Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

 INDONESIA

Tindlela To Chumayela Ta Nkarhi Lowu Hundzeke

Tindlela To Chumayela Ta Nkarhi Lowu Hundzeke

Ku Haxa Hi Xiyanimoya

HI 1933, vamakwerhu va hlele leswaku xitichi xa xiyanimoya xa le Jakarta xi haxa tinkulumo leti rhekhodiweke ta Makwerhu Rutherford ta Xinghezi. Wanuna un’wana loyi a tsakelaka ntiyiso u yingisele tinkulumo tin’wana eka xiyanimoya hi Xidachi. Ku haxiwa loku ku endle leswaku vanhu va tsakela swinene naswona swi pfune vamakwerhu leswaku va fambisa minkandziyiso yo tala ensin’wini.

Loko xitichi xa xiyanimoya xi haxe nkulumo ya Makwerhu Rutherford leyi nge, “Makumu Ya Lembe Ro Kwetsima Ra Ku Rhula Ni Ntshamiseko,” vafundhisi va Khatoliki a va nga ha lavi ku twa nchumu. * Hi ku tirhisa valandzeri va vona, va hehle Makwerhu De Schumaker, loyi ku nga yena a nyikeke xitichi xa xiyanimoya tinkulumo leti rhekhodiweke, hi ku vula leswaku i “mulumbeti, wa hlekula ni ku tlhela a va nala.” Makwerhu De Schumaker u tiyimelerile eka swihehlo swoleswo kambe u rihisiwile hi ti-guilder ta 25 * ni ku tlhela a hakerisiwa mali ehubyeni. Maphephahungu manharhu ma vike hi mhaka leyi naswona sweswo swi endle leswaku ku nyikeriwa vumbhoni byo tala.

 Xikepe Xa Lightbearer

Hi July 15, 1935, xikepe xa 16 wa timitara xa Sosayiti ya Watch Tower lexi vuriwaka Lightbearer xi fike eJakarta endzhaku ka riendzo ro leha ra tin’hweti ta tsevu ku suka eSydney, le Australia. A xi ri ni maphayona ya nkombo lama hisekaka lawa a ma tiyimisele ku chumayela mahungu lamanene etikweni hinkwaro ra Indonesia, Singapore na Malaysia.

 Ku ringana malembe yo tlula mambirhi, maphayona lawa a ma ri exikepeni xa Lightbearer ma ye eka mahlaluko lamakulu ni lamatsongo etikweni hinkwaro ra Indonesia, ma ri karhi ma fambisa minkandziyiso yo tala leyi sekeriweke eBibeleni. Jean Deschamp u ri: “Loko xikepe xi nghena eka hlaluko rin’wana ni rin’wana leritsongo, vamakwerhu a va ta tlanga yin’wana ya tinkulumo ta J. F. Rutherford hi muchini lowu nga ni mpfumawulo, loyi hi nkarhi wolowo a ri muungameri wa Sosayiti ya Watch Tower. Anakanya ndlela leyi vanhu va le ximutanini xa Malay va titweke ha yona loko va vona xikepe lexikulu xi ta ehlalukweni wa vona naswona va ri karhi va twa mpfumawulo wa rito lowu a wu twalela ekule. A swi tikomba onge va vone xihahampfhuka lexi humaka eka pulanete yin’wana.”

Hi ku hlundzukisiwa hi ku chumayela ka vamakwerhu, vafundhisi va sindzise valawuri leswaku va yirisa ku ta ka xikepe xa Lightbearer emahlalukweni yo tala ya le Indonesia. Hi December 1937, xikepe xa Lightbearer xi tlhelele eAustralia, xi siye xiviko xo tsakisa xa ntirho wa vurhumiwa eIndonesia.

Vamakwerhu lava nga exikepeni xa Lightbearer

^ ndzim. 2 Nkulumo ya Makwerhu Rutherford yi paluxe vukanganyisi lebyi nga kona eka vukhongeri, tipolitiki ni ndlela leyi Kereke ya Rhoma Khatoliki yi tirhisanaka ha yona ni swa mabindzu.

^ ndzim. 2 Namuntlha mali leyi yi ringana ni kwalomu ka R4 000.