383

  • VAHUWELERI 718,716

  • TIDYONDZO TA BIBELE 766,364

Tiawara Ta Dzana Eka Malembe Ya Dzana

Eka tiko rin’wana ra le Asia, mutlangi wa xisati la dumeke wa le ka thelevhixini tlhelo n’wamburhi u amukele dyondzo ya Bibele. Hi ku hatlisa u sungule ku tirhisa leswi a a ri eku swi dyondzeni kutani a cukumeta tibuku takwe ta vungoma ni swifaniso swa Mabudha.

Un’wana wa vanghana lavakulu va wansati yoloye u n’wi kombele a ku: “Ha yini u nga yimi ku dyondza  ku ringana malembe manharhu kutani u dzika eka ntirho wa wena? Endzhaku ka sweswo, u nga tlhela u dyondza.”

Wansati yoloye u hlamule a ku: “Ndzi rindze malembe ya 24 leswaku ndzi kuma Yehovha. Ha yini ndzi fanele ndzi yima ku dyondza ha yena malembe man’wana manharhu?”

Hi vhiki leri a a fanele a ya tsarisa eka Xikolo xa Vutirheli bya le Tilweni, u beriwe riqingho hi khamphani ya tifilimi. Yi n’wi tshembise ntirho lowu holelaka swinene wa malembe ya mune hi ku vula leswaku u fanele a pfumela xiyenge xin’wana ni xin’wana xa filimi lexi a nga ta nyikiwa xona. A nga pfumelanga. Hi May 2014, u fanelekele ku va muhuweleri loyi a nga khuvuriwangiki naswona loko August yi ri ekusuhi, u endle xiboho xa leswaku u ta chumayela tiawara ta 100 hi n’hweti yoleyo. Loko a vutisiwa xivangelo xa kona, u te, “Ndzi lava ku tlangela malembe ya dzana ya ku fuma ka Yesu hi ku chumayela awara yin’we eka lembe rin’wana ni rin’wana a ri karhi a fuma!” U yi fikelerile pakani yakwe. Hi January 2015, u khuvuriwile naswona sweswi i phayona ra nkarhinyana.

Va Tirhisa Vusiku Lebyi Va Byi Heteke eKhotsweni Hi Vutlhari

ESri Lanka, vamakwerhu va mune va xisati va fambe hi bazi leswaku va ya chumayela ensin’wini leyi nga aviwangiki leyi eka yona a ku tele Mabudha. Eka siku ra vona ra vumbirhi va ri karhi va chumayela, nghwendza swin’we ni muchayeri wa thekisi va ye eka vamakwerhu lava va xisati. Hi ku hatlisa, ntshungu lowu hlundzukeke wa vanhu va kwalomu ka 30 wu va rhendzerile. Ku fike maphorisa, ivi ma famba ni vamakwerhu lava exitichini xa wona kutani ma va pfalela vusiku byin’we eswitokisini hambileswi a va nga endlanga nchumu xo biha. A va pfaleriwe ni tinsulavoya naswona a va rhuketeriwa, kambe ku pfaleriwa ka vona ku va nyike tindlela to chumayela. Un’wana wa vamakwerhu va xisati u ri: “A ndzi pfaleriwe ni vadlayi, kambe ndzi swi kotile ku vulavula  na vona hi ntiyiso. Swi va hlamarisile ku va ndzi ri kwalaho naswona a va ri ni swivutiso swo tala malunghana ni vukhongeri bya mina. Un’wana wa vona u ndzi vutise a ku, ‘Ha yini u tsake swinene?’”

Sri Lanka: Vamakwerhu va mune va xisati va fambe hi bazi leswaku va ya chumayela ensin’wini leyi nga aviwangiki

Huvo leyi Tlakukeke ya le Sri Lanka yi amukele xikombelo xa hina xa timfanelo ta vanhu xo va maphorisa ma khotsa vanhu va nga endlanga nchumu wo biha. Nandzu lowu wa ha ya emahlweni.

Ku Pfuna Wansati Loyi A Tshamaka A Etlele

Michiko, makwerhu wa xisati loyi a nga phayona loyi a tshamaka eJapani, a a ri karhi a fambisela wansati un’wana loyi a dyuhaleke exibedlhele dyondzo hi ku tirhisa ririmi ra mavoko. Makwerhu loyi u vutise vaongori loko ku ri ni swigulana swin’wana leswi a nga vulavulaka na swona. Michiko u hlangane na Kazumi, loyi a a twa kambe a nga swi kotiki ku vulavula. Xivangelo lexi endleke leswaku Kazumi a tshama a etlele i mhangu ya movha leyi a veke na yona loko a ri ni malembe ya 23 naswona a a nga swi koti ku mita swakudya hambi ku ri ku nwa mati. A a ri ni swivutiso swo tala naswona hi ku swi rhandza u amukele dyondzo ya Bibele.

Japani: Kazumi a ri karhi a tiphina hi ku tsala mapapila lama khutazaka

Michiko a a vutisa swivutiso kutani Kazumi a tirhisa mavoko yakwe leswaku a kombetela tinhlamulo leti nga eka tindzimana kumbe a ti tsala kunene. Loko Kazumi a xave riqingho, Michiko a a kota ku kambisisa ndzimana ya siku swin’we na yena mixo wun’wana ni wun’wana. Hambileswi Kazumi a tsaneke emirini, u ya emahlweni a kula hi tlhelo ra moya lerova a phofula ku navela kakwe leswaku a va Mbhoni ya Yehovha. Loko a ri ni malembe ya 61, endzhaku ko dyondza malembe ya 13, eku heteleleni Kazumi u ve muhuweleri loyi a nga khuvuriwangiki.

