Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2015

 DOMINICAN REPUBLIC

Ku Pfaleriwa Ni Ku Yirisiwa

Ku Pfaleriwa Ni Ku Yirisiwa

Va Pfaleriwe Hikwalaho Ko Ala Ku Ya eNyimpini

Enrique Glass ni khotso ra munyama leri a a pfaleriwe eka rona ku ringana mavhiki mambirhi

Hi June 19, 1949, ntlawa lowu a wu ri evuhlongeni wa vanhu lava humaka eDominican wu balekele eDominican Republic leswaku wu ringeta ku hlula mufumi Rafael Trujillo. Hambileswi nhlaselo wu sunguleke hi ku hatlisa, mfumo  wa Trujillo wu pfalele lava alaka ku ya enyimpini swin’we ni lava mfumo a wu va teka tanihi valala. Exikarhi ka Timbhoni to sungula leti pfaleriweke hileswi ti aleke ku ya enyimpini a ku ri na León, Enrique na Rafael Glass swin’we ni vatirhi-kulobye van’wana va León, lava na vona a va ri Timbhoni.

León u ri: “[Mina ni vatirhi-kulorhi] hi pfaleriwe ni ku konanisiwa hi maphorisa lama nga ambalangiki yunifomo. Endzhaku ka loko hi xungetiwile, hi ntshunxiwile kambe endzhaku ka masiku ma nga ri mangani hi vitaniwile leswaku hi ya entirhweni wa vusocha handle ko landzela endlelo leri tolovelekeke. Loko hi ala ku endla leswi a  va hi kombela swona, hi yisiwe ekhotsweni. Kwalaho hi kume Timbhoni tin’wana ta mune, leti timbirhi ta tona a ku ri buti wa mina ni ndzisana ya mina. Endzhaku ka loko hi ntshunxiwile, hi tlhele hi gweviwa. Leswi swi endleke ku ringana kanharhu, laha a hi ntshunxiwa siku kumbe masiku yo hlayanyana. Hi hete malembe ya kwalomu ka nkombo ekhotsweni, laha ro hetelela hi heteke malembe ya ntlhanu.”

‘Hambiloko hi biwa hi minkhavi kumbe tinhonga ni swibalesa, Yehovha u hi nyike matimba yo tiyisela’

Ku khotsiwa a ku ri ndzingo lowu vamakwerhu a va langutana na wona nkarhi ni nkarhi. Vakhotsiwa ni varindzi a va va tlhontlha vusiku ni nhlikanhi. Mukongomisi wa Fort Ozama, wa laha a va pfaleriwe kona ro sungula u te: “N’wina Timbhoni ta Yehovha, loko mi va timbhoni ta Diyavulosi, mi ndzi tivisa leswaku ndzi ta mi ntshunxa.” Hambiswiritano, vakaneti a va byi herisanga vutshembeki bya vamakwerhu volavo. León u hlamusele xivangelo xa kona a ku: ‘Minkarhi hinkwayo a hi ri ni matimba lama humaka eka Yehovha ya leswaku hi tiyisela naswona a hi swi vona leswaku Wa nghenelela leswaku a hi pfuna. Hambiloko hi biwa hi minkhavi kumbe tinhonga ni swibalesa, Yehovha u hi nyike matimba yo tiyisela.’

Timbhoni Ta Yehovha Ti Yirisiwa

Etikweni hinkwaro, valala va vugandzeri bya ntiyiso va ye emahlweni ni nxaniso wa vona. Nilokoswiritano, hi May 1950, a ku ri ni vahuweleri va 238 eDominican Republic, ku engetela eka nhlayo ya varhumiwa. Vahuweleri va 21 a va ri maphayona ya nkarhi hinkwawo.

Phepha-hungu leri tiviseke hi swigwevo swa vamakwerhu swo tshama ekhotsweni hikwalaho ko ala ku ya enyimpini

Hi nkarhi wolowo, phorisa leri nga ambaliki yunifomo ri tsalele Holobye ri ku: “Swirho swa vukhongeri bya mpambukwa wa Timbhoni ta Yehovha swi ya emahlweni hi ku  hiseka ni mintirho ya swona hinkwayo etikweni leri [ra Ciudad Trujillo].” Ri tlhele ri ku: “Nakambe mi fanele mi va ni vuxiyaxiya swinene eka Timbhoni ta Yehovha, tanihi leswi ku chumayela ka tona ni mintirho ya tona swi soholotaka swilo leswaku swi cinca mianakanyo ya vanhu, ngopfu-ngopfu mianakanyo ya vanhu lava tolovelekeke.”

Matsalana wa Tiko ni Maphorisa, J. Antonio Hungría, u kombele Makwerhu Brandt leswaku a rhumela papila leri kombisaka xiyimo xa Timbhoni eka ntirho wa vusocha, ku losa mujeko ni ku hakela swibalo. U tsale papila a tirhisa rungula leri nga ebukwini leyi nge “Let God Be True.” Nilokoswiritano, hi June 21, 1950, Matsalana Hungría u humese xileriso lexi yiriseke ntirho wa Timbhoni ta Yehovha eDominican Republic. Makwerhu Brandt u vitaniwe ehofisini ya Hungría leswaku a ya twa xileriso xexo hi ta yena. Makwerhu Brandt u vutise loko varhumiwa va boheka ku famba etikweni. Hungría u n’wi tiyisekise leswaku va nga  tshama ntsena loko va yingisa nawu naswona va nga vulavuli ni van’wana hi vukhongeri bya vona. *

^ ndzim. 1 Loko ka ha sale mavhiki leswaku ku humesiwa xileriso xexo, vafundhisi va Makhatoliki va tsale swihloko swo leha eka phepha-hungu va hehla Timbhoni ta Yehovha va vula leswaku ti fambisana ni makhomunisi.