Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2014

 SIERRA LEONE NA GUINEA

Nchumu Lowu Antswaka Ku Tlula Tidayimani

Tamba Josiah

Nchumu Lowu Antswaka Ku Tlula Tidayimani
  • U VELEKIWE HI 1948

  • U KHUVURIWE HI 1972

  • MATIMU YAKWE HI KU KOMISA A a tirha eka timayini ta dayimani loko a nga si kuma ntiyiso. Sweswi i xirho xa Komiti ya Rhavi ra le Sierra Leone.

HI 1970, ndzi tirhe eka mayini ya le Tongo leyi lawuriwaka hi khamphani ya le Britain, ku nga mayini leyi fuweke hi dayimani en’walungwini wa Kenema. Nakambe hi nkarhi wa mina wo wisa a ndzi lavana ni tidayimani. Nkarhi na nkarhi loko ndzi ti kuma, a ndzi ambala kahle kutani ndzi kongoma eKenema leswaku ndzi ya ti xavisa kutani ndzi titlonya hi vutomi.

Hi 1972, ndzi hlangane ni Timbhoni ta Yehovha kutani ndzi sungula ku dyondza Bibele na tona. Endzhaku ka tin’hweti ta ntlhanu, ndzi fanelekele ku khuvuriwa. Leswi a ndzi nga ha ri na wona masiku yo wisa, ndzi kombele mutirhi-kulorhi leswaku a ndzi khomela entirhweni leswaku ndzi ta kota ku ya entsombanweni wa muganga leswaku ndzi ta khuvuriwa. U pfumerile ntsena loko ndzi ta n’wi nyika muholo wa mina wa vhiki. Ku khuvuriwa ka mina a ku ri ka nkoka ku tlula mali, kutani ndzi amukele xikombelo xakwe. Loko ndzi vuya entsombanweni, u ndzi byele leswaku ndzi nga ha n’wi nyiki muholo wa mina hikuva ku tirhela Xikwembu i swinene.  Endzhaku ka tin’hweti ta tsevu, ndzi tshike ntirho wa mina lowu holelaka kahle leswaku ndzi ta tihlayisela xuma etilweni hi ku va ndzi va phayona ro hlawuleka.—Mat. 6:19, 20.

Ku ringana malembe ya 18, ndzi ve phayona ro hlawuleka ni ku tlhela ndzi va mulanguteri wa xifundzha etindhawini to hambana-hambana ta tiko. Hi nkarhi wolowo, ndzi tekane na Christiana, loyi a nga munghana loyi a tshembekeke ni loyi a ndzi seketelaka kutani hi katekisiwe hi n’wana wa nhwanyana, ku nga Lynette.

Ndzi tshame ndzi lorha ndzi ri ni tidayimani, kambe ndzi kume nchumu wo antswa ku ti tlula, ku nga ntiyiso wa Yehovha ni mikateko leyi ndzi yi kumaka hikwalaho ko n’wi tirhela

Hi nkarhi wa nyimpi ya xin’wana-manana eSierra Leone, mina na Christiana hi phayone edorobeni ra Bo, leri nga endhawini yin’wana leyi nga ni mayini leyikulu ya dayimani. Kwalaho hi kume “tidayimani” to tala ta moya, ku nga Vakreste va ntiyiso. Ku nga si hela malembe ya mune, vandlha ra hina ri engeteleke hi vanhu vo tlula 60 wa tiphesente. Sweswi edorobeni ra Bo ku ni mavandlha manharhu lama kulaka.

Hi 2002, ndzi rhambiwile leswaku ndzi va xirho xa Komiti ya Rhavi ra le Sierra Leone. Mina na Christiana hi tshama ekusuhi ni le Bethele. Masiku hinkwawo ndzi ya eBethele leswaku ndzi ya tirha loko hi hala tlhelo Christiana a tirha tanihi phayona ro hlawuleka. Lynette u tirha ni ntlawa wa vahundzuluxeri va Xikrio eBethele.

Ndzi tshame ndzi lorha hi ku va ndzi kuma tidayimani, kambe ndzi kume nchumu lowu antswaka ku ti tlula, ku nga ntiyiso malunghana na Yehovha ni mikateko leyi ndzi yi kumaka hikwalaho ko n’wi tirhela. Ndzi tlhele ndzi yimbula 18 wa “tidayimani” ta moya, kumbe Vakreste va ntiyiso. Hakunene Yehovha u ndzi katekise swinene.