Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2015

 DOMINICAN REPUBLIC

Ku Va eKhombyeni Ro Khomiwa

Ku Va eKhombyeni Ro Khomiwa

“Vanani Ni Vuxiyaxiya Kukota Tinyoka Naswona Mi Kala Nandzu Kukota Matuva”

A swi ri swa nkoka leswaku malandza yo tshembeka ya Yehovha ma hambeta ma kuma swakudya swa moya hi nkarhi lowu ntirho wo chumayela a wu yirisiwile, kambe a ku ri nkarhi wa khombo eka vagandzeri va ntiyiso etikweni. Emalembeni wolawo, vamakwerhu vo tala va khomiwile kutani va gweviwa ku tshama ekhotsweni ku ringana minkarhi yo hlayanyana.

Juanita Borges u ri: “Loko ndzi dyondza ntiyiso hi 1953, a ndzi swi tiva kahle leswaku tanihi Mbhoni ya Yehovha a ndzi ri ekhombyeni ro khomiwa. Kutani sweswo hi swona leswi nga endleka. Hi November 1958, loko ndzi endzele Makwerhu wa xisati Eneida Suárez, ku te maphorisa lama nga ambalangiki yunifomo kutani ma hi hehla hi leswaku hi khoma minhlangano. Hi gweviwe ku tshama ekhotsweni tin’hweti tinharhu naswona ha un’we wa hina a fanele a hakela 100 wa ti-peso—leti hi nkarhi wolowo a ti ri mali leyi ringanaka ni tidolara ta 100 ta le United States.”

Maphorisa lama nga ambaliki yunifomo a ma hlayisa nxaxamelo wa rungula ra vuxokoxoko bya vamakwerhu.

 Mfumo wu endle hinkwaswo leswi wu nga swi kotaka leswaku wu tshikisa Timbhoni ku hlangana swin’we kambe vamakwerhu a va helanga matimba. Hambiswiritano, a va fanele va va ni “vuxiyaxiya kukota tinyoka naswona [va] kala nandzu kukota matuva.” (Mat. 10:16) Andrea Almánzar u ri: “Loko hi ya eminhlanganweni a hi fanele hi fika hi minkarhi yo hambana. Kutani, hakanyingi a hi suka nimixo swinene hikuva a hi fanele hi hatla hi famba leswaku hi papalata ku ehleketeleriwa.”

Jeremías Glass, loyi a velekiweke loko tata wakwe León a ri ekhotsweni, u ve muhuweleri hi 1957 loko a ri ni malembe ya nkombo. U tsundzuka minhlangano ya le xihundleni leyi a yi khomeriwa eka vona ni magoza lawa va ma tekeke leswaku va papalata ku khomiwa. Jeremías u ri: “Hinkwavo lava a va va kona a va nyikiwa xibokisana lexi a xi ri ni nomboro leyi kombisaka ndlela leyi va faneleke va famba ha yona. Loko minhlangano yi hela, tatana a ndzi veka enyangweni leswaku ndzi kamba tinomboro eka xibokisana kutani a byela lava fambaka leswaku va famba hi vambirhi-mbirhi va tirhisa tindlela leti hambaneke.”

Goza rin’wana a ku ri ku endla leswaku xiyimiso xa minhlangano xi va hi minkarhi leyi hi nga taka hi nga khomiwi. Hi xikombiso, Mercedes García u dyondzisiwe ntiyiso hi malume wakwe Pablo González. Loko a ri ni malembe ya nkombo, mana wakwe u file loko hi hala tlhelo tata wakwe a ri ekhotsweni, a siya yena swin’we ni vamakwavo vakwe va kaye va ri voxe. Mercedes u khuvuriwe hi 1959 loko a ri ni malembe ya kaye. Leswaku va papalata ku khomiwa, vamakwerhu va endle leswaku nkulumo ya nkhuvulo yi va hi 3:30 matakuxa. Nkulumo yi khomeriwe ekaya ra makwerhu kutani nkhuvulo wu endleriwa eNambyeni wa Ozama lowu khulukaka endzeni ka ntsindza. Mercedes u ri: “A hi ri karhi hi tlhelela ekaya hi 5:30 nimixo loko vanhu lavan’wana hinkwavo va sungula ku pfuka.”