Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2014

 SIERRA LEONE NA GUINEA

1945 Ku Ya Fika Hi 1990 ‘Va Tisa Vo Tala Eku Lulameni’—Dan. 12:3. (Xiyenge 1)

1945 Ku Ya Fika Hi 1990 ‘Va Tisa Vo Tala Eku Lulameni’—Dan. 12:3. (Xiyenge 1)

 Ku Fika Varhumiwa Va Le Giliyadi

Hi June 1947, ku fike mathwasana manharhu ya Xikolo xa Bibele xa Giliyadi xa Watchtower eFreetown, ku nga Charles Fitzpatrick, George Richardson na Hubert Gresham. Vamakwerhu lava hi vona varhumiwa vo sungula ku fika.

Varhumiwa va vone leswaku vahuweleri va kwalaho va hisekela ntirho wo chumayela, kambe a va fanele va dyondzisiwa leswaku va va ni vutshila. (Mat. 28:20) Kutani va sungule ku va dyondzisa ndlela yo tlhelela eka vanhu lava tsakelaka ni ndlela yo fambisa tidyondzo ta Bibele. Va tlhele va va nyika nkongomiso lowu nga enkarhini malunghana ni minhlangano ya vandlha ni nhlengeletano ya Yehovha. Ku khomiwe nhlangano wa mani na mani eWilberforce Memorial Hall. Varhumiwa va tsakile hileswi ku teke vanhu va 450! Endzhakunyana, varhumiwa va simeke Siku ro fambisa Timagazini vhiki ni vhiki. Ndzetelo lowu wu khutaze vandlha ni ku endla leswaku ri ndlandlamuka enkarhini lowu taka.

Hi nkarhi wolowo, varhumiwa a swi va tikela ku tolovelana ni maxelo ya kwalaho. Xiviko xa rhavi xa 1948 xi ri: “Maxelo ya le Sierra Leone a ya tiyiseleleki. Nguva ya mpfula yi heta tin’hweti ta tsevu elembeni naswona mpfula yi na swinene naswona a yi xi. Minkarhi yin’wana yi na mavhiki mambirhi handle ko xa. Hi nguva yo pfumala mpfula, ka hisa swinene naswona ku ni moya wo tsakama.” Valungu vo sungula lava a va endzela eSierra Leone a va nga tshami nkarhi wo leha. Dari, vuvabyi bya ku hisa ka miri ni mavabyi man’wana ya le tindhawini leti hisaka a ma hangalakile. Varhumiwa va sungule ku vabya ha un’we-un’we kutani va boheka ku famba.

Swa twisiseka leswi vahuweleri va kwalaho va hetiweke matimba hikwalaho ka sweswo. Kambe a va lan’wanga. Exikarhi ka 1947 na 1952, nhlayo ya vahuweleri yi engetelekile yi suka  eka 38 yi ya eka 73. Le Waterloo, laha ku nga doroba leri nga ekusuhi ni le Freetown, maphayona lama hisekaka ma pfunete ku simeka vandlha lerintshwa. Ku sunguriwe mintlawa leyintshwa eKissy ni le Wellington, ku nga miti leyi nga ehandle ka doroba ra Freetown. Tiko ra Sierra Leone a ri vonaka ri lunghekele ku ndlandlamuka. Xana sweswo a swi ta endlekisa ku yini?

Riendzo Leri Khutazaka

Hi November 1952, edorobeni ra le Freetown ku fike wanuna wo leha a tlhela a lala wa le Amerika loyi a a ri emalembeni ya va-30 eribuweni ra laha ku yimaka swikepe. Muendzi yoloye ku nga Milton G. Henschel wo huma entsindza wa Timbhoni ta Yehovha u te: “Swi ndzi hlamarisile ku vona doroba ra manguva lawa ri basile ku tlula madoroba yo tala lama nga kona laha misaveni. . . . Switarata leswi nga ni swikontiri, switolo leswi nga ni vaxavi vo tala, timovha letintshwa ni vanhu vo tala.”

Makwerhu Henschel u ye ekaya ra varhumiwa eFreetown, laha ku ya kona a a hundza switarata swimbirhi ku suka eMurhini wa Khotoni lowu dumeke. Loko a ri kwalaho u tivise vamakwerhu lava hlengeletaneke leswaku tiko ra Sierra Leone a ri ta kuma mpfuno lowu engetelekeke. Eka Sonto leyi landzelaka, vanhu va 253 va hlengeletane eWilberforce Memorial Hall leswaku va n’wi yingisela loko a boxa switiviso swo tsakisa leswi landzelaka: Tiko ra Sierra Leone ri ta va ni rhavi ra rona, mulanguteri wa xifundzha ni tinhlengeletano ta xifundzha; ku ta simekiwa vandlha lerintshwa eKissy; naswona ntirho wo chumayela wa le swifundzheni wu ta ndlandlamuxiwa swinene. Vayingiseri a va tsakile!

Makwerhu Henschel u te: “Va hambete va ku kusheh, ku nga rito ro xonga swinene leri vulaka leswaku ‘swi kahle!’ Vamakwerhu a va tsakile swinene. Vanhu va suke eholweni hi mintlawa nimadyambu loko se ri dzwiharile, . . . van’wana lava lavaka ku ya emintsombanweni a va ri karhi va yimbelela tinsimu.”

 Murhumiwa loyi a ha ku fika, ku nga William Nushy, u vekiwe ku va mulanguteri wa rhavi lerintshwa. Eku sunguleni William a a tirha ku gemburisa etindlwini ta mintlangu yo titsakisa leyi nga eUnited States. Endzhaku ko va Mukreste, u tshike ntirho wolowo kutani a namarhela milawu yo lulama—leswi a swi ta endla leswaku vahuweleri va le Sierra Leone va n’wi rhandza ni ku n’wi xixima.