Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

 INDONESIA

Mfumo Wa Majapani

Mfumo Wa Majapani

Eku sunguleni ka 1942, masocha ya le Japani ma sungule ku lawula tiko ra Indonesia. Vamakwerhu vo tala va boheke ku endla mintirho yo tika—yo fana ni ku aka magondzo ni ku seletela magova. Van’wana a va pfaleriwa etikampeni ta khotso leti nga ni thyaka va tlhela va xanisiwa hileswi a va ala ku hlanganyela enyimpini. Vamakwerhu vanharhu va file ekhotsweni.

Johanna Harp, vana vakwe vambirhi va vanhwanyana na Beth Godenze, munghana wa ndyangu wa vona (exikarhi)

Makwerhu un’wana wa xisati wa Mudachi, Johanna Harp, loyi a a tshama eximutanini lexi nga xoxe xa le ntshaveni lexi nga aEast Java, a nga yisiwanga etikampeni ta khotso ku ringana malembe mambirhi yo sungula ya nyimpi. Yena ni vana vakwe vanharhu va tirhise ntshunxeko wa vona ku hundzuluxela  buku leyi nge Salvation ni Xihondzo xo Rindza ku suka eka Xinghezi ku ya eka Xidachi. * Minkandziyiso leyi nga hundzuluxeriwa a yi kopiwa kutani yi ngungumeriseriwa Timbhoni leti a ti ri etikweni hinkwaro ra Java.

Timbhoni to hlayanyana leti a ti ri ni ntshunxeko a ti hlangana hi mintlawa leyitsongo kutani ti chumayela hi vuxiyaxiya. Josephine Elias (loyi a a ri wa ka Tan) u ri: “Minkarhi hinkwayo a ndzi lava tindlela to chumayela hi xitshuketa. Loko ndzi ya emakaya ya vanhu lava tsakelaka a ndzi famba ndzi khome bodo yo tlangela eka yona ntlango wa chess leswaku vanhu van’wana va ta anakanya leswaku a ndzi ya ku tlangeni ka ntlangu wolowo ntsena.” Felix Tan ni nghamu yakwe, Bola va chumayele hi yindlu ni yindlu, va endla onge va xavisa xisibi. Felix u ri: “A hi tala ku landzeleriwa hi tinhlori ta Kempeitai, ku nga masocha lama chaviwaka ya Majapani. Leswaku hi nga voniwi, a hi endzela swichudeni swa hina swa Bibele hi minkarhi yo hambana. Swichudeni swa hina swa tsevu swi endle nhluvuko lowukulu naswona swi khuvuriwe hi nkarhi wa nyimpi.”

Mpambukwa eJakarta

Loko vamakwerhu va ri karhi va tolovelana ni maxangu ya nyimpi, va langutane ni ndzingo wun’wana lowukulu. Valawuri va le Japani va lerise vanhu hinkwavo lava humaka ematikweni man’wana (ku katsa ni Machayina lama a ma tshama eIndonesia) leswaku ma tsarisa ni ku tlhela ma khoma khadi leri nga ni vuxokoxoko bya munhu leri kombisaka leswaku u xixima xihlambanyo xa Mfumo wa Majapani. Vamakwerhu vo tala va tivutisile, ‘Xana hi fanele hi tsarisa ni ku sayina khadi leri kumbe hi ala?’

Josephine Elias ni makwavo wakwe Felix

Felix Tan wa hlamusela: “Vamakwerhu eJakarta va byele vamakwerhu va le Sukabumi leswaku va nga sayini khadi. Hi kombele valawuri loko swi ta koteka leswaku hi cinca marito lama nga eka khadi ku suka eka lama nge ‘lava sayineke va  hlambanye leswaku va ta xixima’ ku ya eka lama nge ‘lava sayineke a va nge ma siveli masocha ya le Japani ku ya enyimpini.’ Va pfumerile, kutani hinkwerhu hi kume makhadi. Loko vamakwerhu va le Jakarta va twa leswaku hi teke makhadi, va vule leswaku hi vagwinehi kutani va tshika ku tihlanganisa na hina.”

