Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

Micato a yi tirhisiwa leswaku ku khomiwa tinhlengeletano

 INDONESIA

A Ma Tshikanga Ku Hlengeletana Swin’we

A Ma Tshikanga Ku Hlengeletana Swin’we

Hi nkarhi wa ku yirisiwa ka ntirho wo chumayela, mavandlha yo tala ma hambete ma hlengeletana swin’we emakaya ya vamakwerhu leswaku ma gandzela. Leswaku ma papalata ku tikokela mahlo, yo tala a ma nga yimbeleli tinsimu ta Mfumo. Tindhawu tin’wana ta minhlangano a ti hlaseriwa hi valawuri kambe hi ntolovelo vamakwerhu a va nga kavanyetiwi.

Hakanyingi vamakwerhu a va tirhisa minkhuvo ya ku hlangana ka maxaka kumbe micato leswaku va khoma tinhlengeletano letikulu. Tagor Hutasoit u ri: “Hakanyingi vatekani a va tsarisa vukati bya vona kutani va kuma mpfumelelo eka maphorisa leswaku va khoma mucato wa vona eka ndhawu leyikulu. Hi nkarhi wa mucato, tinxangwana ta mutekiwa a ti tshama exitejini loko hi hala tlhelo vamakwerhu va ri karhi va nyikela tinkulumo leti sekeriweke eBibeleni.”

Eka nhlengeletano yin’wana phorisa ri landze Tagor exihundleni.

Kutani ri n’wi vutisa ri ku: “Micato yo tala yi heta tiawara timbirhi kumbe tinharhu. Ha yini micato ya n’wina yi teka siku hinkwaro?”

Tagor u ri hlamule a ku: “Vatekani van’wana va ni swiphiqo swo tala kutani va lava ku pfuniwa hi ndzayo leyi humaka eRitweni ra Xikwembu.”

 Phorisa ri pfumele hi nhloko kutani ri ku: “Swoleswo swa twala.”

Hikwalaho ka leswi a ku ri ni micato yo tala, hi 1983 vamakwerhu va khome Nhlengeletano ya Xifundzha exitediyamu xa mintlango xa le Jakarta leyi a yi ri ni nhlokomhaka leyi nge, “Vun’we Bya Mfumo.” Vamakwerhu va kwalomu ka 4 000 ni vanhu lava tsakelaka va ve kona eka nhlengeletano leyi naswona vanhu va 125 va khuvuriwile exihundleni loko nongonoko wu nga si sungula. Endzhakunyana, loko ku  yirisiwa ka ntirho ku nga ha tinyiki matimba, vamakwerhu va ve ni tinhlengeletano letikulu leyi yin’wana ya tona ku veke ni vanhu vo tlula 15 000.

Ku Aka Hofisi Ya Rhavi Hi Nkarhi Wa Ku Yirisiwa Ka Ntirho

Hi va-1980 na va-1990, hi ku phindhaphindha rhavi ri kombele hulumendhe leswaku yi herisa ku yirisiwa ka ntirho wo chumayela wa Timbhoni ta Yehovha. Nakambe vamakwerhu va le matikweni man’wana va tsalele hulumendhe ya le Indonesia ni vayimeri va yona va lava ku tiva leswaku ha yini Timbhoni ta Yehovha ti yirisiwile eIndonesia. Vatirhelamfumo vo tala a va yima ni mhaka ya leswaku ku yirisiwa loku ku herisiwa, kambe Vakongomisi va Vukreste eTikweni a va nga yimi na yona mhaka leyi.

Hi 1990, vamakwerhu va teke xiboho xa leswaku va ta aka hofisi ya rhavi leyintshwa endhawini leyi nga exihundleni. Hi lembe rolero, Huvo leyi Fumaka yi nyike mpfumelelo wa ku xaviwa ka ndhawu yoleyo leyi nga ekusuhi ni le Bogor, ku nga xidorobana lexi nga kwalomu ka 40 wa tikhilomitara edzongeni wa Jakarta. Hambiswiritano, vamakwerhu va kwalaho vo hlayanyana a va ri ni vuswikoti byo aka. Kambe xana muako lowu, lowuntshwa a wu ta akiwa njhani?

Nhlamulo yi te yi huma eka vamakwerhu va le matikweni yo hambanahambana. Hofisi yo aka ya le Brooklyn ni Hofisi ya Vunjhiniyara ya Xifundzha ya le Australia yi nyike vamakwerhu mpfampfarhuto wa ndlela leyi a va ta aka ha yona. Vatirhi va ku tirhandzela va kwalomu ka 100 va le matikweni yo hambanahambana va pfunetile eka tsima ro aka ra malembe mambirhi.

