Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

 INDONESIA

Phayona Leri Nga Ni Xivindzi

André Elias

Phayona Leri Nga Ni Xivindzi
  • U VELEKIWE HI 1915

  • U KHUVURIWE HI 1940

  • MATIMU YAKWE HI KU KOMISA Phayona leri nga ni xivindzi leri yimeke ri tiya ku nga khathariseki ku konanisiwa ni minxungeto.

HI NKARHI wa Nyimpi ya Vumbirhi ya Misava, Makwerhu Elias ni nsati wakwe Josephine, a va yime emahlweni ka valawuri va le Sukabumi, le West Java, entsindza wa Kempeitai, ku nga masocha lama chaviwaka ya Majapani. Ku rhange ku konanisiwa André. U tlhaviwe hi swivutiso swo tala swo tika. “Timbhoni ta Yehovha i vamani? Xana u lwisana ni mfumo wa Majapani? Xana u nhlori?”

André u te: “Hi malandza ya Xikwembu xa Matimba Hinkwawo naswona a hi endlanga nchumu xo biha.” Ndhunankulu yi teke savula ekhumbini ivi yi ri tlakusela ehenhla.

Yi huwelerile yi ku: “U ta ku yini loko ndzo ku dlaya sweswi?” André u korhamisele nhloko etafuleni kutani a khongela hi mbilu. Endzhaku ko miyela nkarhi wo leha, ndhunankulu yi hlekele ehenhla. Kutani yi te, “U ni xivindzi!” Hiloko yi vitana Josephine. Loko leswi a swi hlamuleke swi fambisana ni leswi vuriweke hi André, ndhunankulu yi huwelerile yi ku: “A mi tinhlori. Humani mi famba!”

 Endzhaku ka tin’hweti to hlayanyana, André u hehliwe hi “vamakwerhu va mavunwa” ivi a pfaleriwa ekhotsweni. (2 Kor. 11:26) Ku ringana tin’hweti to hlayanyana, a a hanya hi swakudya leswi a a swi rholela emugerhweni wa le khotsweni. Valanguteri va khotso va tsandzekile ku endla leswaku a landzula ripfumelo rakwe. Loko Josephine a n’wi endzela, u n’wi hlevele a ri endzeni ka xitokisi a ku: “U nga vileli. Hambiloko vo ndzi dlaya kumbe va ndzi ntshunxa, ndzi ta tshama ndzi tshembekile eka Yehovha. Swa antswa va ndzi humesa ndzi ri ntsumbu ematshan’weni yo landzula ripfumelo ra mina.”

Endzhaku ko heta tin’hweti ta tsevu ekhotsweni, André u tiyimelerile emahlweni ka Huvo leyi Tlakukeke ya le Jakarta naswona u ntshunxiwile.

Endzhaku ka malembe ya kwalomu ka 30 mfumo wa le Indonesia wu tlhele wu yirisa ntirho wa Timbhoni ta Yehovha, gqweta ra le mugangeni wa Manado, eNorth Sulawesi, ri vitane André leswaku a ta ehofisini ya rona. Kutani ri n’wi vutise ri ku: “Xana wa swi tiva leswaku Timbhoni ta Yehovha ti yirisiwile?”

André u te, “Ina, ndza swi tiva.”

Ri vutisile ri ku, “Xana u tiyimiserile ku cinca vukhongeri bya wena?”

André u korhamile ivi a tiba xifuva. U vule hi rito ra le henhla a ku, “Hambi ko ba lexi dumaka, a ndzi nge cinci vukhongeri bya mina.”

Gqweta ra le mugangeni wolowo ri tshike André a famba naswona a ra ha tlhelanga ri n’wi karhata.

André u fe hi 2000 a ri ni malembe ya 85, endzhaku ko phayona malembe ya kwalomu ka 60 hi ku hiseka.