Lexi twisaka ku vava, vamakwerhu lava a va hiseka swinene eJakarta va khotsiwile kutani va tshika ntiyiso. Makwerhu un’wana loyi a nga pfumelangiki ku cinca langutelo rakwe u khotsiwile swin’we na André Elias. André u ri: “Ndzi ringete ku n’wi komba xivangelo xo va a sayina khadi ni ku n’wi pfuna leswaku a va ni langutelo lerinene hi mhaka leyi. Hi ku titsongahata u kombele ku rivaleriwa hikwalaho ka leswi a tshikeke ku tihlanganisa na hina. Ku sukela kwalaho, hi ve ni nkarhi wo tsakisa hi khutazana, kambe lexi twisaka ku vava u hetelele a fa hikwalaho ka swiyimo swo biha swa le khotsweni.”

Merdeka!

Loko nyimpi yi hela hi 1945, vamakwerhu a va swi langutele hi mahlongati ku ya emahlweni ni ntirho wo chumayela. Makwerhu loyi a khotsiwile kutani a xanisiwa u tsalele rhavi ra le Australia a ku: “Hi mina loyi endzhaku ka malembe yo tika ya  mune kambe ndza ha hisekela ntirho wo chumayela. Eka swiphiqo hinkwaswo leswi ndzi langutaneke na swona, a ndzi nga si tshama ndzi rivala hi vamakwerhu. Xana mi nga ndzi rhumela tibuku?”

Minkandziyiso leyi se a yi ri ni nkarhi wo leha yi languteriwile yi fikile etikweni, eku sunguleni a yi ri yitsongo kambe hi ku famba ka nkarhi yi fike yi tele. Vamakwerhu va khume va le Jakarta va tlhele va sungula ku hundzuluxela minkandziyiso hi Xiindonesia.

Hi August 17, 1945, varhangeri va le Indonesia va vule leswaku tiko ra Indonesia se i tiko leri tiyimeleke hi roxe leswi endleke leswaku va xandzukela Mfumo wa Madachi ku ringana malembe ya mune. Vanhu va magidi va file eka mpfilumpfilu lowu veke kona naswona vanhu vo tlula nkombo wa timiliyoni va lahlekeriwe hi makaya.

Eka ku xandzuka loku hinkwako, vamakwerhu va ye emahlweni va chumayela hi yindlu ni yindlu. Josephine Elias u ri: “Vanhu lava rhandzaka tiko va ringete ku hi sindzisa leswaku hi vula marito lawa a va ma vula hi nkarhi wa nyimpi va ku, ‘Merdeka,leswi vulaka ‘Ntshunxeko.’ Kambe a hi va byela leswaku a hi hlanganyeli eka tipolitiki.” Hi 1949, Madachi ma hundzisele mfumo eka koloni ya wona leyi nga ni malembe yo tala eka Riphabliki ra United States ya le Indonesia (leyi sweswi yi vitaniwaka Riphabliki ra le Indonesia). *

Hi 1950, vamakwerhu va le Indonesia va tiyisele kwalomu ka malembe ya khume ya mpfilumpfilu. Kambe a va ri ni ntirho wo tala lowu a va fanele va wu endla. Xana a va ta swi kotisa ku yini ku chumayela mahungu lamanene eka vanhu va timiliyoni va le Indonesia? Hi vonelo ra munhu, ntirho lowu a swi vonaka onge a wu nge koteki! Kambe, hikwalaho ka ripfumelo leri tiyeke, vamakwerhu va ye emahlweni ni ntirho va ri karhi va tiyiseka leswaku Yehovha u ta “rhumela vatirhi entshovelweni wakwe.” (Mat. 9:38) Yehovha u swi endlile sweswo.

^ ndzim. 2 N’wana lontsongo wa nhwanyana wa Makwerhu Harp, Hermine (Mimi), u ye eka xikolo xa Giliyadi endzhaku ka nyimpi kutani a tlhelela eIndonesia leswaku a ya va murhumiwa.

^ ndzim. 3 Madachi ma ye emahlweni ma fuma eWest Papua (leyi khale a yi vitaniwa West New Guinea) ku ya fikela hi 1962.