Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 114: Ku Hela Ka Vubihi Hinkwabyo

Dyondzo 114: Ku Hela Ka Vubihi Hinkwabyo

Xana u vona yihi laha? Ina, vuthu ra tihanci to basa. Kambe xiya leswaku ti huma kwihi. Tihanci leti ti rhelela hi mapapa ti huma etilweni! Xana ti kona tihanci ta xiviri etilweni?

Yesu tanihi Hosi etilweni

E-e, leti a hi tihanci ta xiviri. Ha swi tiva hikuva tihanci a ti nge swi koti ku tsutsuma emapapeni, a swi tano ke? Kambe Bibele yi vulavula hi tihanci leti nga etilweni. Xana wa swi tiva leswaku hikwalaho ka yini?

Hikuva khale tihanci a ti tirhisiwa ngopfu enyimpini. Kutani Bibele yi vulavula hi vanhu lava gadeke tihanci leti humaka etilweni ku kombisa leswaku Xikwembu xi ta lwa ni vanhu emisaveni. Xana wa swi tiva leswaku ndhawu leyi nyimpi leyi yi nga ta lweriwa eka yona yi vuriwa yini? I Armagedoni. Nyimpi yoleyo yi ta herisa vubihi hinkwabyo emisaveni.

Yesu hi Yena la nga ta rhangela enyimpini leyi eArmagedoni. Tsundzuka, Yehovha u hlawule Yesu leswaku a va hosi ya hulumendhe Yakwe. Hi yona mhaka leyi Yesu a ambaleke xihuku xa hosi. Savula leri a ri khomeke ri kombisa leswaku u ta dlaya valala hinkwavo va Xikwembu. Xana hi fanele ku hlamala hileswi Xikwembu xi nga ta dlaya vanhu hinkwavo vo biha?

Languta eka Xitori 10 lexi hi hundzeke eka xona. Xana u vona yini kwalaho? Ina, Ndhambi leyikulu leyi loviseke vanhu vo biha. I mani la vangeke Ndhambi yoleyo? I Yehovha Xikwembu. Sweswi languta eka Xitori 15. Xana ku endleka yini kwalaho? Muti wa Sodoma ni wa Gomora yi lovisiwa hi ndzilo lowu humaka eka Yehovha.

Pfula eka Xitori 33. Languta leswi endlekeke hi tihanci ni makalichi ya nyimpi ya Vaegipta. I mani la endleke leswaku mati ma va lovisa? I Yehovha. U endle tano leswaku a sirhelela vanhu va yena. Languta eka Xitori 76. U ta swi vona leswaku Yehovha u tshike vanhu va yena, ku nga Vaisrayele, leswaku va lovisiwa hikwalaho ka vubihi bya vona.

Kutani, na hina a hi fanelanga hi hlamala hileswi Yehovha a nga ta rhuma mavuthu ya yena ya le tilweni leswaku ma ta herisa vubihi hinkwabyo emisaveni. Kambe vona leswaku sweswo swi ta va swi vula yini! Pfula eka tluka leri landzelaka u vona.

Nhlavutelo 16:16; 19:11-16.



Swivutiso

  • Ha yini Bibele yi vulavula hi tihanci leti nga etilweni?
  • I yini vito ra nyimpi leyi Xikwembu xi nga ta lwa ni vanhu lavo biha emisaveni eka yona, naswona hi xihi xikongomelo xa nyimpi leyi?
  • Exifanisweni lexi, i mani Loyi a nga ta rhangela enyimpini leyi, ha yini a ambale harhi, naswona savula ra yena ri vula yini?
  • Loko hi languta endzhaku eka Dyondzo 10 na 15, ha yini hi nga fanelanga hi hlamala leswaku Xikwembu xi ta lovisa vanhu lavo biha?
  • Xana Dyondzo 33, 36 na 76 ti swi kombisa njhani leswaku Xikwembu xi ta lovisa vanhu lavo biha hambiloko va vula leswaku va xi gandzela?

Swivutiso swo engetela

  • Hlaya Nhlavutelo 19:11-16.

    Xana Matsalwa ma swi veka njhani erivaleni leswaku Yesu Kreste i mugadi wa hanci yo basa?

    Nguvu ya le handle ya Yesu leyi xuviweke hi ngati yi swi tiyisekisa njhani leswaku ku hlula ka yena ku hetisekile?

    I vamani van’wana lava swi nga ha endlekaka va ri kona eka vuthu leri landzelaka Yesu ni hanci ya yena yo basa?