Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Ya Lembe Ya Timbhoni Ta Yehovha Ya 2014

 KU CHUMAYELA NI KU DYONDZISA EMISAVENI HINKWAYO

Asia Ni Le Middle East

Asia Ni Le Middle East
  • MATIKO 47

  • VAAKA-TIKO 4 282 178 221

  • VAHUWELERI 674 011

  • TIDYONDZO TA BIBELE 672 318

Ku Pfuna Wanuna Loyi A Nga Voniki, Loyi A Nga Twiki Ni Loyi A Nga Kotiki Ku Vulavula

Hi 1999, vandlha leri tirhisaka ririmi ra mavoko eKobe, le Japani, ri twe leswaku ku ni wanuna loyi a nga kotiki ku vulavula loyi a vuriwaka Hirofumi. Loko makwerhu un’wana a ringeta ku endzela Hirofumi, mana wakwe u arile leswaku a n’wi vona. Makwerhu yoloye u n’wi endzele hi ku phindha-phindha, a kombela mana wakwe leswaku a n’wi vona  kutani u hetelele a tise Hirofumi enyangweni. Misisi yakwe ni malebvu a swi lehe swi tlhela swi javaringa. A a languteka ku fana ni munhu loyi a heteke malembe a ri karhi a tsendzeleka exihlaleni lexi nga emananga. Xikandza xakwe a xi nga tshukatshuki. Hirofumi a ngo tsandzeka ku vulavula ntsena ni ku twa a nga twi. Makwerhu yoloye u hlamale ngopfu kambe u khome mavoko ya Hirofumi ivi a sungula ku vulavula hi ku tirhisa ririmi ra mavoko. Kambe Hirofumi a nga n’wi angulanga. Hirofumi a hambanisiwe ni vanhu naswona a nga si tshama a vulavula ni munhu ku sukela loko a nga ha voni eka malembe ya khume lama hundzeke loko a ri ni malembe ya 31.

Makwerhu yoloye u tlhele a tlhelela endzhaku ka masiku mambirhi. Mana wa Hirofumi u hlamarile, hikuva a anakanya leswaku makwerhu yoloye a ta tshika ku n’wi endzela endzhaku ka loko a vone xiyimo xa n’wana wakwe. Nakambe makwerhu yoloye u tlhele a kombela mana wakwe leswaku a n’wi pfumelela a n’wi vona kutani u n’wi tise enyangweni. Endzhaku ko heta n’hweti a ri karhi a endzela Hirofumi, kambe a nga n’wi anguli, kutani mana wakwe u byele makwerhu yoloye leswaku a nga ha tikarhati hi ku ta n’wi vona. Nilokoswiritano, makwerhu yoloye u hambete a phikelela. Loko a endza a ya ni makhekhe naswona a endla hinkwaswo leswi a nga swi kotaka ku kombisa leswaku wa khathala. Endzhaku ka loko ku hundze tin’hweti timbirhi Hirofumi a nga n’wi anguli, makwerhu yoloye u vone onge matshalatshala yakwe a ku ri nyuku wa mbyana.

Makwerhu yoloye u endle xiboho xo n’wi endzela ro hetelela. Emahlweni ko va a ya emutini wolowo, u khongele Yehovha a kombela leswaku a n’wi pfuna ku tiva loko a fanele a hambeta a endzela Hirofumi. Loko makwerhu a fika emutini wolowo, u teke mavoko ya Hirofumi kutani a kombetela leswaku ku ni vito ra Xikwembu leri nge Yehovha loyi nkarhi ni nkarhi a  langutaka a ri etilweni naswona a twisisaka maxangu yakwe ku tlula munhu un’wana ni un’wana. Yehovha wa khathala hi yena naswona u lava ku n’wi susela gome. Hi yona mhaka un’wana wa Timbhoni ta Yehovha a teke eka yena. Eku sunguleni Hirofumi a a nga anguli; kambe u khome voko ra makwerhu yoloye kutani a xiririka mihloti emarhameni. Hikwalaho ko khumbiwa hi mhaka leyi, makwerhu na yena u xiririke mihloti. Va sungule dyondzo ya Bibele.

