Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2015

 KU CHUMAYELA NI KU DYONDZISA VANHU EMISAVENI HINKWAYO

Asia Ni Le Middle East

Asia Ni Le Middle East
  • MATIKO 48

  • VAAKA-TIKO 4 315 759 010

  • VAHUWELERI 703 271

  • TIDYONDZO TA BIBELE 732 106

U Vutise Loko Swi Ta Koteka Leswaku A Ta Ni Vanhu Van’wana

Makwerhu un’wana u nyike munhu loyi a tirhaka ku pakisa timovha xirhambo xa Xitsundzuxo le Indonesia ka ha sele masiku mambirhi leswaku xi khomiwa. Mutirhi yoloye, loyi a ri Mumoslem u vutise loko swi ta koteka leswaku a ta ni vanhu van’wana tanihi leswi a a nyikiwe xirhambo xin’we ntsena. Makwerhu yoloye u vule leswaku ni van’wana va nga ta. Wanuna yoloye u vule leswaku u ni ndyangu  lowukulu kutani u kombele swirhambo leswi engetelekeke. Makwerhu u n’wi nyike swirhambo swa 20 ivi a hlamusela leswaku xiendlakalo xexo a ku ri Xitsundzuxo xa rifu ra Yesu ni leswaku vanhu hinkwavo ku katsa ni Vakreste swin’we ni Mamoslem va amukelekile. Wanuna yoloye u vule leswaku a a ta ta ni vanhu va kwalomu ka 60 ku ya eka 70.

Endzhakunyana ka loko nkulumo ya Xitsundzuxo yi sungurile, laha se a ku ri ni vanhu va 248, munhu loyi a tirhaka ku pakisa timovha u te ni vanhu van’wana va kwalomu ka 100—vavanuna, vavasati swin’we ni vana, ku katsa ni vanhu lava dyuhaleke ni wansati loyi a a tikile. A va hirhe timovha to hlayanyana leswaku ti va yisa ehotela laha Xitsundzuxo a xi khomeriwe kona. Loko va vona ntshungu wolowo, varindzi volavo va le hotela va rhange hi ku wu sivela ku nghena. A va tivutisa leswaku ha yini Mamoslem yo tarisa xileswi ma lava ku ya eka xiendlakalo xa Vakreste. Endzhaku ka loko va kombe varindzi swirhambo swa vona swa Xitsundzuxo, varindzi volavo va helekete ntlawa wolowo eholweni. Vanhu va kwalomu ka 60 va ntlawa wolowo va pfumeleriwe ku nghena eholweni leyi a yi tele.

Endzhakunyana ka masiku ma nga ri mangani, makwerhu u ye eka mutirhi loyi a pakisaka timovha kutani a n’wi vutisa loko ntlawa wolowo wu tiphinile hi nongonoko. Hambileswi a vuleke leswaku hinkwavo a va ri ni tingana loko va fanele va ta, u vule leswaku va tsakisiwe hileswaku vanhu hinkwavo lava a va ri kwalaho a va ri ni xinghana, va va xewetile va tlhela va va qhavula endzhaku ka nongonoko. Kutani makwerhu u n’wi rhambe leswaku a ta eka nkulumo yo hlawuleka leyi a yi ta nyikeriwa eka Sonto leyi landzelaka. Sweswi a a te ni swirho swa ndyangu swa kwalomu ka 40 swin’we ni vaakelani. Tanihi leswi a va fike eku heleni ka nhlangano, vakulu va hlele leswaku ku tlhela ku nyikeriwa nkulumo ra vumbirhi. Nakambe mutshama-xitulu u tlhele a boxa nhloko-mhaka ya  nkulumo, a hlamusela nongonoko hi ku komisa, ku katsa ni risimu ni xikhongelo. Leswaku xivulavuri xi pfuna vanhu lava, lava a va tolovele tidyondzo ta Mamoslem, eka nkulumo hinkwayo xi tirhise swiga leswi va swi toloveleke, swo tanihi leswi nge, “Buku yo Kwetsima” ematshan’weni ya “Bibele” swin’we ni “muprofeta Isa” ematshan’weni ya “Yesu.”

