Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

Vamakwerhu lava nga ebyatsweni va ri karhi va yingisela nhlengeletano leyi khomiweke hi nkarhi wa ku yirisiwa ka ntirho

 INDONESIA

A Va Tiyimisele Ku Tshama Va Tiyile eRipfumelweni

A Va Tiyimisele Ku Tshama Va Tiyile eRipfumelweni

Loko vamakwerhu va le rhavini va twa hi ta ku yirisiwa ka ntirho wo chumayela, va teke goza. Ronald Jacka u ri: “Hi suse tirhekhodo ta xihundla, minkandziyiso ni mali ya rhavi hi swi yisa etindlwini to hambanahambana leti sirhelelekeke eJakarta. Endzhaku ka sweswo hi rhurhise hofisi ya rhavi hi yi yisa endhawini leyi tumbeleke ivi hi xavisa miako ya khale ya rhavi exihundleni.”

Vo tala va vamakwerhu va kwalaho va hambete va hiseka hi tlhelo ra moya naswona a va nga chavi. Va tiyisele miringo leyikulu loko ntirho wo chumayela wu nga si yirisiwa naswona va hambete va tshembela eka Yehovha. Vamakwerhu van’wana va wele endzingweni. Vakulu vo hlayanyana va khomiwe hi rhumbyana kutani va sayina rungula leri a ri va pfumelela ku tshika ku chumayela. Van’wana a va paluxa mavito ya swirho swa vandlha. Rhavi ri rhumele vamakwerhu lava wupfeke hi tlhelo ra moya leswaku va ya tiyisa mavandlha ni ku pfuna lava landzuleke ripfumelo ra vona. John Booth, xirho xa Huvo leyi Fumaka, na yena u endzele eIndonesia leswaku a ya nyikela ndzayo ya rirhandzu leyi a yi laveka.

A swi kanakanisi leswaku Yehovha, Murisi Lonkulu, a a ri karhi a tiyisa ni ku chavelela vanhu vakwe. (Ezek. 34:15) Vakulu va sungule ku antswisa ndlela leyi va rhangelaka ha yona hi tlhelo ra moya naswona vahuweleri va kume tindlela letintshwa swin’we ni ta vutlhari to chumayela. (Mat. 10:16) Vamakwerhu vo tala va xave tikopi ta manguva lawa leti nga durhiki ta Bibele eka Sosayiti ya Bibele ya le Indonesia kutani va ti nyika vini va miti, hi vutlhari va chumayela rungula ra Mfumo hilaha va nga kotaka hakona. Van’wana va suse tluka leri kombisaka vakandziyisi va nkandziyiso leri nga eka minkandziyiso ya hina kutani va ti nyika vanhu lava tsakelaka. Maphayona yo tala ma ye emahlweni ma chumayela ma  tiendla vanhu lava fambaka hi yindlu ni yindlu va ri karhi va xavisa, hilaha vamakwerhu va le nkarhini lowu nga hundza lava hanyeke hi nkarhi wa ku fuma ka mfumo wa Majapani va endleke hakona.

Margarete and Norbert Häusler

Kutani hi 1977, Ndzawulo ya Timhaka ta Vukhongeri yi kume ndlela yin’wana yo hlasela Timbhoni, yi alele varhumiwa lava nga Timbhoni ta Yehovha leswaku va pfuxeta tivhisa ta vona. Timbhoni to tala leti a ti ri varhumiwa ti averiwe ematikweni man’wana. * Norbert Häusler, murhumiwa loyi a a tirha ni nsati wakwe Margarete eManado, le North Sulawesi, u ri: “Vamakwerhu va madzana va te erivaleni ra swihahampfhuka  leswaku va ta hi lela. Hi ye eswitepisini swa xihahampfhuka kutani hi fika hi yima leswaku hi languta endzhaku. Kutani hi vone vamakwerhu va hi yimisela mavoko naswona hi twe ngulumelo wa ku rila ka vona ku suka laha a va ri kona, va ku: ‘Ha nkhensa. Ha nkhensa ku va mi te laha.’ Hi khandziye xihahampfhuka kutani hi sungula ku rila hi xiviti.”.”

Nxaniso Wa Le Sumba

Tanihi leswi mahungu ya ku yirisiwa ka ntirho wo chumayela a ma hangalake ni swihlala hinkwaswo, Nhlangano wa Tikereke ta le Indonesia wu khutaze swirho swa wona leswaku swi vika ntirho wun’wana ni wun’wana wa Timbhoni eka valawuri. Leswi swi endle leswaku vamakwerhu vo tala va khomiwa va tlhela va konanisiwa eswihlaleni swo tala.

Le Waingapu, exihlaleni xa Sumba, mukongomisi wa masocha wa le mugangeni u rhambe vamakwerhu va 23 ekampeni ya kwalaho ya masocha kutani a va byela leswaku va sayina xihlambanyo xo landzula ripfumelo ra vona. Loko vamakwerhu va ala, mukongomisi u va lerise leswaku va tlhelela ekampeni hi siku leri landzelaka, ku nga riendzo leri leheke tikhilomitara ta 14 loko u famba ni ku vuya hi milenge.

