Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2014

 SIERRA LEONE NA GUINEA

1915 Ku Ya Fika Hi 1947 Eminkarhini Ya Khale (Xiyenge 2)

1915 Ku Ya Fika Hi 1947 Eminkarhini Ya Khale (Xiyenge 2)

Va Kanerisana Ni Vapfukeri

Loko vafundhisi va le Freetown va vona leswaku vanhu va kereke ya vona va tsakela tinkulumo ta Makwerhu Brown, va sungule ku va ni mavondzo ni vukarhi. Nkandziyiso wa Xihondzo xo Rindza wa December 15, 1923, wu vike leswi: “Vafundhisi va sungule ku lwisana ni ntiyiso lowu a wu dyondzisiwa hi ku tirhisa maphepha-hungu. Makwerhu Brown a a tshamela ku kanerisana na vona, kutani leswi a a swi vula swin’we ni leswi a swi vuriwa hi vafundhisi volavo a swi kandziyisiwa emaphepheni.” Vafundhisi volavo va hetelele va miyerile. Mavunwa ya vona ma humele erivaleni. Ntiyiso wa Bibele wu hangalakile wu fika ni le tindhawini ta le kule, leswi endleke leswaku vahlayi vo tala va maphepha-hungu va kombela minkandziyiso ya Bibele. Vafundhisi va endle rhengu ro miyeta vanhu va Xikwembu, kambe Yehovha u ‘tlherisele vubihi bya vona ehenhla ka vona.’—Ps. 94:21-23.

Ntlawa wa vantshwa va kereke lowu a wu lwela vafundhisi volavo, wu vitane Vapfukeri, wu endla tinhlengeletano ta mani na mani leswaku wu ta herisa “Vurussell” hilaha a wu vitana rungula ra Mfumo hakona. Makwerhu Brown u vulavurisane na vona a ri karhi a twiwa hi mani na mani eka minjhekanjhekisano leyi veke kona. Vapfukeri va arile ku ta naswona va tshinye muhleri wa phepha-hungu loyi a kandziyiseke mhaka ya Makwerhu Brown. Va tlhele va sivela Makwerhu Brown ku ya eka tinhlengeletano ta vona, kutani ematshan’weni ya leswaku ku ya yena, ku ye Alfred Joseph.

Tinhlengeletano teto a ti khomeriwa eholweni leyi vitaniwaka Buxton Memorial Chapel, leyi ku nga kereke leyi xiximiwaka ya Methodist ya le Freetown. Alfred u ri: “Hi nkarhi wa bulo ra swivutiso ni tinhlamulo ndzi vutise hi dyondzo ya kereke ya Anglican, dyondzo ya Vunharhu-un’we ni tidyondzo tin’wana to hlayanyana leti nga sekeriwangiki eMatsalweni. Eku heteleleni, mutshama-xitulu u arile leswaku ku vutisiwa swivutiso swin’wana leswi engetelekeke.”

Un’wana wa Vapfukeri lava a va ri kona madyambu wolawo, a ku ri Melbourne Garber, loyi a nga tshama a ya yingisela  tinkulumo ta “Bible” Brown. Entiyisweni, a ku ri yena muntshwa loyi a a dyondzela vufundhisi loyi a vuleke leswaku “Nkulukumba Brown wa yi tiva Bibele yakwe!” Endzhaku ka loko a swi kambisise hi vukheta leswi a swi tweke, Garber a a khorwiseka leswaku u kume ntiyiso. Hikwalaho, u kombele Makwerhu Brown leswaku a dyondza na yena Bibele. Makwerhu Brown u n’wi rhambe leswaku a va kona eka Dyondzo ya vhiki ni vhiki ya Xihondzo xo Rindza leyi a yi khomeriwa ekaya kakwe. Hambileswi vandyangu wakwe va n’wi fularheleke, Garber u hatle a endla nhluvuko hi tlhelo ra moya naswona a swi tekanga nkarhi leswaku yena ni van’wana vo hlayanyana va khuvuriwa.

