Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 113: Pawulo eRhoma

Dyondzo 113: Pawulo eRhoma

Vona tinketani emavokweni ya Pawulo, naswona languta socha ra Murhoma leri a ri n’wi rindzile. Pawulo a a ri mukhotsiwa eRhoma. A a rindze leswaku Khezari wa Murhoma a vula leswi a nga ta n’wi endla swona. Loko a ha ri ekhotsweni, vanhu a va pfumeleriwa ku n’wi endzela.

Endzhaku ka masiku manharhu Pawulo a fike eRhoma, u vitane varhangeri van’wana va Vayuda leswaku va ta n’wi vona. Hikwalaho, ku te Vayuda vo tala va le Rhoma. Pawulo u va chumayele hi ta Yesu ni mfumo wa Xikwembu. Van’wana va hundzukile kutani va va Vakreste, kambe van’wana a va hundzukanga.

Pawulo ekhotsweni

Pawulo u tlhele a chumayela ni masocha yo hambana-hambana lawa a ma tirha ku n’wi rindza. Pawulo u tshame kwalaho ku ringana malembe mambirhi a ri mukhotsiwa naswona a chumayela un’wana ni un’wana loyi a a swi kota ku n’wi chumayela. Hikwalaho ka sweswo, hambi ku ri vandyangu wa Khezari va twe mahungu lamanene ya Mfumo, naswona van’wana va vona va ve Vakreste.

Kambe, i mani muendzi loyi a nga laha tafuleni la tsalaka? Xana u nga vhumbha? Ina, a ku ri Timotiya. Timotiya na yena a a khotsiwile hikwalaho ko chumayela hi Mfumo, kambe u tlhele a ntshunxiwa. Kutani a a te laha ku ta pfuna Pawulo. Xana wa swi tiva leswaku Timotiya u tsala yini? A hi voneni.

Xana wa wu tsundzuka muti wa Filipiya ni wa Efesa eka Xitori 110? Pawulo u pfunile leswaku ku sunguriwa mavandlha ya Vukreste emitini yoleyo. Kutani, loko a ri ekhotsweni, Pawulo u tsalele Vakreste volavo mapapila. Mapapila ya kona ma le Bibeleni, naswona ma vuriwa Vaefesa na Vafilipiya. Hi nkarhi wolowo Pawulo a a byela Timotiya leswi a faneleke a swi tsalela vanghana va yena lava nga Vakreste le Filipiya.

Vafilipiya va ve ni musa eka Pawulo. Va n’wi rhumele nyiko ekhotsweni, kutani Pawulo u nkhense nyiko yoleyo. Epafrodito hi yena la tiseke nyiko ya kona. Kambe u fike a vabya swinene a lava ni ku fa. Sweswi u hanyile naswona u lava ku muka. U ta famba ni papila leri humaka eka Pawulo na Timotiya loko a tlhelela eFilipiya.

Loko a ha ri ekhotsweni, Pawulo u tsale mapapila man’wana mambirhi lawa ma kumekaka eBibeleni. Rin’wana a ri ya eka Vakreste lava nga emutini wa Kolosa. Xana wa swi tiva leswaku ri vuriwa yini? Vakolosa. Rin’wana a ri ya eka munghana wa yena lonkulu la vuriwaka Filemoni, loyi na yena a tshamaka eKolosa. Papila leri ri vulavula hi Onesima nandza wa Filemoni.

Onesima a a balekele Filemoni kutani a ya eRhoma. Hi ndlela yo karhi Onesima u swi twile leswaku Pawulo u le khotsweni kwalaho. U n’wi endzerile, kutani Pawulo a chumayela Onesima. Ku nga ri kungani Onesima na yena u ve Mukreste. Hiloko Onesima a tisola hileswi a balekeke. Xana wa swi tiva leswaku Pawulo u tsale yini eka papila leri a ri ya eka Filemoni?

