Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

Burundi: Nolla a ri karhi a komba vavanuna lava kombeleke makala tikopi ta Xihondzo xo Rindza

 KU CHUMAYELA NI KU DYONDZISA VANHU EMISAVENI HINKWAYO

Afrika

Afrika
  • MATIKO 58

  • VAAKATIKO 1 082 464 150

  • VAHUWELERI 1 453 694

  • TIDYONDZO TA BIBELE 3 688 959

Ku Chumayela Hi Xithuthuthu

Benin: Désiré a ri karhi a tirhisa muchini wo tlanga mpfumawulo lowu yingiseriwaka kunene eka xithuthuthu xakwe leswaku a chumayela mahungu lamanene eka vakhandziyi vakwe

Swithuthuthu leswi vitaniwaka ti-zem, i swithuthuthu swa vutleketli leswi rhandziwaka emadorobeni ya le dzongeni wa Benin. Désiré, loyi a nga phayona ra nkarhinyana, u nghenise muchini wo tlanga mpfumawulo lowu ngo yingiseriwa kunene kutani a veka swipikara swimbirhi leswi nga ni mpfumawulo lowukulu leswi nga langutana ni xitulu xa mukhandziyi. Nkarhi ni nkarhi u tlangisa rungula leri ngo yingiseriwa kunene ra minkandziyiso  ni tidrama leti sekeriweke eBibeleni. Loko mukhandziyi a khandziya, u namba a yingisela rungula leri nga eku tlangiweni. Vo tala va tsakisiwa swinene hi leswi va swi twaka va nga si fika ni laha va yaka kona, va kanakana hambi ku ri ku ala ku chika eka zem kukondza ku hela leswi nga eku tlangeni. Désiré u ri: “Ndza swi tsakela leswaku va hakela kutani va famba ivi ndzi kuma mukhandziyi un’wana kambe ndza swi tiva leswaku ku twa ka vona mahungu lamanene i swa nkoka ku tlula mali. Ku tlula kwalaho, ndzi kota ku fambisa minkandziyiso yo tala hi ku chumayela hi ndlela leyi.”

N’wana Loyi A A Phikelela

Nolla i xinhwanyetana lexi nga ni malembe ya tsevu lexi tshamaka ni ndyangu wa ka vona etintshaveni ta Burundi. Siku rin’wana, loko va ri karhi va sweka hi xitofu xa malahla, vavanuna vambirhi lava a va tirha kwalaho kusuhi va kombele makala leswaku va ta tshivela ndzilo. Nolla, loyi a nga si nghenaka xikolo, a a ri karhi a hlanganyetela ndzilo loko vavanuna volavo va fika. U va pfumelerile leswaku va teka makala ma nga ri mangani. Endzhakunyana, Nolla u vone vavanuna lava kutani a xiya leswaku va tirhise makala wolawo leswaku va lumeka fole. Leswi a swi n’wi khomanga kahle naswona u va byele leswi: “Loko a ndzi lo swi tiva leswaku mi lava ku tirhisa makala lawa leswaku mi lumeka fole, a ndzi ta va ndzi nga mi nyikanga.” Kutani u tsundzuke magazini lowu a wu voneke eHolweni ya Mfumo lowu a wu ri ni xifaniso xa fole exifunengetweni xa wona. U tsutsumele eHolweni ya Mfumo kutani a teka tikopi timbirhi ta Xihondzo xo Rindza xa June 1, 2014, lexi a xi vulavula hi ku dzaha. U vuye na tona, a va nyika tona kutani a phikelela leswaku va ti hlaya hi ku hatlisa. Endzhakunyana, u tlhele a  hlangana na vona kutani a va nyika swirhambo swa nhlengeletano ya xifundzha leyi a yi ta va kona. Hi ku hlamarisiwa hi ku phikelela ka xinhwanyetana lexi, vavanuna volavo va tikarhatele ku va kona eka masiku mambirhi ya nhlengeletano. Hi nkarhi wa ku wisa, Nolla u va vonile kutani a va rhamba leswaku va ta dya ni ndyangu wa ka vona. Hi ku tsakisiwa hi leswi va swi tweke ni ku swi vona enhlengeletanweni, vavanuna volavo havambirhi va sungule ku dyondza Bibele.

