Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2016

Va ri karhi va chumayela emakete eJakarta

 INDONESIA

Ku Andza Ka Ntirho

Ku Andza Ka Ntirho

Loko varhangeri va tikereke ta Vujagana va twa leswaku Timbhoni ta Yehovha ti nyikiwe ntshunxeko wo gandzela, a va hlundzukile swinene. Vafundhisi vo tlula 700 swin’we ni varhangeri lava humaka etikerekeni ta nkombo ta Maprotestente va khome seminara eJakarta leswaku va kombela hulumendhe ku tlhela yi yirisa ntirho wa Timbhoni. Kambe hulumendhe a yi yimanga na yona mhaka yoleyo.

Loko mahungu ma ri karhi ma hangalaka ni tiko hinkwaro leswaku ku yirisiwa ku herisiwile, vanhu vo tala lava tsakelaka va tsalele rhavi va kombela minkandziyiso kumbe ku fambiseriwa tidyondzo ta Bibele. Hi 2003, vanhu vo tlula 42 000 va ve kona eXitsundzuxweni, laha swi endleke leswaku nhlayo leyi yi hundza ya vahuweleri lava nga kona etikweni ku tlula kambirhi. Kwalomu ka vanhu va 10 000 va ve kona enhlengeletanweni ya le Jakarta, ku katsa ni mutirhelamfumo loyi a tlakukeke wa le ka Ndzawulo ya Timhaka ta Vukhongeri. Mutirhelamfumo u hlamarisiwe hi ku vona vanhu lavakulu ni lavatsongo lava a va ri kona va ri karhi va pfula matsalwa eTibibeleni ta vona. U tiyisekise vamakwerhu leswaku u tiyimisele ku lulamisa leswi Timbhoni ta Yehovha ti hehliwaka ha swona.

Ku herisiwa ka ku yirisiwa swi tlhele swi endla leswaku varhumiwa va vuya eIndonesia. Varhumiwa vo sungula ku vuya a ku ri Josef na Herawati Neuhardt * (lava humaka eSwihlaleni swa Solomon), Esa na Wilhelmina Tarhonen (lava humaka eTaiwan), Rainer na Felomena Teichmann (lava humaka eTaiwan) na Bill swin’we na Nena Perrie (lava humaka eJapani). Va landzeriwe hi varhumiwa lavantshwa lava humaka eGiliyadi lava a va averiwe ku ya eNorth Sumatra,  Kalimantan, North Sulawesi ni le tindhawini tin’wana leti nga ekule.

“Hakunene ndza swi rhandza ku pfuna swichudeni leswaku swi antswisa ndlela leyi swi dyondzisaka ha yona ni ndlela leyi swi vulavulaka ha yona.”—Julianus Benig

Hi 2005, rhavi ri fambise titlilasi timbirhi ta swikolo leswintshwa. Un’wana wa valeteri va Xikolo xa Ndzetelo wa Vutirheli (lexi sweswi xi vitaniwaka Xikolo Xa Vachumayeri Va Mfumo), Julianus Benig u ri: “Hakunene ndza swi rhandza ku pfuna swichudeni leswaku swi antswisa ndlela leyi swi dyondzisaka ha yona ni ndlela leyi swi vulavulaka ha yona leswaku swi ta tirhisiwa swinene hi nhlengeletano.” Sweswi mathwasana yo tala ya xikolo lexi i maphayona yo hlawuleka kumbe valanguteri va miganga. Vamakwerhu vo tala lava yeke eka tlilasi yo sungula ya Xikolo xa Valanguteri lava Fambafambaka * va leteriwe hi nkarhi lowu ntirho a wa ha yirisiwile. Xikolo lexintshwa xi va pfune leswaku va hetisisa swiavelo swa vona endzhaku ka loko ku yirisiwa ku herisiwile. Ponco Pracoyo, loyi a yeke eka tlilasi yo sungula u ri: “Xikolo  xi ndzi pfune leswaku ndzi va ni ntwelavusiwana ni ku tlhela ndzi va ni vutihlamuleri lebyi engetelekeke eku hetisiseni ka xiavelo xa mina tanihi mulanguteri wa muganga. A xi phyuphyisa xi tlhela xi khutaza!”

