Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 108: ENdleleni Leyi Yaka eDamaska

Dyondzo 108: ENdleleni Leyi Yaka eDamaska

Xana wa swi tiva leswaku i mani loyi a etleleke laha hansi? I Sawulo. Tsundzuka, hi yena loyi a a rindze tinguvu ta vavanuna lava a va khandla Stefano hi maribye. Languta ku vonakala lokuya lokukulu! Ku humelele yini?

Endzhaku ka loko Stefano a dlayiwile, Sawulo a a rhangela eku hlotiweni ka valandzeri va Yesu leswaku a ta va xanisa. A a famba hi yindlu ni yindlu a va kokela ehandle kutani a va nghenisa ekhotsweni. Vadyondzisiwa vo tala va balekele emitini yin’wana naswona va sungule ku vula “mahungu lamanene” kona. Kambe Sawulo u ye emitini yin’wana ku ya lava valandzeri va Yesu. Enkarhini wolowo a a ri endleleni yo ya eDamaska. Kambe loko a ri endleleni, ku humelele mhaka leyi yo hlamarisa:

Hi xitshuketa ku vonakala loku humaka etilweni ku tlhave Sawulo ku n’wi rhendzela. U wele ehansi hilaha u swi vonaka hakona laha. Kutani rito ri ku: ‘Sawulo, Sawulo! U ndzi xanisela yini?’ Vavanuna lava a va ri na Sawulo va vone ku vonakala kutani va twa ni mpfumawulo wa rito, kambe a va swi twisisanga leswi a swi vuriwa.

Sawulo a dlayiwe mahlo hi ku vonakala

Sawulo u vutise a ku: ‘Xana u mani, Hosi?’

Hiloko rito ri ku: ‘Hi mina Yesu, loyi u n’wi xanisaka.’ Yesu u vule tano hikuva loko Sawulo a xanisa valandzeri vakwe, Yesu a a twa onge ku xanisiwa yena.

Kutani Sawulo u vutise a ku: ‘Xana ndzi fanele ku endla yini, Hosi?’

Yesu u te: ‘Pfuka u nghena eDamaska. Kwalaho u ta byeriwa leswi u faneleke u swi endla.’ Loko Sawulo a pfuka a pfula mahlo, a a nga voni nchumu. A a fe mahlo! Kutani vavanuna lava a a ri na vona va n’wi khome hi voko va n’wi yisa eDamaska.

Hiloko Yesu a vulavula ni un’wana wa vadyondzisiwa vakwe eDamaska, a ku: ‘Pfuka, Ananiya. Yana exitarateni lexi vuriwaka Ndzulamo. Endlwini ya Yudasi u vutisa munhu loyi a vuriwaka Sawulo. Ndzi n’wi hlawurile leswaku a va nandza wa mina wo hlawuleka.’

Ananiya u yingisile. Loko a hlangana na Sawulo, u n’wi tlhandleke mavoko kutani a ku: ‘Hosi yi ndzi rhumile leswaku u tlhela u vona ni ku tala moya lowo kwetsima.’ Xikan’we-kan’we swilo leswi fanaka ni mahakatimba swi we ematihlweni ya Sawulo, kutani a tlhela a vona.

Sawulo u tirhisiwe swinene ku chumayela eka vanhu va matiko yo tala. A a tiviwa tanihi muapostola Pawulo, loyi hi nga ta dyondza swo tala ha yena. Kambe a hi rhangeni hi vona leswaku Xikwembu xi rhume Petro leswaku a ya endla yini.

Mintirho 8:1-4; 9:1-20; 22:6-16; 26:8-20.



Swivutiso

  • Sawulo u endle yini endzhaku ka loko Stefano a dlayiwile?
  • Loko Sawulo a ri endleleni yo ya eDamaska, hi wihi nchumu wo hlamarisa lowu humeleleke?
  • Yesu u byele Sawulo leswaku a endla yini?
  • Hi swihi swiletelo leswi Yesu a swi nyikeke Ananiya, naswona Sawulo u swi kotise ku yini ku tlhela a vona?
  • Xana Sawulo u tiviwe hi vito rihi, naswona u tirhisiwe njhani?

Swivutiso swo engetela

  • Hlaya Mintirho 8:1-4.

    Xana ku xanisiwa ka vandlha ra Vukreste leri a ra ha ku simekiwa ku pfune njhani leswaku Vukreste byi andza, naswona hi wihi nchumu lowu fanaka lowu endlekeke manguva lawa?

  • Hlaya Mintirho 9:1-20.

    Hi yihi mintirho yinharhu leyi Yesu a a lava leswaku Sawulo a yi endla?

  • Hlaya Mintirho 22:6-16.

    Hi nga fana njhani na Ananiya, naswona ha yini sweswo swi ri swa nkoka?

  • Hlaya Mintirho 26:8-20.

    Xana ku hundzuka ka Sawulo a va Mukreste swi tirha tanihi xikhutazo hi ndlela yihi eka lava nga ni vanghana va vukati lava nga riki vapfumeri namuntlha?

DYONDZA SWO TALA

Khadi Ra Bibele Ra Pawulo

Pawulo a a endla ntirho wa njhani leswaku a ta kota ku tihlayisa loko a ri karhi a chumayela? Tirhisa khadi leri ra Bibele leswaku u kuma nhlamulo.