Ku Chumayela eMakhotsweni

Vakulu va le Liberia va chumayela rungula ra Mfumo eka miako yo hambanahambana ya makhotso. Yves, loyi a nga phayona ro hlawuleka entsindza wa Monrovia wa hlamusela: “Hi March, vakhotsiwa vanharhu va fanelekele ku va vahuweleri lava nga khuvuriwangiki. Leswi swi endle leswaku nhlayo ya vahuweleri eKhotsweni ra Monrovia Central yi andza yi va tsevu.” Xana va hlanganyela njhani entirhweni wo chumayela? Yves u ri: “Va hlangana hi Ravunharhu ni hi Mugqivela leswaku va ya ensin’wini. Kutani, va pfumeleriwa ku famba hi xitokisi hi xitokisi, va byela vakhotsiwakulobye hi ntshembo wa rungula ra le Bibeleni.” Vakhotsiwa vo tala va yi tsakela dyondzo ya vona vini ya Bibele naswona va hlanganyela eka minhlangano leyi khomiwaka ekhotsweni. Muyimeri wa rhavi u nyikele nkulumo eka vakhotsiwa va 79 ekhotsweni rolero. Makhotso man’wana ya tsevu ma khoma titlilasi ta nkarhi na nkarhi ta dyondzo ya Bibele naswona ma vona ku cinca lokunene eka vakhotsiwa va wona.

“A Hi Lava Mpfuno Wa Xihatla”

Matshalatshala lamakulu ma endliwile leswaku ku pfuniwa lava tsakelaka lava tshamaka etindhawini  leti nga ekule leswaku va kota ku va kona eXitsundzuxweni. Hi xikombiso, Masan, lawa nakambe ma tiviwaka tanihi Mabushmen, i vaaki vo sungula ku tshama edzongeni ra Afrika. A va hanya vutomi byo olova, tanihi vahloti tlhelo va hlengeleti. Leswaku va kota ku va kona eka Xitsundzuxo xa 2015, Glenn, loyi a nga phayona ro hlawuleka loyi a tirhaka en’walungu wa Namibia, u endle matshalatshala yo khoma Xitsundzuxo emugangeni wa le kule wa Masan lowu ku nga tikhilomitara ta 270 evuxa bya Rundu. Xitsundzuxo a xi khomiwa ra vumbirhi kwalaho. Eka switsundzuxo haswimbirhi, valawuri va le mugangeni va nyike Timbhoni ta Yehovha mpfumelelo wo tirhisa muako wa majistarata mahala. Vanhu va 232 va ve kona eXitsundzuxweni ku nga khathariseki timpfula ta matimba leti veke kona loko xi nga si khomiwa ni hi siku leri a xi khomiwe ha rona. Vanhu lava, lava tshamaka ekhwatini va vulavula ririmi ra Xikhwe, leri tiviwaka hi ndlela leyi marito ya rona ma vitaniwaka hakona. Nkulumo yi hundzuluxeriwe ku suka eka Xinghezi ku ya eka Xikhwe. Leswi ku nga riki na Bibele ya Xikhwe, va endle swifaniso leswi namekiweke ekhumbini leswaku swi hlamusela tindzimana to fana na Esaya 35:5, 6. Glenn, loyi a fambisaka tidyondzo to hlayanyana ta Bibele leti endlaka nhluvuko endhawini yoleyo u ri: “A ndzi endzela ndhawu leyi kan’we hi nh’weti emalembeni mambirhi lama hundzeke. A ndzi tshama endhawini yoleyo masiku ma nga ri mangani. A ku nga ri na nhluvuko hikwalaho ka ririmi leri a ri vulavuriwa ni hi leswi ndhawu yoleyo a yi ri ekule. A hi lava mpfuno wa xihatla. Loko ndzi ya eka valawuri leswaku ndzi ya endla malunghiselelo ya Xitsundzuxo lembe leri, xirho xa komiti lexi rhangelaka vanhu va kwalaho xi ndzi vutise loko hi ta kota ku aka ndhawu yo gandzela eka yona endhawini leyi. Xi vule leswaku komiti yi ta hi nyika ndhawu naswona a yi ta aka muako hi mali ya yona! Leswi hina a hi fanele hi swi endla i ku lava ‘mufundhisi’ kumbe hi letela un’wana wa vona leswaku a va mufundhisi!”

Namibia: Vahuweleri vambirhi va ri karhi va tiphina hi ku chumayela mahungu lamanene eka wansati wa Muhimba