Endzhakunyana, nkulu u endzele mutirhi loyi a pakisaka timovha ekaya rakwe kutani va sungula dyondzo ya Bibele hi ku tirhisa broxara leyi nge Yingisa Xikwembu. Loko va dyondza a ku ta ni vanhu van’wana va 12, ku katsa ni vavasati van’wana va Mamoslem ni vana va nga ri vangani.

Ku Vekiwa Minkandziyiso Yo Hlaya eTibazini

Mongolia: Vahuweleri va nyikiwe mpfumelelo wo vekela vakhandziyi minkandziyiso

Tibazi leti sukaka eUlaanbaatar, le Mongolia, ti ya eswiphen’wini hinkwaswo swa tiko. Maendzo wolawo ya tibazi ya nga teka tiawara ta 48. Vakhandziyi va languta ehandle hi fasitere kumbe va etlela. A ku na tibuku to hlaya hambileswi vanhu va le Mongolia va rhandzaka ku hlaya. Hikwalaho ka leswi, vamakwerhu van’wana va le Vandlheni ra Songinokhairkhan va ye eka vachayeri va tibazi ivi va ku: “Hi rhandza ku mi nyika buku leyinene tanihi nyiko. Endzeni ka swihaha-mpfhuka, minkarhi hinkwayo ku ni tibuku to hlaya eswikhwameni leswi nga endzhaku ka switulu. Loko mi vona onge vakhandziyi va n’wina va nga tsakela ku hlaya minkandziyiso yo karhi, hi nga va vekela minkandziyiso eswikhwameni leswi nga endzhaku ka switulu.” Vachayeri va tibazi va nhungu va pfumerile. Hikwalaho ka sweswo, vamakwerhu va fambise timagazini ta 299 ni tibroxara ta 144. Va tlhele va endla malunghiselelo yo siva timagazini ta khale hi ta sweswinyana leta ha ku kandziyisiwaka.

Munhu Loyi A Nga Riki Yena

Etikweni rin’wana ra le Asia, vakulu vambirhi va komberiwe ku endzela makwerhu wa xisati loyi a a ri ni malembe  ya nhungu a horile. Leswi a va nga si tshama va hlangana ni makwerhu loyi, vamakwerhu va n’wi bele riqingho kutani va hlela ku hlangana na yena exitolo xakwe lexi nga emakete lowukulu. Endzhaku ko famba eka tiphaseji leti rharhanganeke, va hetelele va kume xitolo lexi fambisanaka ni adirese ya makwerhu yoloye. Loko va ri karhi va nghena va xewetiwe hi wansati loyi a ri ni Bibele leyitsongo ehenhla ka desika rakwe. Endzhaku ko tiyisekisa xivongo xakwe, doroba ra laha a tshamaka kona ni malembe ya vana vakwe vambirhi, vamakwerhu va gimete hi ku vula leswaku wansati loyi a ku ri yena makwerhu loyi a holeke. Va te: “Hi vamakwerhu va wena, Timbhoni ta Yehovha.”

U angule a pfilunganyekile a ku: “Ndzi Mukreste.” Ndlela leyi a anguleke ha yona yi va hlamarisile vamakwerhu. Nilokoswiritano, va n’wi nyike minkandziyiso yin’wana leyi sekeriweke eBibeleni naswona u yi nkhense swinene. Hambiswiritano, loko vamakwerhu volavo va ri karhi va huma, va xiye leswaku a va nghene eka xitolo lexi nga riki xona! A va fanele va ye eka xitolo 2202, kambe lexi a ku ri xitolo 2200. Un’wana wa vamakwerhu volavo u te: “A ndzi nga swi kholwi leswi nga endleka, a ndzi vona onge i tintsumi leti nga hi susumetela ku nghena exitolo xexo. Wansati loyi ni makwerhu yoloye a va ri ni xivongo lexi fanaka va tlhela va tshama edorobeni leri fanaka naswona vana va vona a va nga siyani kule hi malembe! Loko wansati yoloye a ri ni xivongo lexi nga faniki kumbe va nga tshami edorobeni leri fanaka, a hi ta va hi swi tivile leswaku a ku nga ri yena.” Eka switolo swimbirhi leswi landzeleke, vamakwerhu va hetelele va kume makwerhu wa xisati loyi a holeke loyi a va rindzile leswaku va n’wi endzela.