Ku Akiwa Ka Tiholo Ta Mfumo Leti A Ti Laveka Hi Xihatla

Eka malembe ya 25 ya ku yirisiwa, mavandlha yo tala eIndonesia a ma hlangana emakaya lamatsongo ya vamakwerhu leswaku ma gandzela. I mavandlha ma nga ri mangani lawa a ma kota ku aka Holo ya Mfumo naswona a swi nga olovi ku kuma maphepha yo aka tindhawu letintshwa to gandzela. Leswi mavandlha yo tala a ma andza hi ku hatlisa, rhavi ri simeke Ndzawulo yo Aka Tiholo ta Mfumo (leyi sweswi yi vitaniwaka Ndzawulo yo Pulana ni ku Aka ya le Tikweni) leswaku yi langutela xilaveko lexi xa xihatla.

Yin’wana ya tindhawu to sungula ku vuyeriwa eka tsima leri, lerintshwa ro aka i Xihlala xa Nias lexi nga eNorth Sumatra. Haogo’aro Gea, xirho xa Vandlha ra Gunungsitoli lexi nga ni nkarhi wo leha u ri: “Loko hi twa leswaku hi ta va ni Holo ya Mfumo leyintshwa, a hi tsakile swinene. Rhavi ri rhumele vatirhi va nkombo va ku tirhandzela leswaku va ta langutela tsima leri. Holo yi hele hi 2001.” Faonasökhi Laoli, xirho xa komiti yo aka ya kwalaho u ri: “Enkarhini lowu nga hundza a hi hlangana emakaya lamatsongo ya vamakwerhu naswona vaakatiko a va langutela Timbhoni ta Yehovha ehansi. Kambe hi ku hatlisa loko hi hete Holo ya Mfumo, nhlayo ya vanhu lava a va va kona eminhlanganweni yi andze ku suka eka 20 ku ya eka 40. Ku nga si hela tin’hweti ta 12, a yi andze hi tiphesente to tlula 500. Kwalaho ndhawu ya hina yo gandzela i ndhawu leyi xiximekaka naswona vaakatiko va xixima Timbhoni ta Yehovha.”

Holo ya Mfumo ya le Bandung

Hi 2006, eBandung, le West Java, vamakwerhu va sungule ku lava ndhawu leyi a va ta aka Holo yo sungula ya Mfumo edorobeni rero. Singap Panjaitan, nkulu loyi a a tirha eka komiti yo aka u ri: “Swi teke tin’hweti ta 12 leswaku hi kuma  ndhawu leyi fanelekaka. Kambe a hi lava vanhu va kwalomu ka 60 lava nga riki Timbhoni leswaku va hi nyika mpfumelelo eka tsima leri emahlweni ko va vatirhelamfumo va hi nyika phepha ro aka. Vanhu va 76 va ri seketerile tsima leri, ku katsa ni wansati un’wana loyi eku sunguleni a hi kaneta swinene. Loko holo yi herile, hi rhambe vaakelani va hina swin’we ni meyara wa le Bandung leswaku va ta yi vona. Meyara u te: ‘Ndhawu leyi ya vukhongeri, leyi baseke ni ku tlhela yi hleleka yi vekela tikereke hinkwato xikombiso lexi ti faneleke ti xi tekelela.’” Holo ya Mfumo leyi nga ni swithezi swimbirhi yi nyiketeriwe hi 2010.

Ku sukela hi 2001, ku akiwe Tiholo ta Mfumo to tlula 100 eIndonesia, kambe ni sweswi ka ha laveka leti engetelekeke.

^ ndzim. 3 Matimu ya Herawati Neuhardt ma kumeka eka Xalamuka! ya February 2011.

^ ndzim. 1 Sweswi xi vitaniwa Xikolo Xa Valanguteri Va Miganga Swin’we Ni Vasati Va Vona.