Tanihi leswi Kazumi a tshamaka a etlele, vandlha ri hlele  leswaku a yingisela minhlangano swin’we ni minongonoko hinkwayo ya tinhlengeletano. Vamakwerhu vo hambanahambana va xisati evandlheni va hlaya tinhlamulo leti lunghiseleriweke ta Kazumi eminhlanganweni.

Kazumi u tsalela xichudeni xin’wana ni xin’wana xa Bibele lexi taka eminhlanganweni mapapila lama khutazaka. U chumayela vaongori exibedlhele ni lava n’wi endzelaka. Kazumi u va byela a ku: “Loko mi dyondza Bibele, mi ta tsaka.”

Nghwendza Yi Dyondza Ntiyiso

Etikweni ra le Dzongavuxa bya Asia, makwerhu wa xisati u ye exibedlhele leswaku a ya kamberiwa mahlo laha a hlanganeke ni nghwendza. U yi vutise a ku, “Xana wa swi lava ku va ni rihanyo lerinene ni ku hanya hilaha ku nga heriki endhawini yo saseka?” Va sungule bulo ro tsakisa naswona u yi nyike broxara leyi nge Yingisa Xikwembu. Nghwendza yoleyo  yi n’wi nyike nomboro ya riqingho, laha makwerhu yoloye a yi nyikeke makwerhu wa xinuna evandlheni. Endzhakunyana ka sweswo, makwerhu u bele nghwendza yoloye riqingho kutani a yi rhamba eka nkulumo yo hlawuleka. Nghwendza yoleyo yi tiphine swinene hi minhlangano, ngopfungopfu loko ku yimbeleriwa tinsimu ta Mfumo naswona a yi tsake swinene hileswi un’wana ni un’wana a yi amukeleke kahle.

Loko nghwendza yoleyo yi vutise loko Timbhoni ti ri ni tiyunivhesiti kumbe tiseminara, makwerhu yoloye u hlamusele leswaku hi fambisa dyondzo ya Bibele naswona u kombele ku dyondza na yona. Eka vhiki leri landzelaka, nghwendza yoleyo a yi hete ndzima yo sungula ya buku leyi nge Xana Bibele Yi Dyondzisa Yini Hakunene? Yi hambete yi dyondza, yi sungula ku ya eminhlanganweni naswona ya hlamula hi nkarhi wa Dyondzo ya Xihondzo xo Rindza.

Loko nghwendza yoleyo yi ye enhlengeletanweni ya muganga, muyimeri wa rhavi u yi rhambe leswaku yi endzela eBethele. Eka vhiki leri landzelaka nghwendza yoleyo yi fambe kwalomu ka tiawara ta khume leswaku yi ya eBethele, laha yi amukeriweke hi mandla mambirhi. Eku heleni ka February 2015, u tshike ku va nghwendza naswona u ya emahlweni a tiphina hi ku dyondza Bibele ni ku tlhela a hlamula eminhlanganweni ya Vukreste.

A A Lahlekile, Kambe U Tlhele A Kumiwa

Sweswinyana, maphayona a ma rhumeriwe en’walunguvuxa bya Indiya, laha mahungu lamanene a ma nga si tshama ma chumayeriwa eka malembe yo tala. Maphayona ma kume leswaku vanhu va tsakela swinene naswona a ma lava ku kuma ndhawu leyi faneleke yo khomela eka yona minhlangano. Loko ma ri karhi ma ya eka dyondzo ya Bibele, ma vone muako lowu a wu ri karhi wu akiwa ivi ma anakanya hi ku vutisa malunghana na wona. Loko ma fambe mpfhukanyana, ma endle xiboho xo tlhelela endzhaku. Ekusuhi ni  muako, ma hlangane ni wansati loyi a dyuhaleke kutani ma n’wi byela leswaku hi wona Timbhoni ta Yehovha. U sungule ku n’wayitela. U te, “Na mina ndzi Mbhoni ya Yehovha,” kutani u ma amukele hi mandla mambirhi ekaya rakwe. U ma kombe minkandziyiso yakwe ya va-1970 na va-1980. U tshame a dyondza ni maphayona eka malembe ya 30 lama nga hundza naswona a ya eka minhlangano yin’wana hambi leswi a a kanetiwa hi nuna wakwe. A a tiyiseka leswaku u kume ntiyiso kambe endzhakunyana a nga ha swi kotanga ku hlangana ni Timbhoni loko maphayona ma suke endhawini yoleyo. Vana vakwe hinkwavo va nghena tikereke to hambanahambana, kambe a nga pfumelanga ku nghena ni kereke ni yin’we.

Indiya: Wansati loyi a tsakelaka a ri karhi a komba maphayona minkandziyiso yakwe ya va-1970 na va-1980

Sweswinyana, vana va wansati yoloye va sungule ku n’wi sindzisa leswaku a ya tsarisa ku va xirho xa Kereke ya Khatoliki ku endlela leswaku loko a fa a ta lahliwa hi yona. Makwavo wakwe wa xisati u sindzise hambi ku ri ku famba na yena leswaku a ya tsarisa ekerekeni ya Khatoliki, kambe loko va ri endleleni yo ya kona, va kume ku ri ni ntlimbano wa timovha naswona va boheke ku tlhelela ekaya. Makwavo wakwe u vule leswaku va ta tlhela va ya eka siku leri landzelaka, kambe u vabyile. Siku rero ninhlikanhi hi leri maphayona ma yeke ha rona eka wansati yoloye loyi a tsakelaka! Sweswi u tlhele a sungula ku dyondza Bibele, a ya eminhlanganweni naswona u khutaza vana swin’we ni vatukulu vakwe leswaku na vona va dyondza.