Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2015

 DOMINICAN REPUBLIC

Ntshembo Lowu Tsakisaka

Ntshembo Lowu Tsakisaka

Ndhuma Leyinene

Timbhoni ta Yehovha se ti ni malembe ya kwalomu ka 70 eDominican Republic. Hi nkarhi wolowo, ti ve ni ndhuma leyinene. Hakanyingi loko vahuweleri va ri ensin’wini vanhu va va tshinelela kutani va kombela minkandziyiso naswona swi tolovelekile ku twa vanhu ensin’wini va ku: “Ndzi rhandza vukhongeri lebyi” kumbe “N’wina mi hanya hi milawu ya Bibele.”

Hi xikombiso, xiya leswi endlekeke loko ku akiwa Holo ya Mfumo endhawini leyi nyikeriweke hi makwerhu. Loko makwerhu a ya eku tsariseni ka ndhawu yoleyo, u kume leswaku munhu un’wana u tirhise vukungundzwana a tsarisa ndhawu yoleyo kutani a hehla makwerhu hi ku vula leswaku u ringeta ku n’wi tekela yona. Mhaka yoleyo yi yisiwe ehubyeni. A ku ri nandzu lowu rharhanganeke hi ku va munhu loyi a ri ni maphepha lama kombisaka leswaku ndhawu yoleyo i ya yena.

Hikwalaho ka sweswo, muavanyisi u kombele gqweta leswaku ri boxa munhu loyi ri n’wi yimelaka. Loko gqweta ri hlamusele leswaku ri yimela nhlengeletano ya Timbhoni ta Yehovha, muavanyisi u hlamule a ku: “Loko ku ri hileswaku swi tano, a ku na xivangelo xo kanakana ntiyiso lowu vuriwaka hi Timbhoni. Ndza ti tiva Timbhoni ta Yehovha naswona ndza swi tiva leswaku ti tshembekile. A ti nge pfuki ti ringete ku kanganyisa munhu naswona a ti nge teki nchumu lowu nga riki wa tona.”

Loko ku nyikeriwe vumbhoni ehubyeni, swi ve erivaleni leswaku muhehliwa a tirhise maphepha ya vukanganyisi, kutani muavanyisi u yime ni Timbhoni. Mbhoni leyi nga gqweta yi te: “Nandzu wo fana ni lowu a hi wo sungula. Etikweni hinkwaro loko Timbhoni ta Yehovha ti ya ehubyeni, minkarhi hinkwayo ti xiximiwa swinene hikwalaho ka ndlela leyi ti tikhomaka ha yona.”

 Ku Andza Loku Nga Ta Va Kona eNkarhini Lowu Taka

Hi ku famba ka nkarhi a swi ta vonaka leswaku i vanhu vangani lava nga ni timbilu letinene lava a va ta dyondza ntiyiso wa Bibele kutani va va vagandzeri va Xikwembu xa ntiyiso. Hi nkarhi wolowo, a ku endliwa matshalatshala ya leswaku ku fikeleriwa vanhu vo tano. Hi xikombiso, hi 2013 Timbhoni ta Yehovha ta le Dominican Republic ti hete tiawara to tlula 11 wa timiliyoni ti ri karhi ti chumayela naswona ti fambise tidyondzo ta Bibele ta 71 922. A swi khutaza swinene ku vona vahuweleri va 9 776 va nghenela ntirho wa vuphayona. Hi August ya lembe rero, vahuweleri va 35 331 va hlanganyele hi ku hiseka entirhweni wo chumayela. Ku tlula kwalaho, swa tshembisa leswaku ku ta va ni andza enkarhini lowu taka hikwalaho ka leswi ku veke ni vanhu va 127 716 eXitsundzuxweni.

Ntirho wo chumayela ni wo endla vadyondzisiwa eDominican Republic wu ya emahlweni ninamuntlha ku sukela loko wu sunguriwe hi Sonto ya April 1945, loko Lennart na Virginia Johnson va fika ro sungula kutani va sungula ku chumayela mahungu lamanene ya Mfumo. Timbhoni ta Yehovha eDominican Republic ti yi teka yi ri ya risima ndzhaka ya tona ya moya. Ti tlangela matshalatshala lama endliweke hi vagandzeri va ntiyiso va le nkarhini lowu hundzeke. Ku tlula kwalaho, sweswi ti tiphina hi lunghelo leri ti nga na rona ra “ku nyikela vumbhoni bya rixaladza malunghana ni Mfumo wa Xikwembu.” (Mint. 28:23) Ti ri langutele hi mahlo-ngati siku leri vanhu hinkwavo exihlaleni lexi ku katsa ni vagandzeri-kulobye emisaveni hinkwayo va nga ta hlanganyela swin’we eku yimbeleleni ka risimu leri nge: “Yehovha i Hosi! Misava a yi tsake. Swihlala swo tala a swi tsake.”—Ps. 97:1.