Endzhaku ko dyondza malembe ya 11, Hirofumi u sungule ku hlanganyela evandlheni ra kwalaho ematshan’weni yo famba mpfhuka wo leha a ya eka vandlha ra ririmi ra mavoko hilaha a hamba a endla hakona. Ku hava ni un’we evandlheni loyi a a kota ku tirhisa ririmi ra mavoko, kambe endzhaku ka tin’hweti ta 18, vamakwerhu va 22 evandlheni rero se a va dyondze ririmi ra mavoko leswaku va ta kota ku pfuna Hirofumi. Hi January 2012, Hirofumi u nyikele nkulumo yakwe yo sungula  eka Xikolo xa Vutirheli bya le Tilweni, laha makwerhu un’wana a yi tolokeke. Hi October ya lembe rero, u ve muhuweleri loyi a nga khuvuriwangiki.

U Dyondza Ni Varindzi

Floren loyi a nga phayona leri tshamaka le Philippine, hi xiringaniso u fambisa tidyondzo ta 25 ta Bibele, laha to tala ta tona ku nga varindzi. Hakanyingi vavanuna lava va tirha nimadyambu—laha van’wana va vona va tirhaka nivusiku. Xisweswo, Floren u fanele a pfumelelana ni swiyimo. U ya endhawini leyi varindzi va tirhaka eka yona kutani a dyondza na vona hi nkarhi wa vona wo wisa kumbe hi nkarhi wun’wana lowunene lowu nga va kavanyetiki entirhweni. U fambisa tidyondzo tin’wana ta Bibele hi awara ya nkombo ku ya fikela hi awara ya 11 nivusiku, kasi tin’wana u ti fambisa hi awara ya ntlhanu ku ya fikela hi awara ya kaye nimixo. Minkarhi yin’wana u hlela ku fika hi nkarhi lowu va cincanaka ku nghena entirhweni. Hi ndlela yoleyo, u kota ku dyondza ni murindzi loyi a lavaka ku nghena entirhweni ni loyi a ha ku chayisaka. Floren u ri: “Hi ku va ni tidyondzo to tala ta Bibele, ndzi ni ntsako lowu ndzi nga si tshamaka ndzi va na wona.” Sweswi van’wana va varindzi lava va va kona eminhlanganweni ya vandlha eHolweni ya Mfumo. Sweswi xin’wana xa swichudeni swa Bibele swa Floren xi khuvuriwile naswona i phayona ra nkarhi hinkwawo.

Philippines: Floren a ri karhi a fambisa dyondzo ya Bibele nimixo

A Va Tiyimisele Ku Veka Vutomi Bya Vona eKhombyeni

Loko va ri ensin’wini hi siku leri a ku na mpfula le Armenia, vamakwerhu vambirhi va xisati va vone manana un’wana ni n’wana wakwe wa nhwanyana va ri exitarateni kutani va va nyika xiphephana. Vamakwerhu va hlamarile loko va twa manana loyi vito rakwe, ku nga Marusya a vula leswaku yena ni n’wana wakwe Yeva, va hete tiawara timbirhi va ri ehandle laha maxelo ya kona a ma bihile, va ri ni ntshembo wa leswaku va ta hlangana ni Timbhoni ta Yehovha. Ha yini? Loko a ri ekhotsweni, buti wa Marusya u dyondze ntiyiso eka  vamakwerhu lava a va pfaleriwe kwalaho hikwalaho ka leswi va aleke ku ya enyimpini. Marusya a a ehleketa leswaku loko a huma ekhotsweni a ta va a tlanyarile ni ku tlhela a va ni madzolonga. Ematshan’weni ya sweswo, u ve munhu wo rhula. Leswi a hambeta a tihlanganisa ni Timbhoni, buti wa Marusya u hambete a endla ku cinca evuton’wini byakwe. Ndlela leyi a a tikhome ha yona, Marusya ni n’wana wakwe a va nga yi twisisi hikuva a va tshamela ku vona marungula lama vulavulaka ku biha hi Timbhoni ta Yehovha eka swifaniso edorobeni ni le ka minongonoko ya thelevhixini. Yeva u te: ‘Malume wa mina i munhu wa kahle swinene. Kutani ha yini ku vuriwa swilo swo tala swo biha hi Timbhoni ta Yehovha?’ Leswi a a tiyimisele ku kuma nhlamulo ya xivutiso xakwe, u byele mana wakwe a ku: “A hi nge pfuki hi tive ntiyiso malunghana ni vanhu lava handle ka loko ho tiyimisela ku hoxa vutomi bya hina ekhombyeni. A hi fambe sweswi hi ya lava Timbhoni ta Yehovha leswaku hi ta kuma tinhlamulo ta swivutiso leswi hi pfilunganyaka.” Sweswo hi swona leswi va swi endleke hi siku leri vamakwerhu va hlanganeke na vona. Endzhaku ka masiku mambirhi, va sungule ku dyondzeriwa Bibele havumbirhi bya vona. Va sungule ku ya eminhlanganweni naswona se va endle nhluvuko laha va fanelekeke ku va vahuweleri lava nga khuvuriwangiki.

