Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2015

Papila Leri Humaka Eka Huvo Leyi Fumaka

Papila Leri Humaka Eka Huvo Leyi Fumaka

Eka Vamakwerhu:

“Minkarhi hinkwayo hi nkhensa Xikwembu loko hi vulavula malunghana na n’wina hinkwenu eswikhongelweni swa hina, hikuva minkarhi hinkwayo hi tsundzuka ntirho wa n’wina wo tshembeka ni ku tikarhata ka n’wina ka rirhandzu ni ku tiyisela ka n’wina hikwalaho ka ntshembo lowu mi nga na wona eHosini ya hina Yesu Kreste emahlweni ka Xikwembu tlhelo Tata wa hina.” (1 Tes. 1:2, 3) Hakunene marito lawa yo saseka ma kombisa ndlela leyi hi titwaka ha yona ha n’wina! Hi nkhensa Yehovha hikwalaho ka n’wina ni hikwalaho ka ntirho lowunene lowu mi wu hetisisaka. Ha yini?

Lembe leri nga hundza, a mi khomekile hi ku endla ‘ntirho wo tshembeka’ ni “ku tikarhata ka n’wina ka rirhandzu” emintirhweni ya Mfumo. Vo tala va n’wina mi lave tindlela to ndlandlamuxa vutirheli bya n’wina. Van’wana va rhurhele ni ku ya tirha etindhawini, hambi ku ri ematikweni man’wana, lama nga ni xilaveko lexikulu xa vachumayeri va Mfumo. Van’wana va ndlandlamuxe vutirheli bya vona hi ku katseka entirhweni wo chumayela etindhawini ta mani na mani. Vo tala va susumeteleke ku teka vuphayona bya nkarhinyana hi nkarhi wa Xitsundzuxo, hi n’hweti ya ku endza ka mulanguteri wa muganga kumbe hi nkarhi wa tsima ro hlawuleka hi August 2014. Hambileswi swiyimo swa n’wina swi nga faniki, ha swi vona leswaku mi tirhela Yehovha hi mimoya-xiviri ya n’wina hinkwayo naswona ha mi bumabumela hikwalaho ka sweswo. (Kol. 3:23, 24) Hi ni xivangelo xo nkhensa Yehovha hikwalaho ka “ntirho wa n’wina wo tshembeka”!

Nakambe hi ku tlangela swinene “ku tikarhata ka n’wina  ka rirhandzu” malunghana ni ku akiwa ka miako yo hambana-hambana ya Mfumo emisaveni hinkwayo. Hi yi lava hi xihatla miako yo tano, tanihi leswi nhlayo ya vanhu va Yehovha yi yaka emahlweni yi engeteleka. (Esa. 60:22) Nhlohlorhi ya hina ya vahuweleri eka lembe leri nga hundza a yi ri 8 201 545, kasi hi xiringaniso hi fambisa tidyondzo ta Bibele ta 9 499 933 n’hweti ni n’hweti. Hikwalaho ka ku engeteleka loku, marhavi yo tala ma lava ku engeteriwa kumbe ku pfuxetiwa. Nakambe leswi swi vula leswaku hi lava Tiholo ta Mfumo leti engetelekeke! Hi nkarhi lowu fanaka, ku laveka tihofisi ta vuhundzuluxeri eswiphen’wini swo tala swa misava leswaku vahundzuluxeri va hina va ta tshama ni ku tirha endhawini leyi ku vulavuriwaka ririmi ra vona.

Xisweswo, hi nga tivutisa, ‘Xana ndzi nga endla yini leswaku ndzi seketela ntirho wo aka miako leyi?’ Van’wana va hina va nga ha kota ku tirha hi ku tirhandzela eka ntirho lowu wo aka. Kutani ku nga khathariseki leswaku hi ni vuswikoti byo aka kumbe a hi na byona, hinkwerhu hi ni lunghelo ro nyikela hi swilo swa hina swa nkoka eka matsima lawa ya risima. (Swiv. 3:9, 10) Hi nkarhi wa ku akiwa ka tabernakela, Vaisrayele va susumeteleke ku nyikela lerova ku kala ku endliwa xitiviso lexi va siveleke leswaku va nga ha nyikeli leswi engetelekeke. (Eks. 36:5-7) A swi kanakanisi leswaku swikombiso swo tano swa le Matsalweni swi khumba timbilu ta hina ni ku hi khutaza. Hi ni xivangelo xin’wana xo nkhensa Yehovha hikwalaho ka “ku tikarhata ka n’wina ka rirhandzu” entirhweni lowu wa nkoka wo kwetsima!

Hi ni xivangelo xo xo tsaka loko hi vona vamakwerhu va tiyisela. Hi xikombiso, ehleketa hi vamakwerhu lava rhandzekaka va le Korea Dzonga. Ku sukela hi 1950, vamakwerhu lava ha riki vantshwa va le ndhawini yoleyo va gweviwe ku tshama ekhotsweni malembe lama nga faniki hikwalaho ka leswi va nga hlanganyeliki etinyimpini. Vamakwerhu va tiyisele ku khomiwa hi ndlela yo tano, handle ko hela matimba.  Xikombiso xa vona xa ku tiyisela xi tiyisa ripfumelo ra hina!

Le Eritrea, vamakwerhu vanharhu va pfaleriwe malembe yo tlula 20. Van’wana, ku katsa ni vamakwerhu va xisati ni vana va vona, va pfaleriwe swa xinkarhana. Ku endliwe matshalatshala yo tala leswaku va ntshunxiwa, kambe matshalatshala wolawo a ma humelelanga. Vamakwerhu a va ri landzulanga ripfumelo ra vona. Va tshame va tshembekile ehansi ka swiyimo leswi koxaka vutomi bya vona. A hi va rivali eswikhongelweni swa hina vamakwerhu lava, lava tshembekaka.—Rhom. 1:8, 9.

I ntiyiso leswaku vo tala va n’wina a mi pfaleriwanga ekhotsweni hikwalaho ka ripfumelo ra n’wina. Nilokoswiritano, vo tala va n’wina mi tiyisela swiphiqo leswi fambisanaka ni ku dyuhala, vuvabyi lebyi nga tshungulekiki, nkaneto lowu humaka eka vanghana va vukati lava nga riki vapfumeri kumbe maxaka, swin’we ni swiphiqo swin’wana leswi nga ha endlekaka swi tiviwa hi n’wina ntsena. Kambe nilokoswiritano, mi ya emahlweni mi tirhela Yehovha hi ku tshembeka! (Yak. 1:12) Ha mi bumabumela hikwalaho ka sweswo. Hi ni xivangelo xin’wana xo nkhensa Yehovha hikwalaho ka ku tiyisela ka n’wina hi ku tshembeka.

I ntiyiso leswaku ntirho wa n’wina wo tshembeka ni ku tikarhata ka n’wina ka rirhandzu ni ku tiyisela ka n’wina ku hi nyika swivangelo leswinene swo “[nkhensa] Yehovha, hikuva hi lonene.” (Ps. 106:1) Entiyisweni ha mi rhandza hinkwenu ka n’wina naswona hi khongela leswaku Yehovha a mi tiyisa, a mi hlayisa ni ku mi katekisa leswaku mi n’wi tirhela hilaha ku nga heriki.

Vamakwenu,

Huvo leyi Fumaka ya Timbhoni ta Yehovha