Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2014

 SIERRA LEONE NA GUINEA

Phayona Leri A Ri Ri Socha Loko Ra Ha Ri Xifanyetana

Phayona Leri A Ri Ri Socha Loko Ra Ha Ri Xifanyetana

A NDZI ri ni malembe ya 16 loko masocha yo xandzuka ma ndzi yisa evusocheni hi nkani. A ma ndzi nyika swidzidziharisi ni byala naswona minkarhi yo tala a ndzi lwa ndzi dakwe hi swidzidziharisi. Ndzi lwe tinyimpi to tala naswona ndzi endle vanhu nsele wo chavisa. Ndza tisola swinene hikwalaho ka sweswo.

Siku rin’wana Mbhoni yin’wana leyi dyuhaleke yi chumayele ekampeni ya hina. Vanhu vo tala a va hi chava naswona a va nga hi rhandzi kambe Mbhoni leyi a yi lava ku hi pfuna leswaku hi va ni vuxaka ni Xikwembu. Loko yi ndzi rhamba leswaku ndzi ya eminhlanganweni, ndzi pfumerile. A ndza ha swi tsundzuki leswi a ku vulavuriwa ha swona eminhlanganweni, kambe ndza ha yi tsundzuka kahle ndlela ya rirhandzu leyi va ndzi amukeleke ha yona.

Loko nyimpi yi ya yi hisa, a ndza ha tlhelanga ndzi hlangana ni Timbhoni. Kutani ndzi vaviseke swinene naswona ndzi yisiwe endhawini leyi lawuriwaka hi masocha yo xandzuka leswaku ndzi ta hlakarhela. Emahlweni ko va nyimpi yi hela, ndzi balekele endhawini leyi lawuriwaka hi hulumendhe laha ndzi joyineke nongonoko wo tekela vanhu matlhari ya vona ni ku ntshunxa masocha ma ya emakaya ni ku endla leswaku masocha wolawo ma va ni vun’we ni vanhu.

A ndzi lava mpfuno hi tlhelo ra moya. Ndzi ye eka minhlangano ya Pentekosta, kambe swirho swa kereke swi ndzi vitane Sathana. Kutani ndzi sungule ku lava Timbhoni ta Yehovha. Endzhaku ka loko ndzi ti kumile, ndzi sungule ku dyondza ni ku ya eminhlanganweni. Loko ndzi va phofulele swidyoho swa mina, vamakwerhu va ndzi hlayele marito ya Yesu lama chavelelaka lama nge: “Vanhu lava hanyeke a va lavi n’anga, kambe yi laviwa hi lava va vabyaka. . . . Ndzi tele ku ta vitana vadyohi, ku nga ri vanhu lava lulameke.”—Mat. 9:12, 13.

Hakunene marito wolawo ma ndzi khumbe mbilu! Ndzi nyike makwerhu loyi a ndzi dyondza na yena Bibele savula ra mina, kutani ndzi ku: “A ndzi hlayise savula leri leswaku ndzi ta tisirhelela  ha rona. Kambe sweswi ndza swi tiva leswaku Yehovha na Yesu va ndzi rhandza kutani a ndza ha ri lavi.”

Vamakwerhu va ndzi dyondzise ku hlaya ni ku tsala. Eku heteleleni, ndzi khuvuriwile kutani ndzi va phayona ra nkarhi hinkwawo. Namuntlha loko ndzi chumayela khale ka masocha yo xandzuka, ma vula leswaku ma ndzi xixima hileswi ndzi cinceke vutomi bya mina. Ndzi tlhele ndzi dyondza ni khale ka mupfuni wa ntlawa wa hina.

Loko ndza ha ri socha, ndzi ve ni vana vanharhu va majaha. Endzhaku ko dyondza ntiyiso, a ndzi lava ku va pfuna leswaku va va ni vuxaka ni Xikwembu. Lexi ndzi tsakisaka, hileswaku vambirhi va amukele ntiyiso! Un’wana wa vana va mina va majaha i muhuweleri loyi a nga khuvuriwangiki naswona lonkulu wa vona sweswi i phayona ra nkarhinyana.