Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2015

 DOMINICAN REPUBLIC

A Ti Yi Helo

A Ti Yi Helo

Va Kume Ntiyiso

Juana Ventura u sungule ku dyondza Bibele hi nkarhi lowu ntirho wo chumayela a wu yirisiwile naswona u khuvuriwe hi 1960 eNambyeni wa Ozama. Siku rin’wana, mufundhisi Santo Domingo u lave ku n’wi khomisa hikwalaho ko vula leswaku u n’wi “tekela vanhu lava nghenaka kereke yakwe.” Hi ku lava ku ringeta ku kombisa leswaku Timbhoni ta Yehovha i vahembi ni ku lava ku onha Juana vito, mufundhisi u n’wi kombele leswaku a ta ekerekeni yakwe leswaku a ta hlamula swivutiso malunghana ni vukhongeri byakwe lebyintshwa.

Juana u ri: “U ndzi vutise swivutiso swinharhu, a ku, ‘Ha yini mi nga vhoti? Ha yini mi nga yi enyimpini? Ha yini mi tivitana Timbhoni ta Yehovha?’ Loko ndzi ri karhi ndzi hlamula xivutiso xin’wana ni xin’wana hi ku tirhisa Bibele, vanhu hinkwavo lava nghenaka kereke yakwe va pfule tindzimana ta Bibele kutani va hlamarisiwa hileswi va swi hlayaka. Vo tala va vona va swi xiyile leswaku va kume ntiyiso. Ntlawa wolowo hinkwawo  wu sungule ku dyondza Bibele naswona eku heteleleni vanhu va 25 va tinyiketele eka Yehovha.” Xiendlakalo lexi xo hlamarisa xi endle leswaku ntirho wo chumayela wu ya emahlweni eSanto Domingo.

Timbhoni Ta Yehovha A Ti Yi Helo

Ku ve ni vuyelo byo tala lebyi nga riki byinene bya tipolitiki endzhaku ka loko Trujillo a dlayiwile. Buku Ya Lembe Ya 1963 yi vike yi ku: ‘Masocha a ma pfale switarata naswona switereka ni madzolonga a ku ri tshamelo-maxelo.’ Ku nga khathariseki nkwetlembetano wa tipolitiki, ntirho wo chumayela ni ku endla vadyondzisiwa wu ye emahlweni naswona eku heleni ka lembe ra ntirho ra 1963, ku fikeleriwe nhlohlorhi ya vahuweleri va 1 155.

Loko Nathan Knorr loyi a humaka entsindza wa misava hinkwayo wa Timbhoni ta Yehovha a endzela eDominican Republic hi 1962, u endle malunghiselelo ya leswaku ku xaviwa ndhawu leyi eka yona a ku ta akiwa miako leyikulu leyi a yi ta endla leswaku ntirho wo chumayela wu andza hi ku hatlisa. Endhawini yoleyo ku akiwe muako lowuntshwa wa swithezi swimbirhi swin’we ni Holo ya Mfumo. Hi Mugqivela wa October 12, 1963, Frederick Franz, muendzi un’wana loyi a humaka entsindza wa misava hinkwayo wa Timbhoni ta Yehovha, u nyikele nkulumo yo nyiketela miako leyintshwa ya rhavi. Swi le rivaleni leswaku Timbhoni ta Yehovha a ti tiyimisele ku ya emahlweni ti tshama eDominican Republic. Endzhakunyana ka loko yi nyiketeriwile, ku fike Harry na Paquita Duffield, ku nga varhumiwa vo hetelela ku hlongoriwa eCuba.

Ku Andza Ku Nga Khathariseki Vanhu Lava Pfukelaka Mfumo

Hi April 24, 1965, tiko ri hlaseriwe hi vanhu lava pfukelaka mfumo. Eka masiku wolawo ya nhlaselo lama landzeleke, vanhu va Yehovha va ye emahlweni va endla nhluvuko hi tlhelo ra moya. Hi 1970, a ku ri ni vahuweleri va 3 378 emavandlheni ya 63. Vanhu vo tlula hafu va nghene enhlengeletanweni eka malembe ya ntlhanu lama hundzeke. Buku Ya Lembe Ya  1972 yi vike yi ku: “I vanhu lava tirhaka mintirho yo hambana-hambana: Valunghisi va timovha, van’wamapurasi, vachayeri, van’watinkota, vaaki, vavatli, magqweta, madokodela ya meno ni khale ka van’watipolitiki; hinkwavo va hlanganisiwe hi ku rhandza ntiyiso na Yehovha.”