Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2014

 SWIENDLAKALO-NKULU SWA N’WEXEMU

Nhlengeletano Leyi Yaka Emahlweni

Nhlengeletano Leyi Yaka Emahlweni

Hi Ravuntlhanu, July 5, 2013, ndyangu wa Bethele wa le United States a wu tsakile loko wu twa Anthony Morris wa xirho xa Huvo leyi Fumaka a tivisa a ku: “Hi Ravumune, July 4, 2013, ku fikeleriwe xiboho xa leswaku ku xavisiwa miako ya tsevu ku katsa ni miako leyi nga le 117 Adams Street na 90 Sands Street eBrooklyn. Lava va xaveke Muako wo sungula ku ya fikela eka wa vuntlhanu va lava leswaku hi va hi rhurhile hi August ya lembe leri.”

Makwerhu Morris u hlamusele leswaku Ndzawulo yo Hlantswa Swiambalo leyi nga eka xithezi xa vutsevu ni xa vunkombo eka Muako wa vunharhu, yi ta hambeta yi tirha kwalaho kukondza ku fika June 2014. U te: “Kutani eka muako wa 90 Sands Street ku ta rhurhiwa kwalomu ka lembe ra 2017.”

Ku xavisiwa ka miako leyi, leyikulu ya tsevu i xiphemu xa matshalatshala lama endliweke leswaku ku rhurhisiwa ntsindza  wa misava hinkwayo wa Timbhoni ta Yehovha ku suka eDorobeni ra New York ku ya endhawini leyi nga ni tihekitara ta 102 eWarwick, le New York. Hambiswiritano, ku lunghiselela ni ku cela-cela eka ndhawu leyi ku nga ta akiwa eka yona a swi nga ta ya emahlweni kukondza va kuma maphepha lama faneleke ya mpfumelelo.

Hikwalaho, ndyangu wa Bethele ya le United States wu rhiye ndleve loko Mark Sanderson wa xirho xa Huvo leyi Fumaka a hlaya xitiviso hi Ravumune, July 18, lexi nge: “Hi tsakela ku mi tivisa leswaku hi Ravunharhu nimadyambu hi July 17, Ndzawulo ya Tipulani ya le Warwick yi pasise pulani leyi hi nga ta yi tirhisa leswaku hi aka ntsindza lowuntshwa wa misava hinkwayo wa Timbhoni ta Yehovha. Pulani leyi a yi ta endla leswaku hi kota ku kuma mpfumelelo wo sungula ku aka. Swa tsakisa ku xiya leswaku xiboho lexi endliweke tolo nimadyambu xi fike endzhaku ka malembe ya mune ku sukela loko hi xave ndhawu ya le Warwick. Ku engetela kwalaho, swiendlakalo leswi humeleleke eka masiku ma nga ri mangani yo hetelela leswi endleke leswaku hi kuma mpfumelelo, swi nyikela vumbhoni bya leswaku Yehovha u katekisa tsima leri.” Makwerhu Sanderson u nkhense hinkwavo lava tirheke hi ku tinyiketela ni swikhongelo swa vona leswi humaka embilwini leswi va swi endleke hikwalaho ka tsima leri ra nkoka. U te: “Eka hinkwaswo, hi nkhensa ni ku dzunisa Yehovha hikwalaho ka xiendlakalo lexi xa nkoka lexi nga rivalekiki eka ku rhurhisa ntsindza wa misava hinkwayo wu ya eWarwick, le New York.”

Hi Ravuntlhanu, July 26, Makwerhu Morris u hlangane ni vatirhi va le Bethele ni vatirhi va ku tirhandzela va Komiti yo Aka ya Xifundzha lava hinkwavo ka vona va endlaka kwalomu ka 1 000 lava a va hlengeletanile ekamareni lerintshwa ro dyela eka rona leri nga eTuxedo, le New York, laha ku nga  ekusuhi ni tsima ro aka leri nga eWarwick. Endzhaku ko bula hi mhaka leyi khutazaka hi tlhelo ra moya, u vule leswaku u ni xitiviso lexi a lavaka ku xi vula. Makwerhu Morris u te: “Ndzi khome papila rin’wana leri ndza ha ku ri kumaka naswona ndzi tsakela ku mi hlayela rona. Ehenhla ka rona ku tsariwe leswi: ‘Mpfumelelo wo Aka.’” Emahlweni ko va a ri hlaya, vatirhi va ku tirhandzela va phokotele mavoko. Leswi hinkwavo lava a va ri kona a va tsakile, Makwerhu Morris u hambete a hlaya swiyenge swo sungula swa papila ra mpfumelelo wo aka, leri va nyikiweke rona hi doroba ra le Warwick eka tiawara tinharhu leti a ta ha ku hundza.

