Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2015

 KU CHUMAYELA NI KU DYONDZISA VANHU EMISAVENI HINKWAYO

Yuropa

Yuropa
  • MATIKO 47

  • VAAKA-TIKO 741 311 996

  • VAHUWELERI 1 611 036

  • TIDYONDZO TA BIBELE 847 343

Tlilasi Yi Endzela eHolweni Ya Mfumo

Finland: Vana va le ka gredi ya vumune va endzele eHolweni ya Mfumo

Ines, n’wana wa xikolo loyi a nga eka gredi ya vumune eFinland, u twe leswaku tlilasi leyi a nga eka yona a yi ta bula hi Timbhoni ta Yehovha tanihi xiphemu xa yona xa ndzetelo wa vukhongeri, kutani u endle xiboho xo rhamba tlilasi leswaku yi endzela eHolweni ya Mfumo. Swichudeni ni mudyondzisi va pfumerile.

Eka vhiki leri landzelaka, vana va xikolo va 38 va fambe hi swikanyakanya swa vona va ya eHolweni ya  Mfumo leyi ku ya eka yona swi tekaka kwalomu ka tikhilomitara ta ntlhanu. Vadyondzisi vambirhi ni nhloko ya xikolo na vona va yile. Va hlangane ni vamakwerhu vambirhi va xinuna ni vamakwerhu vanharhu va xisati eHolweni ya Mfumo. Loko va ri karhi va miyeta nyoka ni ku tima torha, vana va xikolo va vutise swivutiso malunghana ni holo swin’we ni Timbhoni: “Xana ku endliwa yini eminhlanganweni?” “Xana kamara leriya i yini?” A va kombetela eka layiburari. “Ha yini ‘tsevu leyi nga ekhumbini yi avanyisiwe hi khume?’” Ndzimana ya lembe a ku ri Matewu 6:10.

Leswi xikolo a xi katseka eka tsima ro sivela ku xanisiwa ka vana exikolweni, vamakwerhu va kombe tlilasi vhidiyo ya tipopayi leyi nge Hlula Munhu Wa Tinyimpi U Nga Kalanga U Lwa Na Yena eka jw.org. Va tlhele va yi komba swiyenge swin’wana eka Web site ya hina ni ku yi tlangela risimu ra Mfumo. Riendzo ra vona ri hete kwalomu ka awara.

Nhloko ya xikolo, vadyondzisi ni vana va tsakisiwe hi riendzo rero. Nhloko ya xikolo yi tsakele rungula leri nga eka Web site ya hina hikuva a yi vona onge ri nga tirhisiwa hi nkarhi wa tidyondzo ta vukhongeri. Swi yi tsakisile ku twa leswaku titlilasi tin’wana na tona ti ntshunxekile ku endzela eHolweni ya Mfumo. Hikwalaho ka sweswo, mudyondzisi wa tlilasi yin’wana u vulavurisane ni Timbhoni hi siku leri landzelaka a kombela loko swi ta koteka leswaku na yona yi endzela eholweni.

U Kume Nchumu Wa Risima eNdhawini Yo Lahlela Thyaka

Cristina, loyi a tshamaka eRomania, a nga nghenanga xikolo kutani a a nga swi koti ku hlaya kumbe ku tsala. A a swerile swinene kutani a tihanyisa hi ku lava swikotela ni mabodlhela ya tipulasitiki endhawini yo lahlela thyaka ya le dorobeni rolero. Siku rin’wana loko a ri karhi a endla leswi, u kokiwe mahlo hi nchumu wo karhi—a ku ri nkandziyiso lowu sekeriweke eBibeleni lowu a wu ri ni swifaniso swo saseka swa vanhu lava tsakeke. U tibyele leswi, ‘Vanhu vo tano va fanele va ri kona endhawini yo karhi laha misaveni.’ Cristina a a lava  ku tiva leswi minkandziyiso yoleyo a yi vulavula hi swona, kutani u kombele un’wana leswaku a n’wi hlayela yona. Loko a twa leswaku minkandziyiso yoleyo a yi vulavula hi timhaka ta vukhongeri, u ve ni gome hileswi vanhu va cukumeteke rungula leri vulavulaka hi Rito ra Xikwembu endhawini yo lahlela thyaka. Cristina u hambete a ya endhawini yo lahlela thyaka a ya rhwalela tibroxara, swiphephana ni timagazini. Yin’wana ya yona a yi helerile kasi yin’wana a yi  handzuleriwile. U dyondze ku hlaya leswaku a ta twa leswi engetelekeke eka minkandziyiso yoleyo.

