Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 111: Jaha Leri Khudzeheleke

Dyondzo 111: Jaha Leri Khudzeheleke

Yoo! Yoo! Ku humelele yini laha? Xana jaha leri etleleke laha hansi ri vaviseke ngopfu? Vona, un’wana wa vavanuna lava humaka endlwini i Pawulo! Xana wa n’wi vona na Timotiya kwalaho? Xana jaha leri ri lo wa hi fasitere?

Pawulo a tela ku ta pfuxa Yutiko

Ina, ri wile. Pawulo a a nyikela nkulumo eka vadyondzisiwa eTrowasi. A a swi tiva leswaku a a nga ta hatla a va vona nakambe hikuva a a fanele ku famba hi byatso siku leri landzelaka. Kutani u vulavule kukondza ku va exikarhi ka vusiku.

Phela, jaha leri ri vuriwaka Yutiko a ri tshame efasitereni, kutani ri khomiwe hi vurhongo. Xisweswo ri wile ri huma hi fasitere ku suka eka xithezi xa vunharhu! Kutani wa swi vona leswaku ha yini vanhu a va languteka va karhatekile. Loko vavanuna va tlakula jaha leri, leswi a va swi chava a swi endlekile. Ri file!

Loko Pawulo a vona leswaku jaha ri file, u etlele ehenhla ka rona a ri vukarha. Kutani a ku: ‘Mi nga karhateki. Ra ha hanya!’ Ina, a ra ha hanya! I singita! Pawulo u ri pfuxile eku feni! Vanhu va tsake swinene.

Hinkwavo va tlhelele exithezini xa le henhla kutani va dya swakudya. Pawulo u hambete a vulavula kukondza ri xa. Kambe u nga tiyiseka leswaku Yutiko a nga ha etlelanga nakambe! Kutani, Pawulo, Timotiya swin’we ni lava a va famba na vona va khandziye byatso. Xana wa swi tiva leswaku va ya kwihi?

Pawulo wa ha ku heta riendzo ra yena ra vunharhu ro chumayela, naswona a a ri endleleni yo tlhelela ekaya. Eka riendzo leri, Pawulo a a tshame malembe manharhu emutini wa Efesa ntsena. Kutani riendzo leri a ri lehe ku tlula leriya ra vumbirhi.

Loko va suke eTrowasi, byatso byi yimenyana eMileta. Leswi Efesa a yi nga ri kule, Pawulo u vitane vakulukumba va vandlha va ta eMileta leswaku a ta lelana na vona. Endzhakunyana, loko byatso byi fanele ku suka, a va karhateke swinene ku vona Pawulo a famba!

Eku heteleleni byatso byi fike eKhezariya. Loko Pawulo a ha tshamile endlwini ya mudyondzisiwa Filipi, muprofeta Agabo u lemukise Pawulo. U vule leswaku Pawulo u ta khotsiwa loko a fika Yerusalema. Hakunene, swi ve tano. Kutani, endzhaku ka loko a khotsiwe malembe mambirhi eKhezariya, Pawulo u rhumeriwe eRhoma a ya tengisiwa hi Khezari mufumi wa Rhoma. A hi voneni leswi humeleleke eriendzweni ro ya eRhoma.

Mintirho tindzima 19 ku ya eka 26.



Swivutiso

  • Exifanisweni, i mani jaha leri etleleke laha hansi, naswona ri lo yini?
  • Pawulo u endle yini loko a vona leswaku jaha leri ri file?
  • Xana Pawulo, Timotiya swin’we ni lava a va famba na vona va ye kwihi, naswona ku humelele yini loko va yime eMileta?
  • Hi xihi xitsundzuxo lexi muprofeta Agabo a xi nyikeke Pawulo, naswona swilo swi endleke hilaha muprofeta a vuleke hakona hi ndlela yihi?

Swivutiso swo engetela

  • Hlaya Mintirho 20:7-38.

    Xana hi nga tshama njhani hi ‘basile engatini ya vanhu hinkwavo,’ hi ku ya hi marito ya Pawulo lama tsariweke eka Mintirho 20:26, 27?

    Ha yini vakulu va fanele va ‘khomelela swinene eritweni ro tshembeka’ loko va dyondzisa?

  • Hlaya Mintirho 26:24-32.

    Pawulo u ri tirhise njhani lunghelo ra ku va muaka-tiko wa le Rhoma leswaku a hetisisa ntirho wa ku chumayela lowu a nyikiweke wona hi Yesu?