Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 107: Stefano A Khandliwa Hi Maribye

Dyondzo 107: Stefano A Khandliwa Hi Maribye

Wanuna loyi a khinsameke laha i Stefano. I mudyondzisiwa wa Yesu la tshembekaka. Kambe vona leswi n’wi humeleleke! Vavanuna lava va n’wi khandle hi maribye lamakulu. Ha yini a va venga Stefano hi ndlela leyi lerova va n’wi endla nsele wo tani? A hi voneni.

Stefano a ri karhi a khandliwa hi maribye

Xikwembu xi pfune Stefano leswaku a endla masingita yo hlamarisa. Vavanuna lava a va nga swi tsakeli sweswo, kutani va kanetane na yena hileswi a a dyondzisa vanhu ntiyiso. Kambe Xikwembu xi nyike Stefano vutlhari lebyikulu, naswona Stefano u kombise leswaku vavanuna volavo a va dyondzisa mavunwa. Sweswo swi va hlundzukise ngopfu. Kutani va n’wi khomile, ivi va vitana vanhu va ta n’wi hehla hi mavunwa.

Muprista lonkulu u vutise Stefano a ku: ‘Xana swilo leswi i ntiyiso?’ Stefano u hlamule hi ku nyikela nkulumo leyinene leyi sekeriweke eBibeleni. Loko a heta, u hlamusele ndlela leyi vanhu lavo homboloka va vengeke vaprofeta va Yehovha ha yona ku sukela khale. Kutani a ku: ‘Mi fana na vona. Mi dlaye Yesu nandza wa Xikwembu, naswona a mi yi yingisanga milawu ya Xikwembu.’

Leswi swi endle leswaku varhangeri volavo va vukhongeri va hlundzuka swinene! Va getserise meno hikwalaho ko kariha. Kambe Stefano u tlakuse nhloko, kutani a ku: ‘Maswivo! Ndzi vona Yesu a yime evokweni ra xinene ra Xikwembu etilweni.’ Kutani vavanuna volavo va tipfale tindleve hi mavoko ivi va tsutsuma va landza Stefano. Va n’wi khoma va n’wi kokela ehandle ka muti.

Hiloko va hluvula tinguvu ta vona va ti nyika jaha leri vuriwaka Sawulo leswaku ri ti langutela. Xana wa n’wi vona Sawulo? Kutani vavanuna van’wana va sungula ku khandla Stefano hi maribye. Hiloko Stefano a khinsama, hilaha u n’wi vonaka hakona laha, kutani a khongela eka Xikwembu a ku: ‘Yehovha, u nga va xupuli hikwalaho ka xidyoho lexi.’ A a swi tiva leswaku van’wana va vona a va xisiwe hi varhangeri va vukhongeri. Endzhaku ka sweswo Stefano u file.

Loko munhu un’wana a ku endla swo biha, xana u ringeta ku rihisela hi wexe, kumbe u kombela Xikwembu leswaku xi n’wi endla swo biha na yena? Stefano na Yesu a va endlanga tano. A va ri ni tintswalo hambi ku ri eka vanhu lava a va va khome hi tihanyi. A hi tekeleleni xikombiso xa vona.

Mintirho 6:8-15; 7:1-60.



Swivutiso

  • A a ri mani Stefano, naswona Xikwembu xi n’wi pfune ku endla yini?
  • Stefano u vule yini leswi hlundzukiseke varhangeri va vukhongeri swinene?
  • Loko vanhu va kokele Stefano ehandle ka muti, va fike va n’wi endla yini?
  • Laha xifanisweni, i mani jaha leri yimeke ekusuhi ni tinguvu?
  • Loko a nga si fa, xana Stefano u khongele a ku yini eka Yehovha?
  • Hi nga n’wi tekelela njhani Stefano loko un’wana a hi endla nchumu wo biha?

Swivutiso swo engetela

  • Hlaya Mintirho 6:8-15.

    Hi byihi vunwa lebyi varhangeri va vukhongeri va byi tirhisaka ku ringeta ku yimisa ntirho wo chumayela wa Timbhoni ta Yehovha?

  • Hlaya Mintirho 7:1-60.

    I yini lexi pfuneke Stefano leswaku a humelela eku lweleni ka mahungu lamanene emahlweni ka Sanedri, naswona hi nga dyondza yini eka xikombiso xa yena?

    Hi fanele hi va ni langutelo rihi eka vanhu lava kanetaka ntirho wa hina?