Matshalatshala ya Sathana yo lava ku herisa ntirho wo chumayela loko wa ha sungula ma tsandzekile. Ku hetiseke marito lawa meyara wa le Freetown a ma byeleke Vapfukeri volavo lama nge: “Loko ntirho lowu wu huma eka vanhu wu ta hela. Kambe loko wu huma eka Xikwembu, a mi nge swi koti ku wu herisa.”—Mint. 5:38, 39.

Kereke Ya Ka Brown

Eku sunguleni ka May hi 1923, Makwerhu Brown u kombele rhavi ra le London leswaku ri n’wi rhumela minkandziyiso leyi engetelekeke. Hi ku hatlisa, ku fike tibuku ta 5 000 naswona ku tlhele ku rhumeriwa minkandziyiso yin’wana. Nakambe u ye emahlweni a khoma minhlangano ya le rivaleni naswona yi koke rinoko ra vanhu va magidi lava tsakelaka.

Eku heleni ka lembe rero, Xihondzo xo Rindza xi te: “Ntirho wo chumayela wa le [Sierra Leone] wu andze hi ku hatlisa lerova Makwerhu Brown u vitane munhu la nga ta n’wi pfuna; hikwalaho Claude Brown, wa le Winnipeg, laha eku sunguleni a ku vitaniwa West Indies, u ta n’wi joyina eka ntirho lowu.”

Claude Brown a a ri ni ntokoto eka ntirho wo chumayela mahungu lamanene. Hi nkarhi wa Nyimpi yo Sungula ya Misava u tiyisele ku xanisiwa emakhotsweni ya le Canada ni le Nghilandhi hikwalaho ko ala ku joyina vusocha. U tirhe eSierra Leone ku ringana malembe ya mune, laha a va khutazeke swinene vamakwerhu va kwalaho.

 Pauline Cole u ri: “Emahlweni ko va ndzi khuvuriwa hi 1925, ndzi kamberiwe hi Makwerhu Claude.

“U ndzi vutise a ku: ‘Makwerhu Cole, xana wa swi twisisa leswi u swi dyondzeke eka buku leyi nge Studies in the Scriptures? A hi lavi leswaku u tshika ntiyiso hikwalaho ka leswi u nga ti twisisangiki tidyondzo ta Bibele.’

“Ndzi te: ‘Makwerhu Claude leswi ndzi swi dyondzeke ndzi tlhele ndzi swi hlayisisa naswona se ndzi endle xiboho!’”

Pauline Cole

Pauline u tirhele Yehovha malembe yo tlula 60, lawa yo tala ya wona a ma heteke a ri phayona ro hlawuleka. U hete pfhumba rakwe ra laha misaveni hi 1988.

Nakambe William “Bible” Brown a a swi xiya leswaku u fanele a pfuna van’wana leswaku va hlakulela ku rhandza swilo moya. Alfred Joseph u ri: “Loko ndzi hlangana na Makwerhu Brown nimixo, a hi bula hi ndlela leyi: ‘Rixile Makwerhu Joe. U pfuke njhani? Xana ndzimana ya Bibele ya siku ra namuntlha yi ri yini?’ Loko ndzi tsandzeka ku hlamula, a a ndzi byela leswaku ndzi fanele ndzi tiva ndzimana ya siku rin’wana ni rin’wana leyi a yi ri exibukwanini lexi nge Daily Manna. [Sweswi xi  vitaniwa Ku Kambisisa Matsalwa Siku Ni Siku.] Eka mixo lowu landzelaka, a ndzi hlaya ndzimana leswaku ndzi lunghekela ku n’wi hlamula loko a ndzi vutisa. Eku sunguleni, a ndzi nga wu voni ndzetelo lowu a ndzi wu kuma, kambe ndzi wu vone hi ku famba ka nkarhi.”

Ndzetelo lowu hinkwawo wu endle leswaku ku va ni vuyelo lebyinene. Hi 1923, ku simekiwe vandlha eFreetown naswona ku khuvuriwe vanhu va 14. Un’wana wa vamakwerhu lava ha ku khuvuriwaka a ku ri George Brown, loyi a endleke leswaku mindyangu ya ka Brown yi va yinharhu evandlheni. Ku hiseka ka mindyangu yoleyo yinharhu ku endle leswaku vaaki vo tala va le Freetown va vitana vanhu lava a va ri Swichudeni swa Bibele leswaku i va kereke ya ka Brown.