Pawulo u kombele Filemoni leswaku a rivalela Onesima. Pawulo u te: ‘Ndzi n’wi tlherisela eka wena. Kambe sweswi a nga ha ri nandza wa wena ntsena. Kambe se i makwenu lonene la nga Mukreste.’ Loko Onesima a tlhelela eKolosa, u fambe ni mapapila wolawo mambirhi, rin’wana ri ya eka Vakolosa kasi rin’wana ri ya eka Filemoni. Mawaku ndlela leyi Filemoni a a tsake ha yona loko a twa leswaku nandza wa yena se i Mukreste.

Loko Pawulo a tsalela Vafilipiya na Filemoni, a a ri ni mahungu lamanene ngopfu. Pawulo u byele Vafilipiya a ku: ‘Ndzi mi rhumela Timotiya. Kambe na mina ndzi ta mi endzela ku nga ri khale.’ Naswona eka Filemoni u te: ‘Ndzi lunghiselele ndhawu yo tshama kwalaho.’

Loko Pawulo a ntshunxiwile, u endzele vamakwavo va Vakreste etindhawini to tala. Kambe endzhakunyana Pawulo u tlhele a khotsiwa eRhoma. Enkarhini wolowo a a swi tiva leswaku u ta dlayiwa. Kutani u tsalele Timotiya a n’wi kombela leswaku a ta hi ku hatlisa. Pawulo u tsale a ku: ‘Ndzi tshame ndzi tshembekile eka Xikwembu, naswona Xikwembu xi ta ndzi hakela.’ Endzhaku ka malembe ma nga ri mangani Pawulo a dlayiwile, Yerusalema wu tlhele wu lovisiwa, kambe enkarhini wolowo wu lovisiwe hi Varhoma.

Kambe ku ni swo tala eBibeleni. Yehovha Xikwembu u endle leswaku muapostola Yohane a tsala tibuku to hetelela, ku katsa ni buku ya Nhlavutelo. Buku leyi ya Bibele yi hi byela hi swa nkarhi lowu taka. Sweswi a hi kumeni leswi vumundzuku byi hi khomeleke swona.

Mintirho 28:16-31; Vafilipiya 1:13; 2:19-30; 4:18-23; Vaheveru 13:23; Filemoni 1-25; Vakolosa 4:7-9; 2 Timotiya 4:7-9.



Swivutiso

  • I vamani lava Pawulo a va chumayeleke loko a ri ekhotsweni eRhoma?
  • Exifanisweni lexi, i mani muendzi loyi a tshameke kusuhi ni tafula, naswona u endlela Pawulo yini?
  • A a ri mani Epafrodito, naswona u fambe na yini loko a tlhelela eFilipiya?
  • Ha yini Pawulo a tsalele Filemoni munghana wakwe lonkulu papila?
  • Pawulo u endle yini loko a ntshunxiwile, naswona endzhakunyana u endliwe yini?
  • I mani loyi Yehovha a n’wi tirhiseke ku tsala buku yo hetelela ya Bibele, naswona buku ya Nhlavutelo yi vulavula ha yini?

Swivutiso swo engetela

  • Hlaya Mintirho 28:16-31 na Vafilipiya 1:13.

    Pawulo u wu tirhise njhani nkarhi wakwe loko a ri ekhotsweni eRhoma, naswona xana ripfumelo ra yena leri tiyeke ri ri khumbe njhani vandlha ra Vukreste?

  • Hlaya Vafilipiya 2:19-30.

    Pawulo u n’wi bumabumele njhani Timotiya na Epafrodito, naswona hi nga xi tekelela njhani xikombiso xa Pawulo?

  • Hlaya Filemoni 1-25.

    Xana Pawulo u khutaze Filemoni ku endla leswinene exisekelweni xihi, naswona leswi swi tirha njhani tanihi xitsundzuxo eka vakulu namuntlha?

    Xana marito ya Pawulo lama kumekaka eka Filemoni 13, 14 ma swi kombisa njhani leswaku a a xixima ripfalo ra van’wana evandlheni?

  • Hlaya 2 Timotiya 4:7-9.

    Ku fana na muapostola Pawulo, xana hi nga tiyiseka njhani leswaku Yehovha u ta hi hakela loko hi tshembeka ku ya fika emakumu?