Ku Humelela Yini eWallkill, Warwick Ni Le Tuxedo?

Ku sukela loko ku sunguriwe tsima ro aka eWallkill hi August 2009, vamakwerhu va kwalomu ka 2 800 va tirhe kwalaho tanihi vatirhi va nkarhinyana va ku tirhandzela. Tsima leri ri katsa ku aka muako lowuntshwa wo tshama eka wona, garaji yo paka timovha ni muako wa tihofisi. Wun’wana wa miako yo tshama eka yona sweswi wu le ku lunghisiweni naswona ku le ku antswisiweni ka ndhawu yo gandlisela, yo hlantswela eka yona, holo, muako wo tirhela eka wona ni ndhawu leyi vaendzi va fikelaka eka yona. Ku rindzeriwe leswaku tsima leri ro aka eWallkill ri ta ya emahlweni kukondza ku hela lembe ra 2015.

Sweswi ku karhi ka akiwa endhawini leyi ntsindza wa misava hinkwayo wu nga ta va eka yona eWarwick. Eka tin’hweti ti nga ri tingani ku sukela loko ku sunguriwe ntirho, ku ya emahlweni ku cela-ceriwa, ku endliwa leswaku misava yi ringana, ni ku tlhela ku nghenisiwa gezi ni mati eka miako yoleyo. Ku akiwa ka miako yinharhu yo sungula ku nga Muako wo Lunghisa Timovha, Garaji ya ku Paka Timovha ta Vaendzi ni Muako wo Lunghisa Swilo ku ta sungula eku heleni ka lembe ra 2013. Miako leyi ya laveka leswaku ku vekiwa switirhisiwa ni leswaku vatirhi va tshama eka yona, hi nkarhi wo aka ni loko yi herile. Ku ta tlhela ku akiwa muako wo tshama eka  wona ni Muako wo Tirhela eka wona, leyi hleriweke leswaku yi ta sungula ku akiwa eku sunguleni ka lembe ra 2014.

Kenneth Chernish loyi a nga xirho xa Komiti Ya Tsima Ro Aka u vula leswaku Muako wa le Tuxedo, lowu nga eka ndhawu leyi nga ni tihekitara ta 20 lowu nga en’walungwini wa Warwick laha swi tekaka tikhilomitara ta khume ku ya kona, “i ndhawu leyi pfunaka eka tsima leri ro aka ntsindza wa misava hinkwayo. Ku ta tshama van’wana va vatirhi va ku tirhandzela naswona wu ta tirhiseriwa ku va khathalela hi swakudya, switirhisiwa ni switirho.” Leswaku ku hatlisisiwa tsima leri ro aka emuakweni wa Tuxedo, vatirhi vo karhi va Komiti yo Aka ya Xifundzha lava nga eka xiphemu xa le vuxeni xa United States va karhi va pfuneta hi mintirho yo karhi yo aka.

Vatirhi vo tala va ku tirhandzela lava tirhaka eka Komiti yo Aka ya Xifundzha etikweni va swi langutele hi mahlo-ngati ku hoxa xandla eku akeni endhawini leyi ntsindza wa misava hinkwayo wu nga ta va eka yona. Vamakwerhu va xisati ni va xinuna lava nga ni vuswikoti va endle malunghiselelo ya leswaku va va kona leswaku va tirha tanihi vatirhi va ku tirhandzela va nkarhinyana endhawini leyi ku akiwaka eka yona. Leslie Blondeau, loyi a tirhaka eka Ndzawulo ya Fambiselo ra Mati ni Tiphayiphi ni nuna wakwe Peter, u ri, “Ku va hi tirha swin’we swi hi endla hi va vanghana lavakulu naswona i nchumu lowu hi nga ta tshama hi wu tsundzuka nkarhi wo leha.”

Mallory Rushmore u ri: “Sweswi ndzi tirha ni ntlawa lowu tirhaka hi gezi laha Tuxedo. Siku rin’wana ni rin’wana swa tsakisa ku vona vanhu hinkwavo laha—vatirhi hinkwavo va ku tirhandzela—va tirha swin’we.”

Quincy Dotson u ri: “Leri i lunghelo ro hlawuleka. A ndzi ehleketa leswaku ndzi ta va ndzi nyikela swinene hi swilo swa mina ku tlula mpimo, kambe entiyisweni, ndzi le ku vuyeriweni swinene.”

Makwerhu Chernish u ri: “Swa tsakisa ku katseka eka tsima leri. Vamakwerhu va xinuna ni va xisati va endla ntirho hi ku hatlisa, hi ndlela leyinene naswona hi nkarhi lowu fanaka va tiphina swinene.”