Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

 INDONESIA

Rhavi Lerikulu

Rhavi Lerikulu

Tihofisi ti le ka xithezi xa vu-31

Hi 2008, tiko ra Indonesia ri fikelele nhlohlorhi ya vahuweleri va 21 699. A ku nga ha ri na ndhawu yo tshama erhavini. Nakambe tanihi leswi miako ya rona a yi akiwe hi nkarhi lowu a ku yirisiwe ntirho, a ri ri ekule. Swi le rivaleni leswaku a ku laveka rhavi lerikulu leri nga ekusuhi ni le Jakarta.

 Endzhakunyana ka kwalomu ka malembe mambirhi, vamakwerhu va xave ndhawu leyi a yi hambane swinene ni rhavi ra khale, ku nga xithezi xa vu-31 xa muako wa manguva lawa lowu nga ni swithezi swa 42 lowu nga ekusuhi ni le xikarhi ka Jakarta. Vamakwerhu va tlhele va xava ndhawu leyi nga ni swithezi swa 12 ya muako lowu nga ekusuhi leswaku ku ta tshama vanhu va 80 kumbe ku tlula va le Bethele. Nakambe va xave muako lowu a wu ri na swithezi swa ntlhanu leswaku ku ta tshama vanhu lava tirhaka eka tindzawulo ta le Kaya ra Bethele.

Vanhu lava tshamaka eBethele va tshama eka swithezi swa 12

Ntlawa wa vatirhi vo aka lava humaka ematikweni yo hambanahambana wu tirhe swin’we ni vanhu vo aka va kwalaho leswaku va lunghisa tihofisi ni miako yo tshama eka yona. Darren Berg mulanguteri wa ntirho wo aka u ri: “Yehovha u hi pfunile hi ku phindhaphindha eka swiphiqo leswi tikaka leswi a hi hlangana na swona. Hi xikombiso, a hi lava ku nghenisa tiphayiphi ta manguva lawa to fambisa nkululo kambe valawuri a va nga tolovelananga na yona thekinoloji kutani a va pfumelanga. Mbhoni ya kwalaho leyi a yi ri munjhiniyara yi yise mhaka leyi eka mutirhelamfumo la tlakukeke. Hi ku hatlisa mutirhelamfumo yoloye u xi amukerile xikombelo xa hina, a vula leswaku u swi tshemba hilaha ku heleleke leswi vamakwerhu va swi tsaleke.”

“A ha ha tumbeli. Sweswi vanhu va ti tiva Timbhoni ta Yehovha. Va swi xiya leswaku hi ta tshama laha hi masiku”

Miako leyintshwa ya rhavi yi nyiketeriwe hi February 14, 2015. Anthony Morris III xirho xa Huvo leyi Fumaka hi yena a nga nyikela nkulumo ya ku nyiketeriwa ka rhavi. Vincent Witanto Ipikkusuma, xirho xa Komiti ya Rhavi u ri: “Sweswi hi tshama exifundzheni xo saseka lexi nga ni tikhampani  letikulu eIndonesia. A ha ha tumbeli. Sweswi vanhu va ti tiva Timbhoni ta Yehovha. Va swi xiya leswaku hi ta tshama laha hi masiku..”

Komiti ya Rhavi ku suka eximatsini ku ya exineneni: Budi Sentosa Lim, Vincent Witanto Ipikkusuma, Lothar Mihank, Hideyuki Motoi

“Swa Tsakisa Ku Chumayela Laha!”

Emalembeni ya sweswi, nhlayo leyi andzaka ya Timbhoni leti humaka etindhawini to hambanahambana ti rhurhele eIndonesia. Lothar Mihank u ri: “Vanhu lava tirhaka laha ku nga ni xilaveko lexikulu va endla ntirho wa nkoka swinene ematikweni yo fana ni ya hina. Va ni ntokoto, va wupfile hi tlhelo ra moya, va hiseka emavandlheni ya vona naswona leswi swi hi pfuna leswaku hi tlangela vun’we bya vamakwerhu emisaveni hinkwayo.” I yini leswi va susumeteleke ku rhurha? Naswona vuyelo byi ve byihi? Xiya swin’wana leswi va swi vuleke.

Vanhu Lava Tirhaka Laha Ku Nga Ni Xilaveko Lexikulu

1. Janine na Dan va ka Moore

2. Mandy na Stuart va ka Williams

3. Casey na Jason va ka Gibbs

4. Mari (emahlweni exineneni) na Takahiro va ka Akiyama (endzhaku exineneni)

Jason na Casey va ka Gibbs lava humaka eUnited States va te: “Hi hlaye hi nhlayo ya vanhu lava muhuweleri a faneleke a va chumayela eka Buku Ya Lembe kutani hi xiye leswaku tiko ra Indonesia hi rin’wana ra matiko lawa muhuweleri a faneleke a chumayela vanhu vo tala emisaveni. Kutani vanghana va hina lava a va tirha laha ku nga ni xilaveko va hi byele leswaku ku ni xilaveko lexikulu eIndonesia. Hi fonele  rhavi ra le Indonesia kutani ri hi byela leswaku hi ya eBali. A ku lava ku sunguriwa nsimu ya Xinghezi eIndonesia, kutani a hi ta namba hi sungula ku chumayela. A hi hlele ku ya tshama lembe, kambe hi tshame malembe manharhu. Vanhu vo tala lava a hi va chumayela a va nga si tshama va twa hi Timbhoni ta Yehovha. Hakunene nsimu leyi yi ve ni vuyelo lebyinene!”

