Loyi a yimeke laha i muapostola Petro, naswona lava nga endzhaku ka yena i vanghana vakwe. Kambe ha yini wanuna loyi a nkhinsamele Petro? Xana swa fanela leswaku a endla tano? Xana wa swi tiva leswaku i mani?

Petro a hlangana na Korneliyo

Wanuna loyi i Korneliyo. I ndhuna ya vuthu ra Rhoma. Korneliyo a a nga n’wi tivi Petro, kambe u byeriwe leswaku a n’wi rhambela endlwini ya yena. A hi voneni leswaku leswi swi tise ku yini.

Valandzeri va Yesu vo sungula a ku ri Vayuda, kambe Korneliyo a a nga ri Muyuda. Kambe a a rhandza Xikwembu, a a xi khongela, naswona a a endlela vanhu swilo swo tala leswinene. Siku rin’wana nindzhenga ntsumi yi humelele eka yena kutani yi ku: ‘Xikwembu xa tsaka ha wena, naswona xi ta hlamula swikhongelo swa wena. Rhuma vavanuna va ya teka wanuna la vuriwaka Petro. U tshama eYopa endlwini ya Simoni, loyi a tshamaka ekusuhi ni lwandle.’

Xikan’we-kan’we Korneliyo u rhume vavanuna va ya lava Petro. Hi siku leri landzelaka, loko vavanuna volavo va tshinela eYopa, Petro a a ri elwangwini ra fuleti ra yindlu ya Simoni. Kwalaho Xikwembu xi endle Petro a anakanya leswaku u vona nguvu leyikulu yi xika hi le tilweni. Engubyeni ya kona a ku ri ni mixaka hinkwayo ya swiharhi. Hi ku ya hi nawu wa Xikwembu, swiharhi leswi a swi ri swakudya leswi nga tengangiki, kambe rito ri te: ‘Tlakuka, Petro. Tlhava u dya.’

Petro u hlamule a ku: ‘E-e! A ndzi si tshama ndzi dya swilo leswi nga tengangiki.’ Kambe rito ri byela Petro ri ku: ‘Tshika ku vula swilo leswi Xikwembu xi swi tengiseke leswaku a swi tenganga.’ Sweswo swi endleke kanharhu. Loko Petro a ha tivutisa leswaku sweswo hinkwaswo a swi vula yini, vavanuna lava rhumiweke hi Korneliyo va fikile endlwini va lava Petro.

Petro u rhelerile kutani a ku: ‘Hi mina loyi mi n’wi lavaka. Mi lava yini?’ Loko vavanuna va hlamusela leswaku ntsumi yi byele Korneliyo leswaku a vitana Petro endlwini ya yena, Petro u pfumerile ku famba na vona. Hi siku leri tlhandlamaka Petro ni vanghana va yena va endzele Korneliyo eKhezariya.

Korneliyo a a rhambe maxaka ni vanghana. Loko Petro a nghena, Korneliyo u n’wi hlanganisile. U wele hansi a nkhinsamela Petro, hilaha u n’wi vonaka hakona laha. Kambe Petro u te: ‘Tlakuka, mina ndzi munhu ntsena.’ Ina, Bibele yi kombisa leswaku a swi lulamanga ku nkhinsamela munhu ni ku n’wi gandzela. Hi fanele hi gandzela Yehovha ntsena.

Petro u sungule ku chumayela lava a va ri kwalaho. Petro u te: ‘Ndza swi vona leswaku Xikwembu xi amukela vanhu hinkwavo lava lavaka ku xi tirhela.’ Loko a ha vulavula, Xikwembu xi rhumele moya wa xona lowo kwetsima, kutani vanhu va sungula ku vulavula hi tindzimi to hambana-hambana. Leswi swi hlamarise vadyondzisiwa va Vayuda lava a va te na Petro, hikuva a va anakanya leswaku Xikwembu xi rhandza Vayuda ntsena. Kutani leswi swi va dyondzise leswaku Xikwembu a xi languti vanhu va rixaka ro karhi va antswa kumbe va ri va nkoka eka Xikwembu ku tlula vanhu va tinxaka tin’wana. Xana sweswo a hi swinene leswaku hinkwerhu hi swi tsundzuka?

Mintirho 10:1-48; 11:1-18; Nhlavutelo 19:10.



Swivutiso

  • I mani wanuna loyi a nkhinsameke laha xifanisweni?
  • Ntsumi yi te yini eka Korneliyo?
  • Xana Xikwembu xi endle leswaku Petro a vona yini loko a ri elwangwini ra yindlu ya Simoni eYopa?
  • Ha yini Petro a byele Korneliyo leswaku a nga fanelanga a nkhinsama a n’wi gandzela?
  • Ha yini vadyondzisiwa va Vayuda lava a va ri na Petro va hlamarile?
  • Hi yihi dyondzo ya nkoka leyi hi faneleke hi yi dyondza eka mhaka ya Petro ya ku endzela Korneliyo?

Swivutiso swo engetela

  • Hlaya Mintirho 10:1-48.

    Marito ya Petro lama kumekaka eka Mintirho 10:42 ma kombisa yini malunghana ni ntirho wo chumayela mahungu lamanene ya Mfumo?

  • Hlaya Mintirho 11:1-18.

    Petro u kombise langutelo rihi loko nkongomiso wa Yehovha malunghana ni Vamatiko wu ve erivaleni, naswona hi nga xi tekelela njhani xikombiso xa yena?