Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2015

 KU CHUMAYELA NI KU DYONDZISA VANHU EMISAVENI HINKWAYO

Amerika N’walungu Na Amerika Dzonga

Amerika N’walungu Na Amerika Dzonga
  • MATIKO 57

  • VAAKA-TIKO 980 780 095

  • VAHUWELERI 4 034 693

  • TIDYONDZO TA BIBELE 4 339 285

Vana Lava Feriweke Hi Vatswari Va Ya eMinhlanganweni

Angela loyi a tshamaka eSuriname, u endzele endhawini leyi ku tshamaka vana lava feriweke hi vatswari leyi nga ekusuhi ni le kaya rakwe. Mulanguteri wa ndhawu yoleyo a ku ri makwerhu wa xisati loyi a holeke, kutani handle ko kanakana u nyike Angela mpfumelelo wo chumayela vana volavo. Angela u bule ni vana volavo va 85 kutani a va komba tivhidiyo leti nga eka jw.org. Endzhakunyana ka sweswo, u sungule ku dyondza ni vo tala va vona. U joyiniwe  hi maphayona mambirhi, laha un’wana ni un’wana a ri ni ntlawa wakwe. Makwerhu wa xisati loyi a holeke u vule leswaku u dyondzise vana volavo tinsimu eka yin’wana ya tibuku ta hina ta tinsimu naswona a ta va hlayela timhaka ta le Bibeleni nivusiku. U kombise ku navela ku ya eminhlanganweni, kambe a nga ta siya vana lava va 85 va ri voxe endhawini leyi va tshamaka eka yona. Xisweswo, ku endliwe malunghiselelo ya leswaku hinkwavo ka vona va ta eHolweni ya Mfumo. Tanihi leswi Holo ya Mfumo a yi ri ekusuhi ni ndhawu leyi ku tshamaka vana lava feriweke hi vatswari, vamakwerhu va va helekete eholweni. Kutani sweswi makwerhu wa xisati ni vana lava va 85 va ya eminhlanganweni nkarhi ni nkarhi.

Gabriel U Pfune Kokwa Wakwe Wa Xinuna

Paraguay: Gabriel a ri karhi a vulavula ni kokwa wakwe wa xinuna

Loko va ri endleleni va ri karhi va vuya enhlengeletanweni eParaguay, Gabriel loyi a nga ni malembe ya tsevu, a ri karhi a anakanyisisa hi ndlela leyi swi nga swa nkoka ha yona ku chumayela rungula ra Mfumo. Kutani u xiye leswaku a ku ri ni munhu un’wana wo hlawuleka loyi a lava ku va na yena eParadeyisini, ku nga kokwa wakwe wa xinuna. Kambe kokwa wakwe wa xinuna a nga si tshama a kombisa leswaku wa wu tsakela ntiyiso naswona u kanete nsati ni vana vakwe, lava a va ri Timbhoni.

Hi siku rolero, Gabriel u kombele vatswari vakwe leswaku a vulavula ni vakokwana vakwe lava tshamaka eArgentina hi ku tirhisa endlelo ro vulavurisana ni munhu mi langutanile eka xitirhisiwa xa elektroniki. Gabriel u hlamusele kokwa wakwe wa xinuna leswaku ha yini swi ri swa nkoka swinene leswaku a dyondza Bibele kutani u n’wi kombele hi ku kongoma a ku, “Kokwana, xana wa swi lava ku dyondza na mina?” Kokwa wakwe u pfumerile. Gabriel u ringanyete leswaku va dyondza broxara leyi nge Yingisa Xikwembu Kutani U Hanya Hilaha Ku Nga Heriki. Eka tin’hweti ti nga ri tingani leti landzeleke, va dyondze broxara yoleyo swin’we. Tanihi leswi havumbirhi bya vona a va nga swi koti ku hlaya hi ku khuluka, a va rhanga hi ku pfuxeta  va nga si dyondza. Eka dyondzo yin’wana ni yin’wana, Gabriel a lunghiselela dyondzo yakwe ni ku tlhela a ambala hembe ni thayi.

