Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 110: Timotiya—Mupfuni Lontshwa Wa Pawulo

Dyondzo 110: Timotiya—Mupfuni Lontshwa Wa Pawulo

Jaha leri u ri vonaka laha leri nga na muapostola Pawulo i Timotiya. Timotiya a a tshama ni ndyangu wa ka vona eListra. Vito ra mana wakwe i Yunisi kasi kokwa wakwe i Luwisa.

A ku ri ra vunharhu Pawulo a endzela eListra. Kwalomu ka lembe kumbe ku tlula, Pawulo na Barnaba va tshame va ta laha va ta chumayela. Kutani Pawulo u tlhele a vuya ni munghana wa yena Silasi.

Timotiya na Pawulo

Xana wa swi tiva leswaku Pawulo u te yini eka Timotiya? U te: ‘Xana u nga tsakela ku famba na mina na Silasi? U nga hi pfuna ku chumayela vanhu lava nga etindhawini ta le kule.’

Timotiya u hlamule a ku: ‘Ina, ndzi nga swi tsakela.’ Endzhakunyana Timotiya u siye ndyangu wa ka vona a famba na Pawulo na Silasi. Kambe, hi nga si kambisisa hi ta riendzo ra vona, a hi voneni leswaku ku humelela yini hi Pawulo. Se a ku hundze malembe ya kwalomu ka 17 ku sukela loko Yesu a humelele eka yena endleleni yo ya eDamaska.

Tsundzuka, Pawulo u ye eDamaska ku ya xanisa vadyondzisiwa va Yesu, kambe yena hi yexe u ve mudyondzisiwa! Endzhakunyana valala van’wana a va kunguhata ku dlaya Pawulo hikuva a va nga swi lavi leswaku a dyondzisa hi ta Yesu. Kambe vadyondzisiwa va pfune Pawulo leswaku a baleka. Va n’wi hoxe exirhundzwini va n’wi ehlisa hi le rirhangwini ra muti.

Endzhaku ka sweswo Pawulo u ye eAntiyoka a ya chumayela kona. Hi kona laha valandzeri va Yesu va nga sungula ku vuriwa Vakreste kona. Kutani Pawulo na Barnaba va suke eAntiyoka va rhumeriwa ematikweni ya le kule va ya chumayela kona. Rin’wana ra madoroba lawa va ma endzeleke i Listra, laha Timotiya a humaka kona.

Kutani endzhaku ka lembe, Pawulo u tlhelele eListra eriendzweni ra yena ra vumbirhi. Loko Timotiya a famba na Pawulo na Silasi, xana wa swi tiva leswaku va ye kwihi? Languta mepe, kutani u kambisisa tin’wana ta tindhawu leti.

Va rhange va ya emutini wa le kusuhi wa Ikoniya, kutani ra vumbirhi va ya eka muti lowu landzelaka wa Antiyoka. Endzhaku va fambe kukondza va ya fika eTrowasi, kutani va hundzela eFilipiya, eTesalonika ni le Beriya. Xana wa yi vona Atena emepeni? Pawulo u chumayerile kwalaho. Endzhaku ka sweswo va hete lembe ni hafu va ri karhi va chumayela eKorinto. Eku heteleleni va fike va yima swa xinkarhana aEfesa. Kutani va tlhelela eKhezariya hi byatso, va famba va ya fika eAntiyoka, laha Pawulo a a tshama kona.

Kutani Timotiya u fambe mpfhuka wo leha swinene a pfuna Pawulo ku chumayela “mahungu lamanene” ni ku sungula mavandlha yo tala ya Vukreste. Xana loko u kula u ta rhandza ku va nandza wa Xikwembu la tshembekaka ku fana na Timotiya?

Mintirho 9:19-30; 11:19-26; tindzima 13 ku ya fika eka 17; 18:1-22.

Mepe

1. Rhoma; 2. Melita; 3. Beriya; 4. Tesalonika; 5. Korinto; 6. Filipiya; 7. Atena; 8. Kreta; 9. Trowasi; 10. Efesa; 11. Mileta; 12. Kolosa; 13. Antiyoka; 14. Ikoniya; 15. Listra; 16. Kipra; 17. Antiyoka; 18. Khezariya; 19. Yopa; 20. Damaska; 21. Yerusalema; 22. Lwandle Lerikulu (Mediteraniya)



Swivutiso

  • I mani jaha leri nga laha xifanisweni, xana ri tshama kwihi naswona i mani vito ra mana wa rona ni ra kokwa wa rona?
  • Xana Timotiya u te yini loko Pawulo a n’wi vutisa leswaku wa swi tsakela ku famba na Silasi na Pawulo eku chumayeleni ka vanhu etindhawini ta le kule?
  • Hi kwihi laha valandzeri va Yesu va sunguleke kona ku vuriwa Vakreste?
  • Hi wahi mavito ya miti yin’wana leyi Pawulo, Silasi na Timotiya va yi endzeleke loko va suka eListra?
  • Timotiya u n’wi pfune njhani Pawulo, naswona hi xihi xivutiso lexi vantshwa namuntlha va faneleke va tivutisa xona?

Swivutiso swo engetela

  • Hlaya Mintirho 9:19-30.

    Muapostola Pawulo u byi kombise njhani vuxiyaxiya loko a kanetiwa hileswi a a chumayela mahungu lamanene?

  • Hlaya Mintirho 11:19-26.

    Xana mhaka leyi tsariweke eka Mintirho 11:19-21, 26 yi swi kombisa njhani leswaku moya wa Yehovha wu kongomisa ntirho wo chumayela?

  • Hlaya Mintirho 13:13-16, 42-52.

    Mintirho 13:51, 52 yi swi kombisa njhani leswaku vadyondzisiwa a va pfumelanga leswaku ku kanetiwa ku va heta matimba?

  • Hlaya Mintirho 14:1-6, 19-28.

    Xana marito lama nge “va va nyikela eka Yehovha,” ma hi pfuna njhani leswaku hi nga vileli loko hi ri karhi hi pfuna vanhu lava ha riki vantshwa evandlheni?

  • Hlaya Mintirho 16:1-5.

    Xana ku pfumela ka Timotiya ku yimba swi wu kandziyisa njhani nkoka wa ku endla “swilo hinkwaswo hikwalaho ka mahungu lamanene”?

  • Hlaya Mintirho 18:1-11, 18-22.

    Xana Mintirho 18:9, 10 yi kombisa yini malunghana ni ku katseka ka Yesu eku kongomiseni ka ntirho wo chumayela, naswona leswi swi endla hi tiyiseka hi yini namuntlha?

DYONDZA SWO TALA

Khadi Ra Bibele Ra Timotiya

Timotiya u hlawule ku tirhela Xikwembu a ha ri ntsongo? U nga n’wi tekelela njhani?

Timotiya A A Lava Ku Pfuna Vanhu

Xana u nga hanya vutomi lebyi tsakisaka hi ndlela yihi ku fana Timotiya?