Endzhakunyana, Cristina u endzele hi Timbhoni naswona u sungule ku dyondzeriwa Bibele. Swi n’wi tsakise swinene ku tiva leswaku Yehovha u n’wi kokele eka yena hi ku tirhisa minkandziyiso leyi van’wana va nga vangiki na mhaka na yona. U ya eminhlanganweni ya vandlha naswona u tsakisiwa hileswi a swi dyondzaka. Nchumu wun’wana lowu n’wi tsakisaka swinene hileswi sweswi a nga ni timagazini letintshwa, tibuku ni tibroxara. A nga ha boheki ku ya ti lava endhawini yo lahlela thyaka. Hakunene, Cristina u kume nchumu wa risima endhawini yo lahlela thyaka!

Dyondzo Ya Bibele Ya Le “Khwatini”

Jarimani: Margret a ri karhi a fambisa dyondzo ya Bibele ekhwatini

Mixo wun’wana ni wun’wana Margret u famba ni mbyana yakwe ekhwatini leswaku a tiolola eJarimani. U ri: “Ndzi ringeta ku vulavula ni vanhu lava hundzaka hi ndlela. Loko va nga jahanga, ndzi bula na vona hi Bibele.”

Siku rin’wana u hlangane ni wansati loyi a nga ni malembe ya kwalomu ka va-70 loyi na yena a a famba ni mbyana. Margret u sungule bulo ni wansati yoloye. Wansati yoloye u tsakisiwe hi bulo rero kutani a byela Margret leswaku siku ni siku u khongela Xikwembu a tlhela a hlaya Bibele. Ku sukela kwalaho, a va hlangana siku ni siku kutani va bula hi timhaka ta le Bibeleni. Siku rin’wana wansati yoloye u vutise Margret a ku: “Swi tisa ku yini leswaku u tiva swo tala hi Bibele?” Margret u hlamusele leswaku i Mbhoni ya Yehovha.

Ku ringana minkarhi yo hlayanyana Margret a ri karhi a kombela wansati yoloye leswaku a va ni dyondzo ya le kaya ya Bibele na yena, kambe a swi ba hi makatla. Hambiswiritano, va ye emahlweni ni mabulo ya vona. Endzhaku ka tin’hweti to karhi, Margret u tlhele a kombela ku va ni dyondzo ya le kaya na yena ya Bibele. Enkarhini lowu wansati u boxe  leswaku a a chava ku dyondza hikuva nuna loyi a a tshama na yena a a nga ti rhandzi Timbhoni ta Yehovha.

Enkarhini lowu landzeleke loko Margret a ya ekhwatini leswaku a ya tiolola, u teke Bibele ni buku leyi nge Leswi Bibele Yi Swi Dyondzisaka a famba na swona. Loko a vona wansati yoloye, hi xivindzi Margret u te: “Sweswi a ndzi ku kombeli leswaku hi va ni dyondzo ya le kaya ya Bibele kambe ndzi kombela leswaku hi va ni dyondzo ya Bibele ya le ‘khwatini.’” Wansati yoloye u nambe a yi amukela a ri karhi a xiririka mihloti. U ya eka dyondzo yakwe ya Bibele ya le “khwatini” ku ringana masiku ya tsevu evhikini. Swi titshege hi nguva ni maxelo, minkarhi yin’wana Margret u boheka ku fambisa dyondzo a funengele xambhulele kumbe a lumeke thoci.

Ku Hlakahla Nhloko Loku Nga Twisisekiki

Makwerhu wa xisati loyi a vuriwaka Delphine a a dyondza Bibele na Irina le Bulgaria. Irina a a swi tsakela leswi a swi dyondza naswona nkarhi na nkarhi a va kona eminhlanganweni. Hambiswiritano nuna wa Irina a a nga swi tsakeli leswaku a tihlanganisa ni Timbhoni. U rhurhise ndyangu wakwe wu ya eximutanini xa le Sweden, kutani Irina a nga ha swi kotanga ku tihlanganisa na Delphine. Hambiswiritano, maphayona mambirhi, ku nga Alexandra na Rebecca, va hlangane na Irina, loyi a nga xi tivi Xisweden. Vamakwerhu lava vambirhi va tirhise xibukwana lexi nge Good News for People of All Nations kutani va pfumelela Irina a hlaya rungula hi Xibulgaria. Endzhaku ka sweswo, hi ku pfuniwa hi xibukwana, va n’wi vutise loko a lava ku kuma minkandziyiso hi ririmi rakwe. Irina u hlakahle nhloko swinene a yi yisa eximatsini ni le xineneni. Vamakwerhu va suke va famba, va gimeta hileswaku a a nga swi tsakeli.

