Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2014

 KU CHUMAYELA NI KU DYONDZISA EMISAVENI HINKWAYO

Matiko Ya Amerika

Matiko Ya Amerika
  • MATIKO 57

  • VAAKA-TIKO 970 234 987

  • VAHUWELERI 3 943 337

  • TIDYONDZO TA BIBELE 4 341 698

Va Kombele Mpatswa Leswaku Wu Ta Tshama Na Vona

Le Las Vegas, eNevada, mpatswa lowu nga riki Timbhoni a wu lava ku tshama endhawini leyi rhuleke, kutani wu xavise kaya ra wona leswaku wu ta rhurhela le Dominican Republic. Hambiswiritano, a wu fanele wu huma endlwini ya wona ka ha sale masiku ya khume leswaku wu khandziya xihaha-mpfhuka. Leswaku va wu pfuna, vaakelani wa wona, lava a va ri Timbhoni ta Yehovha, va kombele mpatswa leswaku wu ta tshama na vona ekaya ka vona. Hi nkarhi lowu mpatswa wolowo a wu tshama  na vona wu ye eHolweni ya Mfumo. Wu hlamarile wu tlhela wu tsaka loko wu twa ku boxiwa lembe ra 1914. A wu swi tiva leswaku lembe rero a ri ri ra nkoka ematin’wini ya misava. Loko mpatswa wolowo wu fika eDominican Republic, wu nambe wu kombela dyondzo ya Bibele eka Timbhoni to sungula leti wu endzeleke. Endzhaku ka tin’hweti ta 14, havumbirhi bya vona va tinyiketerile kutani va khuvuriwa.

Hi Swona Leswi A Swi Lava

Vamakwerhu a va veke minkandziyiso etafuleni eka Tsima ra 2012 leri a ku Vekiwa Tibuku ta Matiko yo Hambana-hambana eDorobeni ra Panama, le Panama. Swinhwanyetana swimbirhi leswi nghenaka xikolo swi ye etafuleni rero. Xin’wana xa swinhwanyetana sweswo xi byele makwerhu wa xisati loyi a ri karhi a chumayela etafuleni rero leswaku xi hlundzukile. Xinhwanyetana xi hlamusele leswaku tata wa xona a a godzomberiwe hi swidzidziharisi naswona a xi swi tivi leswaku xi nga langutana njhani ni xiyimo xexo. Makwerhu yoloye u kombe xinhwanyetana xexo ndzima 23 ya buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka, Vholumo 2 leyi nga ni nhloko-mhaka leyi nge, “Ndzi Nga Endla Yini Loko Mutswari Wa Mina A Tirhisa Swidzidzirisi Ni Ku Nwa Ku Tlula Mpimo?” Xinhwanyetana xexo xi huwelele xi ku: “Leswi hi swona leswi a ndzi swi lava!” Swinhwanyetana sweswo swi vukarhe makwerhu yoloye naswona swi tlhele swi vuya endzhaku ka awara leswaku swi ta tlhela swi n’wi nkhensa. Hi nkarhi wa tsima rero leri heteke masiku ya ntlhanu, vamakwerhu va fambise tibuku ta 1 046, timagazini ta 1 116 ni tibroxara ta 449. Vanhu va 56 va siye tiadirese ta vona leswaku Timbhoni ti ta va endzela.

U Hete Malembe Ya Mune A Chumayela A Ri Yexe

Fredy, loyi a vulavulaka Xicabecar, u tshama eximutanini xa le kule lexi nga ni tintshava le Costa Rica. Eka malembe ya  mune lama hundzeke loko a ha tirha entsindza wa San José, Fredy u kume buku leyi nge Xana Bibele Yi Dyondzisa Yini Hakunene? ni broxara leyi nge I Yini Leswi Xikwembu Xi Swi Languteleke Eka Hina? Muhuweleri loyi a fambiseleke Fredy minkandziyiso u n’wi byele leswaku a ya chumayela vanhu va ka vona, kutani u tlhelele eximutanini xa ka vona. Fredy u dyondze buku leyi nge Leswi Bibele Yi Swi Dyondzisaka hi yexe, ivi a cinca vutomi byakwe hikuva a tsarisa vukati byakwe. Xisweswo u dyondzise vanhu lava vulavulaka Xicabecar ntiyiso hilaha a nga kotaka hakona.

Fredy u hlele titlilasi ta swichudeni swakwe swa Bibele. A ri ni titlilasi ta tsevu, a avela swichudeni swakwe hi ku ya hi ndlela leyi swi endleke ha yona eka swikambelo leswi a swi nyikeke swona leswaku a kambela vutivi bya swona bya Bibele. U hlele minhlangano swin’we ni Xitsundzuxo, a ti tsalela swirhambo, leswi nge: “Timbhoni ta Yehovha ta ku rhamba leswaku u hlanganyela na tona eka Xitsundzuxo xa rifu ra Kreste.” U endle leswi hinkwaswo ku ringana malembe ya mune handle ko va a hlangana ni Timbhoni! Hi nkarhi wolowo, u khongele Yehovha leswaku a n’wi rhumela Timbhoni leswaku ti ta n’wi pfuna.

