Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2015

 DOMINICAN REPUBLIC

A Ndzi Lava Ku Tshika Ku Tirhela Xikwembu

Martín Paredes

A Ndzi Lava Ku Tshika Ku Tirhela Xikwembu
  • U VELEKIWE HI 1976

  • U KHUVURIWE HI 1991

  • MATIMU YAKWE HI KU KOMISA Martín a dyondzela ku va mufundhisi loko a dyondza ntiyiso. Ku sukela kwalaho, u pfune vanhu vo tala leswaku va va vagandzeri va ntiyiso.

NDZI kulele endyangwini lowu a wu tinyiketele hi ku helela eKerekeni ya Khatoliki lerova wu lava leswaku ndzi va mufundhisi. Kutani loko ndzi ri ni malembe ya 12, ndzi dyondze tikhoso tinharhu leti a ndzi dyondzisiwa hi vafundhisi vo hambana-hambana. Xisweswo, hi 1990, loko ndzi ri ni malembe ya 14, ndzi vitaniwe eka xin’wana xa swikolo swo dyondzela vufundhisi leswi dumeke swinene etikweni.

Ndzi endle nhluvuko hi ku hatlisa naswona ndzi byeriwe leswaku loko ndzo hambeta ndzi tinyiketela, ndzi nga va bixopo. Hambiswiritano, ndzi sungule ku hela matimba. Ematshan’weni yo va hi dyondzisiwa Bibele, a hi dyondzisiwa filosofi. Nakambe, vafundhisi a va tikhome hi ndlela yo biha swinene. Loko va sungula ku ndzi xanisa hi timhaka ta masangu, ndzi lave ku tshika ku tirhela Xikwembu.

Hi nkarhi wolowo, mpatswa lowu nga varhumiwa wu endzele n’watinkota wa le xikolweni xo dyondzela vufundhisi kutani wu n’wi nyika buku leyi nge, Swivutiso Leswi Vantshwa Va Swi Vutisaka—Tinhlamulo Leti Tirhaka. Ndzi yi lombile kutani ndzi yi hlaya hinkwayo.  Ndzi tibyele ndzi ku, ‘Leswi hi swona leswi a ndzi swi lava.’ Ndzi tshike xikolo xo dyondzela vufundhisi kutani ndzi sungula ku dyondza ni Timbhoni naswona ndzi sungule ku ya eminhlanganweni. Ndzi khuvuriwe endzhakunyana ka tin’hweti ta nhungu hi July 1991. Ndzi sungule ku va phayona ra nkarhi hinkwawo naswona endzhakunyana ndzi tekane na makwerhu wa xisati loyi a nga phayona loyi a vuriwaka María. Ku sukela hi 2006, hi ve maphayona yo hlawuleka. Ematshan’weni yo tshika ku tirhela Xikwembu, sweswi ndzi pfuna vanhu lava nga ni ndlala ya ntiyiso leswaku va va vagandzeri vakwe va ntiyiso.