“Ndzi titwe ndzi ri wa nkoka hikuva hambileswi a ndzi horile ku ringana nkarhi wo leha, Yehovha a nga ndzi rivalanga”

 Hikwalaho ko endzela munhu loyi a nga riki yena, wansati loyi va sunguleke va n’wi endzela u sungule ku dyondza Bibele ni ku ya eminhlanganweni. Makwerhu loyi a holeke u sungule ku ya eminhlanganweni hinkwayo naswona nkarhi ni nkarhi u ya ensin’wini. U te: “Ndzi titwe ndzi ri wa nkoka hikuva hambileswi a ndzi horile ku ringana nkarhi wo leha, Yehovha a nga ndzi rivalanga.”

Ku Rhumela Marungula Hi Nkarhi Lowu Maxelo Ma Nga Riki Manene

Philippines: Greg a ri karhi a rhumela marungula

Greg na Alma va rhurhele exihlaleni xa Catanduanes ePhilippines leswaku va ya tirha laha ku nga ni xilaveko lexikulu xa vachumayeri va Mfumo. Yin’wana ya tindhawu teto yi ni tintshava, kutani Greg na Alma a va fanele va famba tikhilomitara ta 19 leswaku va ya fika ensin’wini yoleyo. Minkarhi yin’wana, a va tluta hi xikepe ku ringana tiawara timbirhi leswaku va ya chumayela eka swihlala swin’wana. Hi nkarhi wa timpfula, swi va tikela swinene ku teka maendzo yo tano. Ematshan’weni yo tshama ekaya va nga chumayeli, va endle xiboho xo tirhisa nkarhi lowu va nyikiwaka wona hi tikhampani ta riqingho leti va pfumelelaka ku rhumela marungula hilaha va lavaka hakona hi mali ya le hansi swinene.

Greg u vula leswaku u sungula hi ku tsala vito rakwe eka rungula rero. Kutani a engetela a ku: “Ndzi lava ku ku byela rungula leri nga eBibeleni.” Rin’wana ra matsalwa lawa a kumeke ri tirha i Yohane 17:3. Endzhaku ko ri tshaha, u vutisa swivutiso swimbirhi: Xikwembu xa ntiyiso i mani? naswona Yesu Kreste i mani? Endzhaku ka sweswo u kombela munhu yoloye leswaku a hlamula. Loko munhu yoloye a hlamula, Greg u n’wi byela tsalwa rin’wana, ro tanihi Pisalema 83:18. Loko munhu a ya emahlweni a hlamula marungula yakwe, u n’wi vutisa loko swi ta koteka leswaku va ya emahlweni ni bulo hi ku tirhisa riqingho. Greg na Alma va vula leswaku vanhu vo tala va va hlamula.

 Wansati un’wana loyi Greg na Alma va n’wi tsaleleke marungula a ri ni swivutiso swo hlayanyana malunghana ni Bibele, xisweswo va hambete va tsalelana marungula. Va hetelele va dyondza Bibele hikwalaho ko rhumelana marungula. Wansati loyi u byele n’wana wa jaha wa makwavo wakwe wa xinuna ni mutirhi-kulobye leswi a ri eku swi dyondzeni. Hikwalaho ka sweswo, hi vunharhu bya vona va hetelele va khuvuriwile.