Sweswinyana, xikhongelo xa Fredy xi hlamuriwile. Timbhoni tin’wana ti teke riendzo ro tika ti ya eximutanini xa ka vona naswona ti hlamarile loko ti vona hinkwaswo leswi a swi endleke. Ti vike leswi, “Hambileswi Fredy a nga riki Mbhoni leyi khuvuriweke, u hanya ku fana na yona!” Endzhaku ka tin’hweti tinharhu u pfumeleriwe ku va muhuweleri loyi a nga khuvuriwangiki. Leswaku a khuvuriwa, Fredy u ye entsombanweni ro sungula laha a yeke ni swichudeni swakwe swa Bibele swa 19. Sweswi u hlele mintlawa yinharhu leyi engetelekeke ya vanhu lava vulavulaka Xicabecar ni le tindhawini leti nga ekule swinene.

Costa Rica: Fredy, loyi sweswi a nga phayona ro hlawuleka u famba mimpfhuka yo leha leswaku a ya fambisa tidyondzo ta Bibele

U Lwele Ripfumelo Rakwe eXikolweni

Siku rin’wana Anna, loyi a yeke exikolweni xa le henhla xa le United States, a a fanele a lwela ripfumelo rakwe eka mintshikilelo yo hlayanyana ya tintangha leti a ti hlundzukile hikwalaho ka leswi a nga pfumeliki eka Vunharhu-un’we. Anna u vike  a ku: “Va sungule ku ndzi sapatela va ri hi ntlawa kambe ndzi hambete ndzi rhurile hikuva a ndzi nga lavi ku endla leswaku vahlaleri va teka Timbhoni ta Yehovha hi ndlela yo biha.” Hi vusiku byebyo u khongele Yehovha leswaku a n’wi nyika xivindzi naswona u endle vulavisisi hi dyondzo ya Vunharhu-un’we. Hi siku leri landzelaka, Anna u ye ni Bibele yakwe exikolweni. Vadyondzi-kulobye va n’wi rhendzerile, laha vo tala va vona a va n’wi hlekula. Nilokoswiritano, u ve ni xivindzi xo va hlayela matsalwa yo hlayanyana ni ku bula na vona. Eku heteleleni, lava a va phikizana na yena va heleriwe hi marito. Loyi a a ri mukaneti wakwe lonkulu tlhelo murhangeri wa le tlilasini u hetelele a vule leswaku sweswi u xixima Timbhoni ta Yehovha. U hete lembe hinkwaro a ri karhi a vutisela Anna swivutiso swo hambana-hambana malunghana ni leswi a swi pfumelaka.

U Onhakeriwe Hi Ntangu Hi Nkarhi Lowu Faneleke

Nhwanyana un’wana wa le Barbados a a ri karhi a famba hi milenge a ya ekerekeni hi Sonto yin’wana nimixo loko ntambhu ya ntangu yakwe yi tsemeka. U ye emutini lowu a wu ri ekusuhi a ya kombela nayiti leswaku a rhunga ntangu yakwe.  Ku kumeke leswaku emutini wolowo a ku tshama makwerhu wa xisati ni n’wana wakwe wa nhwanyana. Loko nhwanyana yoloye a ri karhi a rhunga ntangu yakwe, makwerhu wa xisati u n’wi hlamusele ndlela leyi vuprofeta bya Bibele byi hetisekaka ha yona sweswi. N’wana wa makwerhu yoloye u rhambe nhwanyana yoloye leswaku a famba na vona eHolweni ya Mfumo. Leswi se kereke yakwe a yi nghenile, u pfumerile. Hi nkarhi wa minhlangano, u hlaye matsalwa hinkwawo eBibeleni yakwe ya King James. U tsakisiwe swinene hi minhlangano yoleyo. U vule leswaku a a karhele ku twa pongo ra swigubu ni ku huwelela ekerekeni yakwe naswona a ku ri khale a ri karhi a lava ku dyondza Bibele yakwe endhawini leyi rhuleke. U amukele buku leyi nge Leswi Bibele Yi Swi Dyondzisaka swin’we ni dyondzo ya Bibele. U va kona eka minhlangano hinkwayo naswona wa hiseka.

I Munhu Un’we Loyi A Nga N’wi Tshikisaka Ku Chumayela

Makwerhu un’wana loyi a ha riki jaha wa le Guyana u ri: “Ndzi rhandza ku chumayela vadyondzi-kulorhi exikolweni, kambe ku ni mufana un’we loyi a nga swi rhandziki loko ndzi chumayela. Siku rin’wana u ndzi susumetile ndzi ya hima khumbi kutani a ku eka mina, ‘Tshika ku chumayela!’ Ndzi n’wi byele leswaku munhu un’we ntsena loyi a nga ndzi tshikisaka i Yehovha. Loko ndzi ya emahlweni ndzi chumayela, mufana yoleyo u tseme bege ya mina ya xikolo. U ndzi be hi xibakele kutani ndzi pandzeka nomu. Havumbirhi ka hina hi vitaniwe ehofisini ya nhloko ya xikolo, loyi a ndzi vutiseke leswaku a ndzi lo n’wi endla yini leswi endleke leswaku a ndzi ba hi xibakele exikandzeni. Ndzi n’wi byele leswaku a ndzi ri eku chumayeleni ka mahungu lamanene kutani hi yona mhaka leyi mufana a ndzi himeke. Nhloko ya xikolo yi ndzi vutise leswaku ha yini ndzi nga rihiselanga ivi yi ringanyeta leswaku a ndzi fanele ndzi rihiserile. Ndzi vule leswaku ndzi dyondze eBibeleni eka Varhoma 12:17 leswaku Vakreste a va fanelanga va ‘tlherisela swo biha hi swo biha.’ Loko nhloko ya xikolo yi twa sweswo, yi ndzi byele leswaku ndzi famba, yi vula leswaku yi ta sala yi xupula mufana loyi a ndzi beke.”

Catamarca, Argentina