Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2014

 SWIENDLAKALO-NKULU SWA N’WEXEMU

Swiviko Leswi Humaka eMatikweni Man’wana

Swiviko Leswi Humaka eMatikweni Man’wana

Maphorisa Ma Pfuneta Ku Chicha Switina

Le Kutaisi, ku nga doroba ra vumbirhi hi vukulu eRiphabliki ra Georgia, se swi endla malembe lama ringanaka 13 tinhlengeletano ti ri karhi ti khomeriwa efektri ya khale leyi hlakaleke ya vhinyo. Ehenhla ka lwangu a ku hayekiwe maseyila ku endlela leswaku mpfula yi nga neli vayingiseri. Sweswi vamakwerhu va ni Holo ya Mfumo leyintshwa ya tinhlengeletano ni mintsombano leyi fanelekaka leyi pfulekeke. Hi nkarhi wa ku aka, vatirhi va ku tirhandzela va 50 a va ri karhi va chicha switina swa semendhe elorini loko maphorisa ma fika leswaku ma ta vona leswi a swi endleka. Hikwalaho ko hlamarisiwa hi ndlela leyi vatirhi a va tsake ha yona ni ku gingiriteka ka vona, maphorisa ma va bumabumerile kutani ma va pfuna ku chicha switina. Ma lerise vamakwerhu leswaku va ma vitana loko ko tshuka ku va ni munhu  loyi a va karhataka. Maphorisa ma va tshembise leswaku ma ta va kona eka ntsombano wo sungula lowu nga ta khomeriwa eHolweni yoleyo leyintshwa ya Tinhlengeletano.

U Xavise Xikanyakanya Xakwe

Malachi, ku nga nkulu loyi a tshamaka etikweni ra Burundi, u tihanyisa hi ku rima ni ku rhwalela vanhu nhundzu hi xikanyakanya xakwe. Leswaku a hoxa xandla eka tsima ra ku aka Holo ya vona ya Mfumo, Malachi u endle xiboho xo ya endhawini leyi yi akiwaka eka yona siku ni siku. Leswaku a kota ku endla tano, a a fanele a kuma mali yo wundla ndyangu wakwe ku ringana tin’hweti timbirhi leti a ta ti heta a ri eku akeni. Kutani u xavise xikanyakanya xakwe ivi a teka mali yin’wana a nyika nsati wakwe leswaku a yi tirhisela swilaveko swa ndyangu wakwe kutani leyi saleke hinkwayo a yi hoxa ebokisini ra munyikelo leswaku yi pfuneta ku aka. Hikwalaho ka matshalatshala yakwe, u kume ndzetelo lowunene eka vamakwerhu lava akaka Tiholo ta Mfumo. Endzhaku ka loko Holo ya Mfumo yi herile, Malachi u kume ntirho wo aka hikuva vanhu va vone leswaku a a ri muaki loyi a nga ni vutshila. Hi nkarhi wolowo, Malachi u kote ku tixavela xikanyakanya xin’wana!

Va Susumeteleka Ku Pfuna

Ku aka Tiholo ta Mfumo etindhawini leti nga ekule le Malawi swa tika. Eka lembe leri nga hundza ra ntirho, ku akiwe holo endhawini leyi nga ni magondzo lama onhakeke swinene. Vamakwerhu va le rhavini va tirhise swibebe leswaku va yisa swilo swo aka endhawini leyi ku akiwaka eka yona. Vamakwerhu va kwalaho va vule leswaku vaaki va kwalaho a va ri tsakela swinene tsima rero. Vanhu vo tala lava nga riki Timbhoni va tinyiketele ku pfuna ni ku tirha kukondza ku va vusiku va chicha sava, maribye, masaka ya semendhe ni mazenge yo fulela. Entiyisweni, ku ve ni minkarhi leyi eka yona vanhu lava nga riki Timbhoni a va ta va tele ku tlula Timbhoni! Hikwalaho ko hlamarisiwa hi matshalatshala lawa  Timbhoni ta Yehovha ti ma endlaka loko ti aka tindhawu leti xiximekaka to gandzela eka tona etindhawini ta le kule to fana ni ta vona, vaaki va kwalaho va susumeteleke ku ti pfuna.

Vana Va Xavisa Malekere

Mpatswa lowu nga maphayona yo hlawuleka wa le Côte d’Ivoire wu dyondza Bibele ni mpatswa lowu nga ni vana va khume hi Xibete, ku nga ririmi ra kwalaho. Hi May 2013 a ku ta va ni nhlengeletano yo sungula hi Xibete leyi a yi ta khomeriwa edorobeni ra Daloa naswona swirho hinkwaswo swa ndyangu wolowo a swi lava ku ya. Hambiswiritano, mali ya ku ya ni ku vuya a ku ri 800 CFA (R16,00) hi munhu naswona tatana wa kona a nga ta swi kota ku hakelela ndyangu wakwe lowukulu. Leswi a a tiyimisele ku ya, u te ni pulani. U nyike n’wana wakwe lonkulu wa nhwanyana 300 CFA (R6,00) kutani a ringanyeta leswaku a xavisa malekere, kutani u endle tano. U kume ntswalo lowu ringaneke ku hakela riendzo rakwe. Tatana u endle leswi fanaka eka vana lavan’wana—u nyike un’wana ni un’wana wa vona 300 CFA yo sungula bindzu leritsongo ra malekere kukondza hinkwavo va va ni mali leyi ringaneke yo tihakelela xo famba. Eku heteleleni, vona swin’we ni van’wana va ye enhlengeletanweni. Hakunene a va tsakile ku yingisela nongonoko wolowo hi ririmi ra vona!