Endzhakunyana Alexandra u tsundzuke leswaku Linda, loyi ku nga makwerhu wa xisati loyi a vulavulaka Xisweden loyi a a tirha eBulgaria, a a ta endza eka mavhiki ma nga ri mangani. U ehlekete leswaku kumbexana Irina a a ta swi tsakela loko a twa ntiyiso hi ririmi rakwe. Loko Linda a fika, yena na  Alexandra va endzele Irina. Irina u byele Linda leswaku a khongela Yehovha vusiku byin’wana ni byin’wana, a n’wi kombela leswaku a n’wi pfuna a kota ku ya emahlweni ni dyondzo yakwe ya Bibele. Hakanyingi a a famba ni buku yakwe leyi nge Leswi Bibele Yi Swi Dyondzisaka ya Xibulgaria. A a lava ku yi komba Timbhoni loko o tshuka a hlangane na tona exitarateni, kambe a nga si tshama a ti vona nikan’we. Hakunene Irina a a tsakile loko a kuma minkandziyiso leyi engetelekeke hi Xibulgaria!

Linda u vutise Alexandra leswaku ha yini eka riendzo ro sungula a gimete hileswaku Irina a a nga tsakeli. Alexandra u hlamusele leswaku u hlakahle nhloko ku kombisa leswaku a a nga tsakeli. Linda u n’wayiterile kutani a hlamusela leswaku vanhu va le Bulgaria va hlakahla tinhloko ta vona ti ya ehenhla ni le hansi ku kombisa leswaku a va pfumeli kasi va ti yisa ematlhelo ku kombisa leswaku va pfumela. Kutani kukondza a dyondza Xisweden, Irina u ya emahlweni ni dyondzo yakwe ya Bibele hi Xibulgaria. Njhani? U tlhele a hlangana na Delphine naswona va dyondza hi ku tirhisa endlelo ro vulavurisana ni munhu mi langutanile eka xitirhisiwa xa elektroniki.

Tatana Loyi A Nga Xikombiso Lexinene

Jemima, loyi a tshamaka eSpain, u dyondzisiwe ntiyiso loko a ha ri ntsongo. Hambiswiritano, loko a va ni malembe ya nkombo vutomi byakwe byi cincile swinene. Mana wakwe u endle xiboho xa leswaku a nga ha swi lavi ku va Mbhoni ya Yehovha kutani a thala tata wakwe. Loko a va ni malembe ya 13, Jemima u tshike ku tihlanganisa ni Timbhoni kutani a ala leswaku tata wakwe a n’wi pfuna ku va ni vuxaka ni Xikwembu.

Loko Jemima a ri karhi a kula, u sungule ku katseka eka timhaka ta ntshamisano ni ta tipolitiki, a lava leswaku vanhu va kombisiwa “vululami.” Endzhakunyana, loko a heleriwe hi ntirho, tata wakwe, Domingo, u n’wi nyike ntirho wo penda, lowu a ta wu endla na yena.

 Siku rin’wana loko va ri karhi va tirha swin’we, Domingo u kombele ku dyondza Bibele na Jemima. Hambiswiritano, u arile a vula leswaku loko a tsakela, u ta n’wi tivisa. Domingo a a yingisela Bibele ni timagazini leti rhekhodiweke loko a ri karhi a penda, kambe n’wana wakwe a rhandza ku yingisela vuyimbeleri bya pop hi ku tirhisa selfoni yakwe.

Hi November 2012, Domingo, loyi se a tlhele a teka, u rhambiwe ku ya eXikolweni Xa Bibele Xa Mimpatswa Leyi Nga Vakreste. Jemima a a tsakile ku tiva leswaku tata wakwe a ta ya exikolweni xa Bibele ku ringana tin’hweti timbirhi kutani a siya hinkwaswo a ya laha a ta rhumeriwa kona. A ku ri ro sungula, Jemima a xiya ndlela leyi ntiyiso a wu dzime timitsu ha yona embilwini ya tata wakwe kutani a a lava ku tiva leswaku ha yini swi ri tano.

