Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2015

 DOMINICAN REPUBLIC

Ku Tiyisela Swi Tisa Ntshunxeko

Ku Tiyisela Swi Tisa Ntshunxeko

Ku Chumayela Hi Vuxiyaxiya

Rafael Pared, loyi a tirhaka eBethele ni nsati wakwe Francia, u ve muhuweleri hi 1957 loko a ri ni malembe ya 18. U tsundzuka nkarhi lowu maphorisa lawa a ma nga ambalanga yunifomo a ma hamba ma n’wi landzelela loko a ya eku chumayeleni, ma lava ndlela yo n’wi khoma yena swin’we ni lava a famba na vona. Rafael u ri: “Minkarhi yin’wana a hi boheka ku famba hi switarata swin’wana kutani hi tlula tidarata leswaku hi papalata ku khomiwa.” Andrea Almánzar u hlamusela leswi yena swin’we ni van’wana va swi endleke leswaku va nga khomiwi, u ri: “Hi tirhise vuxiyaxiya. Ensin’wini a hi chumayela yindlu yin’we kutani hi tlula khume ra tindlu hi nga si chumayela eka yin’wana.”

Hi Ntshunxeka Eku Heteleleni!

Hi 1959, mfumo wa Trujillo se a wu ri ni malembe ya 30 wu ri karhi wu fuma, kambe xiyimo xa tipolitiki a xi cinca. Hi June 14, 1959, vanhu va le Dominican lava a va ye evutumbelweni va vuye va ta hlasela tiko ra Dominican Republic leswaku va ringeta ku hlula Trujillo. Hambileswi nhlaselo wolowo wu siveriweke naswona lava boheke xikungu va dlayiweke kumbe ku khotsiwa, valala va Trujillo lava a va ya va andza va xiye leswaku mfumo wakwe a wu nga ri na matimba kutani va nyanyise nkaneto wa vona.

Hi January 25, 1960 endzhaku ka malembe wu ri karhi wu tirhisana ni mfumo wa Trujillo, ntlawa wa vafundhisi va Kereke ya Khatoliki wu tsale papila wu lwisana ni mhaka ya ku bakanyeriwa etlhelo ka timfanelo ta vanhu. N’wamatimu Bernardo Vega loyi a humaka eDominican, u ri: “Nhlaselo lowu veke kona hi June 1959 ni ku lwisana loku veke kona ni vanhu lava katsekeke eka rhengu rolero, wu sindzise Kereke leswaku yi nghenelela nyimpi yo lwisana na Trujillo.”

Lexi tsakisaka, hi May 1960 mfumo wu herise ku yirisiwa ka Timbhoni ta Yehovha. Endzhaku ka loko ti yirisiwe malembe yo tala, ti kume mpfuno ti nga swi langutelanga eka Trujillo endzhaku ka loko a lwisane ni Kereke ya Khatoliki.