Seta screen reader

Hlawula ririmi

Yana enxaxamelweni wa vumbirhi

Hundzela eka leswi nga endzeni

Nghena endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 106: Va Ntshunxiwa eKhotsweni

Dyondzo 106: Va Ntshunxiwa eKhotsweni

Vona ntsumi yi pfule nyangwa wa khotso. Vavanuna lava yi va ntshunxaka i vaapostola va Yesu. A hi voneni leswaku i yini lexi endleke leswaku va pfaleriwa ekhotsweni.

Ntsumi yi ntshunxa vaapostola

Vadyondzisiwa va Yesu a va ha ku chululeriwa moya lowo kwetsima. Kutani ku humelele leswi: Siku rin’wana Petro na Yohane va nghene etempeleni ya le Yerusalema nindzhenga. Kwalaho, ekusuhi ni nyangwa, a ku ri ni wanuna un’wana loyi a tswariweke a lamarile. Siku ni siku vanhu a va n’wi rhwala va n’wi yisa kona leswaku a ta kombela mali eka lava nghenaka etempeleni. Loko a vona Petro na Yohane, u va kombele leswaku va n’wi nyika swo karhi. Xana vaapostola a va ta endla yini?

Va yimile va languta xisiwana lexi. Petro u te: ‘A ndzi na mali, kambe ndzi ta ku nyika leswi ndzi nga na swona. Hi vito ra Yesu, suka u famba!’ Hiloko Petro a khoma wanuna yoloye hi voko ra xinene, xikan’we-kan’we a tlula kutani a sungula ku famba. Loko vanhu va vona leswi, va hlamarile naswona va tsakisiwe swinene hi singita leri.

Petro u te: ‘Hi endle singita leri hi matimba ya Xikwembu, lexi pfuxeke Yesu eka lava feke.’ Loko yena na Yohane va ha vulavula, ku fike varhangeri van’wana va vukhongeri. Va hlundzukile hikuva Petro na Yohane va byele vanhu malunghana ni ku pfuxiwa ka Yesu eka lava feke. Hiloko va va khoma va va pfalela ekhotsweni.

Hi siku leri landzelaka varhangeri va vukhongeri va ve ni nhlangano lowukulu. Ku tisiwe Petro na Yohane swin’we ni wanuna loyi va n’wi hanyiseke. Varhangeri va vukhongeri va vutise va ku: ‘Xana singita leri mi ri endle hi matimba ya mani?’

Petro u va byele leswaku va ri endle hi matimba ya Xikwembu, lexi pfuxeke Yesu eka lava feke. Vaprista a va nga ha swi tivi leswaku va ta endla yini, hikuva a va nga ta landzula leswaku singita leri ri endlekile hakunene. Kutani va tshinye vaapostola leswaku va nga ha tshuki va vulavule hi Yesu, kutani va va ntshunxa.

Kutani vaapostola va hambete va chumayela malunghana na Yesu ni ku hanyisa lava vabyaka. Mhaka ya masingita lawa yi twale hinkwako-nkwako. Hambi ku ri mintshungu leyi humaka emitini leyi nga kusuhi na Yerusalema yi tise vanhu lava vabyaka eka vaapostola leswaku va ta va hanyisa. Leswi swi endle leswaku varhangeri va vukhongeri va va ni mavondzo, kutani va khoma vaapostola va va pfalela ekhotsweni. Kambe a va tshamanga nkarhi wo leha kwalaho.

Nivusiku ntsumi ya Xikwembu yi pfule nyangwa ya khotso, hilaha u yi vonaka hakona laha. Ntsumi yi te: ‘Fambani mi ya yima etempeleni, naswona mi hambeta mi vulavula ni vanhu.’ Hi siku leri landzelaka, loko varhangeri va vukhongeri va rhuma vavanuna ekhotsweni ku ya teka vaapostola, va kume va nga ri kona. Endzhakunyana va va kume va ri eku dyondziseni etempeleni kutani va va yisa eholweni ya Sanedri.

Varhangeri va vukhongeri va te: ‘Hi mi lerise leswaku mi nga ha tshuki mi dyondzisa ha Yesu. Kambe mi tate Yerusalema hi dyondzo ya n’wina.’ Kutani vaapostola va hlamule va ku: “Hi fanele ku yingisa Xikwembu tanihi mufumi ku tlula vanhu.” Kutani va hambeta va dyondzisa “mahungu lamanene.” Xana lexi a hi xikombiso lexinene xo xi landzela?

Mintirho tindzima 3 ku ya fika eka 5.



Swivutiso

  • Petro na Yohane va humelele hi yini ndzhenga wun’wana loko va ri karhi va ya etempeleni?
  • Petro u te yini eka wanuna la lamaleke, naswona u n’wi nyike yini lexi nga xa nkoka swinene ku tlula mali?
  • Ha yini varhangeri va vukhongeri va hlundzukile, naswona va va endle yini Petro na Yohane?
  • Xana Petro u te yini eka varhangeri va vukhongeri, naswona vaapostola va lemukisiwe yini?
  • Ha yini varhangeri va vukhongeri va ve ni mavondzo, kambe ku humelele yini loko vaapostola va hoxiwe ekhotsweni ra vumbirhi?
  • Xana vaapostola va hlamurise ku yini loko va yisiwe eholweni ya Sanedri?

Swivutiso swo engetela

  • Hlaya Mintirho 3:1-10.

    Hambileswi hi nga riki na wona matimba yo endla masingita namuntlha, xana marito ya Petro lama tsariweke eka Mintirho 3:6 ma hi pfuna njhani leswaku hi tlangela nkoka wa rungula ra Mfumo?

  • Hlaya Mintirho 4:1-31.

    Loko hi kanetiwa ensin’wini, xana hi nga va tekelela njhani vamakwerhu lava nga Vakreste va lembe-xidzana ro sungula?

  • Hlaya Mintirho 5:17-42.

    Xana vanhu van’wana lava nga riki Timbhoni, va le nkarhini wa khale ni wa namuntlha, va ku kombise njhani ku anakanyela emhakeni ya ntirho wo chumayela?

DYONDZA SWO TALA

Khadi Ra Bibele Ra Petro

Dyondza swo tala hi muapostola loyi.