Stuart na Mandy va ka Williams, mpatswa lowu humaka eAustralia wu te: “A hi lava ku hlangana ni vanhu lava rhandzaka ntiyiso kutani hi endle xiboho xo rhurhela eIndonesia. EMalang, le East Java, hi hlangane ni swichudeni swo tala swa le yunivhesiti leswi a swi vulavula Xinghezi leswi hi ku tirhandzela swi yingiseke mahungu lamanene. Nakambe swa yi rhandza website ya jw.org. Ntirho wo chumayela laha wa tsakisa.”

Takahiro na Mari va ka Akiyama, lava phayoneke eYogyakarta exihlaleni xa Java, va ri: “Laha hi titwa hi sirhelelekile swinene ku tlula ndlela leyi a hi titwa ha yona loko ha ha ri ekaya le Japani. Vanhu va laha va ni musa ni mahanyelo lamanene. Vo tala va vona, ngopfungopfu vantshwa va ni swivutiso swo tala malunghana ni vukhongeri byin’wana. Siku rin’wana loko hi ri karhi hi tirha eka tafula ro veka minkandziyiso yo chumayela endhawini ya mani na mani, hi fambise kwalomu ka timagazini ta 2 600 hi tiawara ta ntlhanu.”

Dan na Janine va ka Moore, ku nga mpatswa lowu nga emalembeni ya va-50 wu ri: “Loko hi ya eku chumayeleni, vanhu va ta laha hi nga kona. Ha n’wayitela; kutani na vona va tlherisela hi ku n’wayitela. Va ni swivutiso swo tala naswona va tsakela. Loko hi va komba rungula ra le Bibeleni, van’wana a va ku: ‘Xana ndzi nga ri tsala ehansi?’ A va hlamarisiwa hileswi Bibele yi swi tameleke. Hi ni lembe hi ri laha naswona ha tisola leswaku a hi fanele hi te khale. A hi lava nsimu leyi vanhu vo tala va nga si tshamaka va twa hi Yehovha kutani hi yi kumile!”

 Misja na Kristina va ka Beerens a va ri varhumiwa hi 2009 kutani sweswi i valanguteri va muganga. Va ri: “Hambi ku ri eXihlaleni xa Madura eEast Java, ku nga xin’wana xa swihlala leswi nga ni Mamoslem yo tala eIndonesia, ndlela leyi va anguleke ha yona eka ntirho wa hina wo chumayela a yi tsakisa swinene. Vanhu a va yimisa timovha ta vona leswaku va kombela timagazini. A va ku: ‘Ndzi Mumoslem kambe ndza swi tsakela ku hlaya timagazini leti. Xana ndzi nga tekela ni vanghana va mina?’ Swa tsakisa ku chumayela lahat!”

Masimu Ma Basile Leswaku Ma Tshoveriwa

Hi 1931, loko Frank Rice a fika eJakarta, a ku ri ni vanhu va kwalomu ka 60 000 000 lava a va tshama eIndonesia. Namuntlha nhlayo yoleyo yi ya eka 260 000 000, leswi endlaka leswaku Indonesia ri va tiko ra vumune leri nga ni vanhu vo tala emisaveni hinkwayo.

 Nakambe Timbhoni ta Yehovha ta le Indonesia ti andze hi ndlela yo hlamarisa. Hi 1946, vahuweleri va khume vo tshembeka va tiyisele minkarhi yo tika hi nkarhi wa Nyimpi ya Vumbirhi ya Misava. Namuntlha etikweni leri ku ni vahuweleri vo tlula 26 000, ku nga vumbhoni bya mikateko ya Yehovha leyi nga erivaleni! Tanihi leswi ku veke ni vanhu va 55 864 eka Xitsundzuxo xa 2015, swa tikomba leswaku ku ve ni ku andza loku xiyekaka.

Yesu u te: “Ina, ntshovelo i wukulu, kambe vatirhi a hi vangani. Hikokwalaho, kombelani N’wini wa ntshovelo leswaku a rhumela vatirhi entshovelweni wakwe.” (Mat. 9:37, 38) Malandza ya Yehovha ya le Indonesia ma endle hi ku pfumelelana ni marito wolawo. A ma tiyimisele ku kulula ma n’watseka leswaku ma pfuneta eku kwetsimiseni ka vito lerikulu ra Yehovha exihlaleni lexi.Esa. 24:15.

DYONDZA SWO TALA

I VAMANI LAVA ENDLAKA KU RHANDZA KA YEHOVHA NAMUNTLHA?

Ndlela Leyi Minkandziyiso Ya Hina Yi Tsariwaka Yi Tlhela Yi Hundzuluxeriwa Ha Yona?

Hi kandziyisa minkandziyiso hi tindzimi to tlula 700. Ha yini hi endla matshalatshala lawa hinkwawo?