Hosea Mansur, makwerhu la nga Muindonesia loyi a a vulavurisana ni vatirhelamfumo vo hambanahambana hi swa ntirho u te: “Loko vatirhelamfumo va Mamoslem va vona letere leri sungulaka vito swin’we ni leri sungulaka xivongo xa mina ku nga H.M. eka gondolo ra mina, a va ehleketa leswaku H a yi yimela ‘Hājjī’ ku nga xithopo xa xiyimo xa le henhla  lexi a xi nyikiwa munhu loyi a hlelaka maendzo yo hlawuleka yo ya eMecca. Xisweswo va ndzi khome hi ndlela ya xichavo. Sweswo swi endle leswaku swi olova ku hlela ntirho wo aka.”

Hofisi leyi ya rhavi yi akiwe hi nkarhi lowu a ku yirisiwe ntirho wo chumayela

Muako lowuntshwa wa rhavi wu nyiketeriwe hi July 19, 1996. John Barr, xirho xa Huvo leyi Fumaka u nyikele nkulumo ya ku nyiketeriwa ka muako wolowo. Vanhu va 285 lava a va ri kona a va katsa vayimeri va rhavi va 118 ni lava a va ri varhumiwa lava humaka ematikweni yo tala swin’we ni swirho swa ndyangu wa Bethele wa le Indonesia swa 59. Eka masiku mambirhi lama landzeleke ku ve ni vanhu va 8 793 eka Nhlengeletano ya Xifundzha ya le Jakarta leyi a yi ri ni nhlokomhaka leyi nge, “Varhumiwa Va Ku Rhula Ka Xikwembu.”

Yehovha A Kutsula Vanhu Vakwe

Hi 1998, Soeharto (Suharto), loyi a veke Presidente ya le Indonesia nkarhi wo leha u chike exitulwini, leswi endleke leswaku ku va ni hulumendhe leyintshwa. Kutani vamakwerhu va tirhe hi matimba leswaku ku herisiwa ku yirisiwa ka ntirho wo chumayela.

Loko Matsalana wa Timhaka ta Matiko Mambe, Nkulukumba Djohan Effendi a endzele eNew York hi 2001 u fike a valanga eBethele ya le Brooklyn kutani a hlangana ni swirho swinharhu swa Huvo leyi Fumaka. U tsakisiwe hileswi a swi voneke naswona u swi xiyile leswaku Timbhoni ta Yehovha ti ni ndhuma leyinene emisaveni hinkwayo. Nkulukumba Effendi u seketele mhaka ya ku herisa ku yirisiwa ka ntirho wo chumayela kambe u vule leswaku xiboho a xi ta tekiwa hi gqwetankulu ra le Indonesia, ku nga Nkulukumba Marzuki Darusman.

Nakambe gqwetankulu ri yime ni mhaka ya ku herisa ku yirisiwa ka ntirho wo chumayela kambe vatirhelamfumo va tihanyi va le ndzawulweni ya rona a va ri ni ntshembo wa leswaku ku nga ri khale u ta siviwa. Eku heteleleni, hi June 1, 2001, Tagor Hutasoit u vitaniwe ehofisini ya gqwetankulu. Tagor u ri: “Ehofisini yoleyo eka malembe ya 25 lama hundzeke, ndzi nyikiwe xiviko xa leswaku ntirho wa Timbhoni ta Yehovha wu yirisiwile. Kambe hi siku leri a ku ri ro hetelela leswaku gqwetankulu a va ehofisini, u ndzi nyike xiviko xa leswaku ku yirisiwa ka ntirho wo chumayela ku herisiwile.”

Hi March 22, 2002, nhlengeletano ya Timbhoni ta Yehovha ya le Indonesia yi tsarisiwe ximfumo eka Ndzawulo ya Timhaka ta Vukhongeri. Mukongomisinkulu wa ndzawulo u byele vayimeri va rhavi a ku: “Ku tsarisiwa loku a ku mi nyiki lunghelo ro gandzela hi ku ntshunxeka. Kambe ntshunxeko wolowo wu huma eka Xikwembu. Leswi swi kombisa leswaku vukhongeri bya n’wina byi tiveka ximfumo eka hulumendhe. Sweswi mi ni lunghelo leri fanaka ni ra vukhongeri byin’wana naswona hulumendhe yi ta mi korhokela.”