Vana Va Tise Timagazini

Istanbul, Turkey: Makwerhu a ri karhi a chumayela exitarateni hi ku tirhisa buku leyi nge Mahungu Lamanene

EAdana, le Turkey, wansati un’wana loyi a langutane ni swiphiqo leswikulu ku katsa ni swa ndyangu loyi a ehleketa ku tisunga u kume timagazini ta hina timbirhi enyangweni wakwe. Swi ti komba onge vana van’wana va le ndhawini yoleyo va rhwalele timagazini teto ehansi kutani va tiveka enyangweni wakwe hikuva a va anakanya leswaku i ta yena. Wansati loyi u tsakisiwe swinene hi timhaka ta vutomi leti nga eka timagazini teto naswona a a navela onge vutomi byakwe byi nga cinca hi ndlela leyi fanaka. Wansati loyi u fonele nomboro ya riqingho leyi tsariweke eka timagazini teto naswona u tihlanganise ni phayona leri tshamaka ekusuhi. Va sungule dyondzo ya Bibele.  Wansati loyi u tlangele leswi a a swi dyondza naswona u vule leswaku a a tsakela ku ya eminhlanganweni. Ku kumeke leswaku ndhawu leyi a tshama eka yona a yi ri ekusuhi ni Holo ya Mfumo. Hi ku hatlisa u sungule ku ya eminhlanganweni naswona u hambeta a endla tano.

U Hete Masiku Ya Khume eKhotsweni Kambe A Nga Cincanga Xiboho Xakwe

Bam, loyi a nghena kereke tlhelo phorisa wa le Nepal, u hlangane ni mpatswa lowu nga maphayona yo hlawuleka exitarateni loko a ha ri entirhweni. U tsakisiwe hileswi wu hlamuleke swivutiso swakwe hinkwaswo hi ku tirhisa Bibele. Bam u amukele dyondzo ya Bibele naswona a swi tekanga nkarhi leswaku a sungula ku ya eminhlanganweni. Loko a ri karhi a endla nhluvuko eka dyondzo yakwe, u sungule ku kingindziwa hi ripfalo hikwalaho ka ntirho wakwe, kutani u kombele varhangeri vakwe leswaku a tirha ehofisini, laha a nga ta boheka ku khoma xibamu. Varhangeri vakwe va pfumerile. Hambiswiritano, endzhaku ko ya entsombanweni wa muganga, Bam u tlhele a sungula ku kingindziwa hi ripfalo kutani a endla xiboho xo tshika ntirho wa vuphorisa hi ku helela.