Endzhakunyana vakokwa wa Gabriel va endle xiboho xo endzela ndyangu wa ka va vona ku ringana mavhiki ma nga ri mangani. Loko va ri kwalaho, kokwa wakwe u ye eminhlanganweni ya vandlha swin’we ni ndyangu wolowo. Loko kokwa wa Gabriel a tlhelela eArgentina, u ye emahlweni a dyondza Bibele ni makwerhu wa kwalaho naswona u endle nhluvuko kukondza a va muhuweleri loyi a nga khuvuriwangiki. Sweswi vakokwa wa Gabriel va khongela swin’we siku ni siku. Kasi loko ku ri Gabriel loyi a ha riki ntsongo, u endle nhluvuko hilaha ku fanaka. Na yena hilaha ku fanaka i muhuweleri loyi a nga khuvuriwangiki. Kokwa wakwe u kombise ku navela kakwe ko kombisa ku tinyiketela eka Yehovha hi ku khuvuriwa ematini.

“A Wu Endzanga Hi Xihoxo”

Loko ku ri karhi ku fambisiwa xiphephana lexi nge Xana Vafi Va Ta Tlhela Va Hanya Hakunene? eBrazil, Jennifer u gongondze ekaya ra wansati loyi a tsutsumela ku ya enkosini wa munghana  wakwe loyi a a n’wi rhandza swinene. Jennifer u n’wi byele leswaku u lava ku n’wi nyika xiphephana lexi vulavulaka hi ntshembo wo tlhela hi vona varhandziwa va hina lava feke loko va pfuxiwa eku feni. Wansati loyi u hlamarisiwe hi nhloko-mhaka ya xiphephana xolexo swa nkarhinyana kutani a xi teka. Loko a vutisiwa loko a ta swi tsakela ku teka swiphephana leswi engetelekeke leswaku a ya nyika ndyangu lowu feriweke, wansati loyi u anakanye leswaku yoleyo a ku ta va mhaka ya kahle kutani u kombele swiphephana swin’wana swa kaye.

Endzhakunyana Jennifer u tlhelele eka wansati yoloye, loyi a n’wi byeleke leswi: “Hi siku leri hi hlanganeke ha rona, ndzi sale ndzi swi xiya leswaku a wu nga endzanga hi xihoxo. Xikwembu a xi ku rhume leswaku u ndzi tisela rungula leri chavelelaka swinene.” Wansati loyi u fambise swiphephana hinkwaswo. Xirho xa ndyangu, lexi chumayeleke enkosini xi hlayele vanhu xiphephana xolexo hinkwaxo. Vanhu hinkwavo va swi tsakerile kutani va n’wi nkhensa hikwalaho ka rungula rolero leri chavelelaka. Wansati yoloye u pfumele ku dyondzeriwa Bibele.

Ku Chumayela eTithekisini Leti Vitaniwaka Tap-tap

Vamakwerhu vanharhu lava tirhaka eBethele ya le Haiti a va ri karhi va famba hi tithekisi ta mani na mani leti nga ni mihlovo-hlovo leti vuriwaka ti-tap-tap. Hi nkarhi wa riendzo ra vona leri tekaka tiawara timbirhi ni hafu, va chumayele vakhandziyi-kulobye hi ntshembo wa Mfumo, va fambisa timagazini ta 50 ni swiphephana swa 30. Un’wana wa vamakwerhu lava tirhaka eBethele, loyi a vuriwaka Gurvitch, u hlayele mukhandziyi-kulobye xiphemu xo karhi eka magazini wa Xalamuka! Jaha rin’wana leri vuriwaka Pépé ri yingisele ri tlhela ri katseka eka bulo rolero hi ku hatlisa. Ri kombele ku dyondzeriwa Bibele, kutani eku heteleleni ku kumeke leswaku a ri tshama ensin’wini leyi tirhiwaka hi vandlha leri Gurvitch a hlanganyelaka eka rona. Ku sukela hi January 2014 loko a ta va a endzeriwe ro sungula, Pépé u ye eminhlanganweni hinkwayo ni le tinhlengeletanweni. U byela van’wana hi ripfumelo rakwe lerintshwa naswona u tshemba leswaku u ta fanelekela ku va muhuweleri loyi a nga khuvuriwangiki ku nga ri khale.