Loko vamakwerhu va fike eka mukongomisi wa masocha nimixo, va vitiwe hi un’we un’we leswaku va ta sayina xihlambanyo. Loko makwerhu a ala ku sayina, masocha a ma n’wi ba hi marhavi ya mitwa. Masocha lawa a ma ba vamakwerhu van’wana lerova va kala va titivala. Hi nkarhi wolowo, vamakwerhu van’wana a va yimele leswaku va vitiwa. Kutani, makwerhu un’wana wa muntshwa loyi vito rakwe ku nga Mone Kele u sayine xihlambanyo. Vamakwerhu van’wana a va hele matimba kambe mukongomisi wa masocha a a hlundzuke swinene. Mone u tsale a ku: “Ndzi ta tshama ndzi ri Mbhoni ya Yehovha hilaha ku nga heriki!” Mone u biwe a tlhela a vavisiwa naswona u hetelele a ye exibedlhele kambe u hambete a ri ni vuxaka lebyi tiyeke na Yehovha.

Mukongomisi u hete masiku ya 11 a ri karhi a ringeta ku endla leswaku vamakwerhu va landzula vutshembeki bya  vona. U va byele leswaku va yima siku hinkwaro edyambyini. U va sindzise leswaku va kasa hi mavoko ni matsolo ku ringana tikhilomitara to hlaya ni ku tlhela va tsutsuma mimpfhuka yo leha va rhwale mindzhwalo yo tika. Loko a va kombetele hi mukwana wo leha, u va lerise leswaku va losa mujeko; kambe va arile. Kutani u lerise leswaku va tlhela va biwa.

Mixo wun’wana ni wun’wana, vamakwerhu a va ya ekampeni va nga swi tivi leswaku va ta xanisiwa hi ndlela yihi. Loko va ri endleleni, a va khongela swin’we ni ku khutazana leswaku va tshama va tshembekile. Vusiku byin’wana ni byin’wana loko va tlhelela ekaya, va vavisekile ni ku huma ngati, a va tsaka swinene hileswi va tshameke va tshembekile eka Yehovha.

Loko rhavi ri twa leswaku vamakwerhu a va xanisiwa, ri hatle ri fonela ndhunankulu ya masocha eWaingapu ri yisa xivilelo eka ndhunankulu ya masocha ya xifundzha xa le Timor, ndhunankulu ya masocha ya le mugangeni wa Bali, ndhunankulu leyi tlakukeke ya masocha eJakarta ni valawuri van’wana. Hi ku khomisiwa tingana hikwalaho ka leswi swiendlo swa yona swa tihanyi swi humeseriweke erivaleni etikweni hinkwaro ra Indonesia, ndhunankulu ya masocha eWaingapu yi tshike ku xanisa vamakwerhu.

“Timbhoni Ta Yehovha Ti Fana Ni Swipikiri”

Eka malembe lama landzeleke, Timbhoni to tala etikweni hinkwaro ra Indonesia ti khotsiwile, ti konanisiwa ni ku xanisiwa. Bill Perrie loyi a nga murhumiwa u ri: “Eka ndhawu yin’wana vamakwerhu vo tala a va susiwa tino ra le mahlweni. Loko va hlangana ni makwerhu loyi a ha riki na tino ra le mahlweni, a va ta vutisa va ku: ‘Xana wa ha ku va Mbhoni? Kumbe  u landzule ripfumelo ra wena?’ Hambileswi a va langutana ni nxaniso, lava xanisiweke a va lahlekeriwanga hi ntsako kumbe ku hiseka loku a va ri na kona hikwalaho ko tirhela Yehovha.”

“Ku khotsiwa swi ndzi dyondzise leswaku ndzi fanele ndzi titshega hi Yehovha swinene naswona swi ndzi tiyisile hi tlhelo ra moya”

Eka malembe ya 13 ntsena, Timbhoni ta 93 ti khotsiwe nkarhi lowu sukelaka eka tin’hweti timbirhi ku ya eka malembe ya mune. Ku langutana ni ku xanisiwa loku ku tiyise ku tiyimisela ka tona ku tshama ti tshembekile eka Yehovha. Endzhaku ko khotsiwa tin’hweti ta nhungu, Musa Rade u endzele vamakwerhu va laha a tshamaka kona ku va khutaza leswaku va ya emahlweni va chumayela. U te: “Ku khotsiwa swi ndzi dyondzise leswaku ndzi fanele ndzi titshega hi Yehovha swinene naswona swi ndzi tiyisile hi tlhelo ra moya.” A swi hlamarisi leswi van’wana lava swi voneke va vuleke leswi: “Timbhoni ta Yehovha ti fana ni swipikiri. Loko u ya u ti xanisa, ripfumelo ra tona ri ya ri tiya swinene.”

Vahuweleri va ri endleleni yo ya chumayela eAmbon, le Maluku

^ ndzim. 1 Peter Vanderhaegen na Len Davis lava ku nga khale va ri varhumiwa lava a va ri ni malembe yo tlula 60 swin’we na Marian Tambunan (loyi a ri wa ka Stoove) a a tekiwe hi Muindonesia, kutani va pfumeleriwe ku tshama eIndonesia. Havanharhu ka vona va hambete va hiseka hi tlhelo ra moya naswona va chumayele hi ndlela leyi humelelaka hi nkarhi wa ku yirisiwa.