Nsati wa Bam a xi n’wi tsakisanga xiboho lexi, tanihi leswi ntirho wa vuphorisa a wu nga endli ntsena leswaku a xiximiwa hi vanhu kambe a wu tlhela wu n’wi holela kahle, a kuma mimbuyelo yo karhi eka wona naswona a ta kuma mali yo tala ya penceni. Leswaku a n’wi cincisa xiboho xakwe, u n’wi byele leswi: “Loko wo ka u nga tshiki ntirho wa vuphorisa, ndzi ta dyondza Bibele ni Timbhoni ta Yehovha.” Loko pulani yoleyo yi nga tirhanga, u kucetele murhangeri wa maphorisa leswaku a pfalela Bam ekhotsweni hi ku tshemba leswaku u ta cinca xiboho xakwe. Endzhaku ko heta masiku ya khume ekhotsweni, Bam u ve a humesiwa kambe a tiyimisele ku lava ntirho wun’wana. U sungule ku tirha ku rhwala vanhu hi xigolonyana lexi fanaka ni xikanyakanya, leswi a swi ta endla leswaku a heta tiawara to tala a ri edyambyini. Ku nga khathariseki swiphiqo sweswo, a a tsakile. U hambete a endla nhluvuko hi  tlhelo ra moya naswona u ve muhuweleri. Loko nkarhi wu ri karhi wu famba, nsati wakwe a nga ha n’wi kaneti ngopfu. Hikwalaho ka musa lowu vamakwerhu va n’wi kombeke wona evandlheni, u sungule ku dyondza Bibele. Bam u hambeta a khathalela ndyangu wakwe hi tlhelo ra nyama naswona sweswi u kuma mali yo tala ku tlula leyi a a yi hola loko a ha ri phorisa. U khuvuriwe eka nhlengeletano leyi khomiweke hi February 2013 naswona sweswi nsati wakwe ni n’wana wakwe wa jaha va ya na yena eminhlanganweni.

Nepal: Loko Bam a cinca ntirho wakwe, yena ni ndyangu wakwe va kote ku endla nhluvuko hi tlhelo ra moya

A Lava Ku Va Phayona Ra Nkarhinyana

Myeong-hee ku nga makwerhu wa xisati loyi a tshamaka eKorea, u karhatiwa hi nenge hikwalaho ka leswi a lamaleke loko a ha ri ni malembe mambirhi. U hatla a karhala naswona minkarhi yin’wana wa wa. Ku engetela kwalaho, nkarhi ni nkarhi u teriwa hi ku chava naswona u va ni swita-ndzhaku swa mirhi leyi a yi tirhisaka. Myeong-hee swa n’wi tikela ku hefemula naswona u va ni switlhavi leswi vangiwaka hi ntshikilelo ni ku chava. Ku nga khathariseki swiphiqo leswi, Myeong-hee a a lava ku va phayona ra nkarhinyana naswona se u ni malembe mambirhi a ri karhi a phayona. U nkhensa Yehovha hikwalaho ka leswi a n’wi nyikeke matimba leswaku a hetisisa vutirheli byakwe.

“Ndzi Ni Malembe Ya 30 Ndzi Ri Karhi Ndzi Yi Lava!”

Agnes, loyi a nga murhumiwa le Indonesia, a tshamela ku chumayela wansati loyi a a tikile. Wansati loyi a a xavisa matsavu emakete wa kwalaho. A a swi rhandza ku hlaya timagazini ta hina naswona a tiphina hi ku va ni mabulo ya le Bibeleni loko a nga khomekanga ngopfu. Siku rin’wana loko Agnes a ya emakete a endzela wansati yoloye, u kume a nga ri kona. Nuna wakwe u byele Agnes leswaku nsati wakwe wa ha ku kuma n’wana. Agnes u hlele ku n’wi endzela. U fambe ni buku leyi  nge Buku Yanga Ya Timhaka Ta Bibele yi phutseriwe tanihi nyiko. Wansati loyi a tsakile a tlhela a hlamala hikwalaho ka leswi Agnes a teke a ta vona yena swin’we ni n’wana, kambe u hlamale no tlurisa loko Agnes a n’wi nyika nyiko. Wansati loyi u phurumule buku, a yi languta a nga tshembi, kutani a ku: “U yi kume kwihi buku leyi? Ndzi ni malembe ya 30 ndzi ri karhi ndzi yi lava! Ndzi yi lave eswitolo hinkwaswo leswi xavisaka tibuku ndzi tlhela ndzi vutisa vanhu hinkwavo. Ku hava loyi a nga na yona kumbe loyi a yi tivaka naswona a ku na buku leyinene leyi fanaka na yona.” Swi ti komba onge loko wansati loyi a ha ri ntsongo, malume wakwe a ri ni buku leyi nge Timhaka Ta Bibele naswona a a rhandza ku yi hlaya. Sweswi wansati loyi u tlhela a yi hlaya naswona n’wana wakwe lonkulu wa nhwanyana na yena wa swi rhandza ku yi hlaya. Havumbirhi bya vona va sungule ku dyondza Bibele.

Indonesia: Agnes a khome buku leyi a yi nyikeleke tanihi nyiko