Jemima u tshike ku yingisela vuyimbeleri byakwe kutani a sungula ku yingisela leswi a swi yingiseriwa hi tata wakwe. Nakambe u sungule ku vutisa swivutiso. Siku rin’wana loko Domingo a ri ehenhla ka xitepisi a ri eku pendeni, Jemima u te: “Xana wa tsundzuka loko ndzi ku byela leswaku ndzi ta ku tivisa loko ndzi lunghekele ku dyondza Bibele? Se ndzi lunghekile.”

Domingo a a tsakile loko a twa leswi. Hi January 2013, va sungule ku dyondza swin’we kambirhi hi vhiki. Xikolo xi sungule hi April naswona u ye emahlweni a fambisa dyondzo hi ku tirhisa endlelo ro vulavurisana ni munhu mi langutanile eka xitirhisiwa xa elektroniki. Jemima u ve kona loko a thwasa naswona u wu tsakele swinene nongonoko. Jemima u khuvuriwe hi December 14, 2013.

Jemima u ri: “Yehovha u ndzi lehisele mbilu swinene naswona ndza swi tiva leswaku a nga ndzi tshikanga nikan’we. U ndzi nyike leswi a ndzi nga si tshama ndzi swi kuma emisaveni—vanghana va xiviri. Vamakwerhu lava nga kona emisaveni hinkwayo va endla leswaku ndzi ya ndzi ri tlangela swinene rirhandzu lerikulu ra Yehovha.”

 Ku Va Ni Xichavo Swa Vuyerisa

Hi March 30, 2014, Vasilii, loyi ku nga khale a ri xirho xa Bethele eRhaxiya, a a ri karhi a chumayela hi ku tirhisa xigolonyana xa minkandziyiso ekusuhi ni rhavi loko movha wa maphorisa wu n’wi tshinelela. Phorisa ri humile emovheni kutani hi musa ri kombela Vasilii leswaku a tshika leswi a a ri karhi a swi endla, tanihi leswi vaakelani van’wana a va vilela. Phorisa rin’wana ri teke vhidiyo ya leswi a swi ri karhi swi endleka. Vasilii u endle xiboho xa leswaku a swi ta va swinene ku yingisa phorisa rero kutani a nga holovi na rona malunghana ni timfanelo takwe. Hi nkarhi wolowo, vahundzi va ndlela vo hlayanyana va yimile va lava ku vona leswaku ku endleka yini. Vasilii u suke a famba, kambe endzhaku ka masiku mambirhi u kombele ku hlangana ni murhangeri wa maphorisa. Xikombelo xakwe xi amukeriwile. Loko va hlanganile, Vasilii u nkhense murhangeri wa maphorisa hikwalaho ka ntirho wa nkoka lowu maphorisa ma wu endlelaka vaaki ni ndlela ya musa leyi ma vulavuleke na yena ha yona eka masiku mambirhi lama hundzeke. Murhangeri wa maphorisa u hundzuluke a languta mupfuni wakwe a ku: “Eka malembe hinkwawo ya 32 lawa ndzi ma heteke ndzi tirha laha, a ndzi si tshama ndzi twa munhu a hi nkhensa hikwalaho ka ntirho wa hina!” Loko va ri karhi va bula, murhangeri wa maphorisa u pfuniwe ku twisisa leswaku ntirho wa hina wo chumayela endhawini ya mani na mani a wu nga lwisani na nawu hi ku helela. Murhangeri wa maphorisa u vutise Vasilii a ku, ha yini hambileswi u tivaka timfanelo ta wena u nga alanga loko maphorisa ma ku lerisa leswaku u tshika ntirho wa wena? Vasilii u hlamule a ku: “Ndzi xixima maphorisa. Anakanya ndlela leyi a swi ta va swi ve ha yona eka vahlaleri hinkwavo lava a va ri kona loko a ndzi lo hehla phorisa leswaku a ri wu tivi nawu.” Murhangeri wa maphorisa ni mupfuni wakwe a va tsakile naswona va tiyisekise Vasilii leswaku a ku nge he pfuki ku ve ni swiphiqo enkarhini lowu taka loko a tirhisa xigolonyana xakwe xa minkandziyiso.