Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2015

 DOMINICAN REPUBLIC

“Ndzi Lwe Ku Fana Ni Nghala”

Luis Eduardo Montás

“Ndzi Lwe Ku Fana Ni Nghala”
  • U VELEKIWE HI 1906

  • U KHUVURIWE HI 1947

  • MATIMU YAKWE HI KU KOMISA Khale ka mutirhela-mfumo eka vandla ra tipolitiki ra Rafael Trujillo. U dyondze ntiyiso wa le Bibeleni naswona u tirhele Yehovha hi ku tshembeka ku fikela loko a fa hi 2000.

LUIS loyi a nga xaka ra Trujillo, a a ri n’watinkota evandleni leri fumaka ra politiki leri vuriwaka Partido Dominicano (ku nga Vandla ra Dominican). Hambiswiritano, xikongomelo-nkulu xa vandla ra Trujillo a ku ri ku chavisa Luis naswona hambiloko a tshamela ku ringeta ku tshika ntirho, murhangeri a a nga pfumeli.

Loko Trujillo a endle leswaku vabuti wa Luis vambirhi va dlayiwa, Luis u ringete kambirhi ku dlaya murhangeri loyi. Hambiswiritano, kungu rakwe a ri humelelanga. Luis u kale a endzela ni swingomatanda leswaku swi ta n’wi pfuna ku dlaya munhu loyi, loyi a vuleke leswi landzelaka malunghana na yena: “U hanya ku fana ni xivandzana naswona u ti teka a ri wa nkoka ku tlula vanhu hinkwavo.” Loko a ri endlwini ya xingomantanda xin’wana, u vone buku leyi nge, “The Truth Shall Make You Free” leyi a yi ri etafuleni ivi a sungula ku yi hlaya. Luis u yi tsakele swinene buku yoleyo lerova u fambe na yona ekaya naswona hi ku famba ka nkarhi u gimete hi ku vula leswaku lebyi hi byona vukhongeri bya ntiyiso lebyi a a ri karhi a byi lava.

 Loko Luis a endzele le Ciudad Trujillo, u ye eminhlanganweni ya Timbhoni ta Yehovha laha a nga kuma tibuku ni timagazini to hlayanyana. U hete vusiku hinkwabyo a ri karhi a hlaya minkandziyiso leyi naswona endzhakunyana u kombele ku dyondzeriwa Bibele. Loko a ri karhi a endla nhluvuko, Luis u teke xiboho xa ku tshika vandla ra Trujillo. Loko murhangeri a twa sweswo, u nyike Luis xikhundlha xa ku va muyimeri wa tiko ra Dominican le Puerto Rico. Kambe Luis u arile, hambileswi a a swi tiva leswaku sweswo a swi ta endla leswaku a xanisiwa.

Luis u te: “Ndzi xanisiwe hi tindlela to hambana-hambana naswona mfumo wu ndzi rhiyele mintlhamu yo tala. Kambe ndzi endle xiboho xo ka ndzi nga titsakisi hi swa misava leyi.” Luis u ve muhuweleri la hisekaka wa mahungu lamanene lerova vafundhisi va Khatoliki va n’wi thye vito va ku, “i muchumayeri.” Luis u khuvuriwe hi October 5, 1947, endzhaku ka tin’hweti ta tsevu loko a ta ve a ye eminhlanganweni ro sungula.

Endzhaku ka loko a khuvuriwile Luis u hlotiwile ivi a khomiwa ni ku pfaleriwa a ri yexe. U khomiwe ko hlaya evuton’wini byakwe. Kambe, nkarhi ni nkarhi loko a khomiwa ni ku yisiwa ehubyeni, a a tirhisa nkarhi wolowo ku chumayela. Luis u te: “Ndzi lwe ku fana ni nghala leswaku ndzi sirhelela ripfumelo ra mina, naswona ndzi khapakhapa mihloti ya ntsako loko ndzi tsundzuka xiyimo xexo.”

Ndhuma ya Luis tanihi nandza wo tshembeka wa Xikwembu yi xiyiwile hi vanhu va tiko. Hi 1994, phepha-hungu ra le Dominican leri vuriwaka El Siglo ri vule leswi landzelaka malunghana na Luis: “Nkulukumba Luis Eduardo Montás u tiviwa eSan Cristobal a ri munhu la hlutekeke emianakanyweni. I munhu la nga ni nyiko, la twelaka van’wana vusiwana naswona i munhu la rhuleke. Hinkwaswo leswi tiviwaka hi yena eka matimu ya le San Cristobal swi fambisana ni ntirho wakwe tanihi Mukreste.”