Nghena endzeni

Yana enxaxamelweni wa vumbirhi

Hundzela eka leswi nga endzeni

Timbhoni Ta Yehovha

Xitsonga

Buku Yanga Ya Timhaka Ta Bibele

Dyondzo 105: Va Rindzile eYerusalema

Dyondzo 105: Va Rindzile eYerusalema

Vanhu lava i valandzeri va Yesu. Va n’wi yingisile naswona va tshame eYerusalema. Kutani loko hinkwavo va ha rindzile, mpfumawulo lowukulu wu tate yindlu hinkwayo. A wu twala ku fana ni moya lowu hungaka hi matimba. Hiloko tindzimi leti fanaka ni ndzilo ti sungula ku vonaka ehenhla ka nhloko ya mudyondzisiwa un’wana ni un’wana. Xana wa wu vona ndzilo ehenhla ka un’wana ni un’wana wa vona? Xana swi vula yini hinkwaswo leswi?

Moya lowo kwetsima ehenhla ka vadyondzisiwa va lembe-xidzana ro sungula

I singita! Yesu u tlhelele etilweni eka Tata wakwe, naswona u chululele moya lowo kwetsima wa Xikwembu eka valandzeri vakwe. Xana wa swi tiva leswaku moya lowu wu va susumetele ku endla yini? Hinkwavo va sungule ku vulavula hi tindzimi to hambana-hambana.

Vanhu vo tala eYerusalema va wu twile mpfumawulo lowu twalaka ku fana ni moya lowukulu, kutani va tile va ta vona leswi humelelaka. Van’wana a va ri va tinxaka tin’wana, a va tele ku ta tlangela nkhuvo wa Vaisrayele wa Pentekosta. Vaendzi lava va hlamale swinene! Va twe vadyondzisiwa va vulavula hi tindzimi ta vona malunghana ni swilo swo hlamarisa leswi Xikwembu xi swi endleke.

Vaendzi va te: ‘Vanhu lava hinkwavo va huma eGaleliya. Kutani, swi tisa ku yini leswaku va kota ku vulavula tindzimi leti to hambana-hambana ta matiko lawa hi humaka eka wona?’

Hiloko Petro a yima a va hlamusela. U tlakuse rito a byela vanhu ndlela leyi Yesu a dlayiweke ha yona nileswaku Yehovha u n’wi pfuxile eku feni. Hiloko Petro a ku: ‘Sweswi Yesu u le tilweni evokweni ra xinene ra Xikwembu. Kutani u chululele moya lowo kwetsima lowu a wu tshembiseke. Hi yona mhaka leyi mi voneke ni ku twa masingita lawa.’

Phela, loko Petro a vula swilo leswi, vanhu vo tala va tlhavekile swinene etimbilwini ta vona hileswi humeleleke Yesu. Kutani va vutise va ku: ‘Xana hi fanele ku endla yini?’ Petro u va byele a ku: ‘Mi fanele mi hundzuka kutani mi khuvuriwa.’ Kutani hi siku rero, vanhu va kwalomu ka 3 000 va khuvuriwile va tlhela va va valandzeri va Yesu.

Mintirho 2:1-47.



Swivutiso

  • Hilaha swi kombisiweke hakona laha xifanisweni, ku humelele yini hi valandzeri va Yesu lava a va rindzile eYerusalema?
  • Xana vanhu lava a va endzele eYerusalema va hlamarisiwe hi yini?
  • Xana Petro u va hlamusele yini vanhu?
  • Xana vanhu va titwe njhani endzhaku ka loko va yingisele Petro, naswona u va byele ku endla yini?
  • Ku khuvuriwe vanhu vangani hi siku ra Pentekosta ya 33 C.E.?

Swivutiso swo engetela

  • Hlaya Mintirho 2:1-47.

    Xana marito ya Petro lama kumekaka eka Mintirho 2:23, 36 ma swi kombisa njhani leswaku Vayuda hinkwavo va katsekile eku dlayiweni ka Yesu?

    Xana Petro u veke xikombiso lexinene xa ku kombisana ni vanhu hi Matsalwa hi ndlela yihi?

    Xana Petro u xi tirhise njhani ‘xilotlelo xo sungula xa mfumo wa matilo’ lexi Yesu a tshembiseke ku n’wi nyika xona?